PSALM 135 - BIBLU WIWE LỌ 1923

¹ HALLELUJAH. Mì pa oyín OKLUNỌ tọn; mì pa ẹ, Mì mẹdagun OKLUNỌ tọn lẹ emi.

² Mì he nọ ṣite to ohọ̀ OKLUNỌ tọn mẹ lẹ, To awá ohọ̀ Jiwheyẹwhe mítọn tọn lẹ mẹ.

³ Mì pa OKLUNỌ; na yinyọ́n wẹ OKLUNỌ: Mì ji pipa ohàn hlan oyín etọn: na yinyọ́n wẹ.

⁴ Na OKLUNỌ lọ ko dè Jakobu hlan ede de, Podọ Islaeli na adọkun osòhẹ́ etọn.

⁵ Na yẹn yọnẹn dọ kiklo wẹ OKLUNỌ, Podọ omẹ he yìaga hú yẹwhe lẹpo wẹ OKLUNỌ mítọn.

⁶ Nudepope OKLUNỌ jlo, enẹ wẹ é ko wà to olọn mẹ, Podọ to aigba mẹ, to ohù mẹ, podọ to osédò lẹpo mẹ.

⁷ E hẹn avìvì lẹ nado yìaga sọn opòdo aigba tọn lẹ: Ẹ basi abì na jikun: E hẹn jẹhọn wá sọn agbànhò etọn lẹ mẹ.

⁸ Omẹ he linu plọnji Egipti tọn, Gbẹtọ tọn po kanlin tọn po.

⁹ E do ohia po nujawu lẹ po hlan ṣẹnsẹn towe, hiẹ Egipti, Do Falo ji, podọ do mẹdagun etọn lẹpo ji

¹⁰ Omẹ he linu akọta daho lẹ, Bo sọ hù ahọlu asuka lẹ:

¹¹ Sihọni ahọlu Amolitinu lẹ tọn, Podọ Ogi ahọlu Baṣani tọn, Po ahọluyigba Kanaani tọn lẹ po:

¹² Bo yi aigba yetọn na omẹ na ogú yigba, Ogú-yigba de hlan Islaeli omẹ etọn lẹ.

¹³ OKLUNỌ E, oyín towe to ote kakadoi; Podọ oflin towe, OKLUNỌ E, kakajẹ whẹndo lẹpo mẹ.

¹⁴ Na OKLUNỌ na dawhẹ omẹ etọn, lẹ tọn, E nasọ diọlinlẹn etọn gbọn mẹdagun etọn lẹ tọn dali.

¹⁵ Fataka po sika po wẹ bosiọ kosi lẹ tọn, Alọnuzòn gbẹtọ tọn.

¹⁶ Yé tindo onù, gãnṣo yé ma dọhó; Yé tindo nukim gãnṣo yé ma mọnú;

¹⁷ Yé tindo otọ́, gãnṣo yé ma sènú; Mọ gbọfufu depope ma tin to onù yetọn mẹ.

¹⁸ Yé he basi yé na tin taidi yé: Nugbo, mẹdepope he dotúdò yé go lẹ.

¹⁹ Mì dona OKLUNỌ, mì whédo Islaeli tọn emi: Mì dona OKLUNỌ, mì whédo Aalọn tọn emi:

²⁰ Mì dona OKLUNỌ, mì whédo Levi tọn emi: Mì he dibusi OKLUNỌ emi, mì dona OKLUNỌ.

²¹ Donanọ wẹ OKLUNỌ ni yín sọn Ziọni mẹ, He nọnọ̀ Jelusalẹm. Hallelujah.