PSALM 132 - BIBLU WIWE LỌ 1923

Ohàn Jeiaga lẹ tọn de.

¹ OKLUNỌ E, flin na Davidi Nukunbibia etọn lẹpo.

² Lè é whle hlan OKLUNỌ, Bo sọ dopa hlan Omẹ Hlọnhlọnnọ Jakobu tọn do:

³ Nugbònugbo, yẹn ma na biọ ogohọ́ owhé ṣie gbè tọn mẹ, Kavi hẹ́ oji yì aisinnu adọ́zan ṣie tọn mẹ;

⁴ Yẹn ma na na amlọn nukun ṣie, Kavi amlọngọ na nukungá ṣie;

⁵ Whẹpo yẹn nado mọ ofi de na OKLUNỌ, Ogohọ̀ de na Omẹ Hlọnhlọnnọ Jakobu tọn.

⁶ Dayi e go, mí sè linlin etọn to Eflata: Mí mọ ẹn to odanji ozùn tọn mẹ.

⁷ Míwlẹ na biọ ogohọ̀ etọn mẹ: Mí na litai to tọkloafọligbé etọn kọ̀n.

⁸ Tite, OKLUNỌ E, biọ gbọjẹtẹn towe mẹ; Hiẹ, po alki huhlọn towe tọn po.

⁹ Gbọ yè ni yí dódó do ṣinyọ̀navọ̀na yẹwhenọ towe lẹ; Bo sọ gbọ mẹwiwe towe lẹ ni yí ayajijẹ do jihàn.

¹⁰ Na Davidi devi towe tọn Wutu a hẹn nukunmẹ mẹyiamisisadode towe tọn diọ blo.

¹¹ OKLUNỌ ko whle to nugbo mẹ hlan Davidi: Ewọ ma na diọ sọn e mẹ: Sọn sinsẹ́n agbasa towe tọn mẹ wẹ yẹn na dè te zédo ofìn towe ji.

¹² Eyín ovi towe lẹ na nọ payi alónu ṣie go Po aṣẹdai ṣie he yẹn na plọ́n yé po, Ovi yetọn lẹ ga na sinai to ofìn towe ji kakadoidoi.

¹³ Na OKLUNỌ ko dè Ziọni; Ewọ ko sọ jlo e na fininò etọm

¹⁴ Ehe wẹ gbọjẹtẹn ṣie kakadoi: Ofi wẹ yẹn na nọnọ̀: na yẹn jlo e.

¹⁵ Yẹn na dona núdùdù etọn gégé: Yẹn na yí núdùdù do pékóna agbátọnọ etọn lẹ.

¹⁶ Yẹnna yí whlẹngan do ṣinyọ̀navọ̀na—yẹwhenọ etọn lẹ ga: Mẹwiwe etọn lẹ nasọ yí ayajijẹ do jihàn.

¹⁷ Finẹ wẹ yẹn na hẹn azò nado wú jẹgbonu te na Davidi: Yẹn ko do miyọngbán de ai na mẹyiamisisadode ṣie.

¹⁸ Kẹntọ etọn lẹ wẹ yẹn na yí winyan do ṣinyọnavọ na: Ṣigba to ewlọsu go wẹ ojẹgbakun etọn na vùn te.