PSALM 125 - BIBLU WIWE LỌ 1923

Ohàn Jeiaga lẹ tọn de.

¹ YÉ he dotódido to OKLUNỌ mẹ lẹ na tin di osé Ziọni tọn, He ma sọgan yín sisẹtẹnna, adavo é tin kakadoi.

² Dile osé lẹ tin lédo Jelusalẹm do, Mọwẹ OKLUNỌ tin lédo omẹ etọn le do Sọn ojlẹ he mẹ zọ̀nmī kakadoidoi.

³ Na ogánpò ylankanwiwà tọn ma na jẹ mimá dódónọ lẹ tọn ji gba; Na dódónọ lẹ niká dè alọ yetọn jẹgbonu hlan ylando.

⁴ OKLUNỌ E, wà dagbe hlan enẹlẹ he yín yìnyón lẹ, Podọ hlan yé he yín tenọglinọ to ayiha mẹ lẹ.

⁵ Ṣigba na yé he lé jẹ apadopo hlan aliho gbingban yetọn lẹ ji tọn dali, OKLUNỌ na dè yé tọ́n po azọ́ntọ oylanwà tọn lẹ po. Jijọho ni tin to Islaeli ji.