PSALM 119 - BIBLU WIWE LỌ 1923

ALEFI.

¹ DONANỌ wẹ yé he aliho yé tọn yin pipẹ lẹ, Mẹhe to zọnlinzin to osẹn OKLUNỌ tọn mẹ lẹ.

² Donanọ wẹ yé he to aṣẹdai etọn lẹ yín, He yí ayiha pete do to dindin in.

³ Nugbo, yéwlẹ ma wà mawàdódó depope: Yé nọ to zọnlinzin to aliho etọn lẹ mẹ.

⁴ Hiẹ ko degbè gbèdai towe lẹ tọn na mí, Na mí nado nọ yí magbòawupò do payi yé go.

⁵ Yè do hẹn aliho ṣie lẹ lódo Nado nọ payi oséndoai towe lẹ go

⁶ Whenẹnu wẹ winyan ma na hù mi, Whenuena yẹn to ayipa hlan gbèdide towe lẹpo dali.

⁷ Yẹn na nọ yí tenọgligli ayiha tọn do na opẹ́ hlan we, Whenuena yẹn plọ́n whẹ̀dida dódónọ towe lẹ.

⁸ Yẹn na nọ payi oséndoai towe lọ go: A gbẹ́ mi dai gbidigbidi blo.

BETI.

⁹ Etẹ yọpọsunnu na do kló aliho etọn. Gbọn awuhihọ hlan ẹn dali kẹdẹdi ohó towe.

¹⁰ Ayiha lẹpo pete wẹ yẹn do to dindin we: A dike yẹn dánbu sọn gbèdide towe mẹ blo.

¹¹ Ayiha ṣie mẹ wẹ yẹn yí ohó towe whlá dó, TI Na yẹn nikã wàylan do we.

¹² Donanọ wẹ hiẹ, OKLUNỌ È; Plọ́n oséndoai towe lẹ mi.

¹³ Onùflo ṣie wẹ yẹn do La whẹ̀dida onù towe tọn lẹpo.

¹⁴ Yẹn ko to ayajẹ to aliho aṣẹdai towe lẹ tọn ji, Dile é te to adọkun lẹpo mẹ.

¹⁵ Yẹn na nọ to ayihamẹlẹnpón to ogbèdai towe lẹ mẹ, Bo sọ dayi aliho towe lẹ go.

¹⁶ Yẹn na nọ nahomẹhùnhùn dẽ to oséndoai towe lẹ mẹ: Yẹn má na wọnji ohó towe go gba.

GIMẸLI.

¹⁷ Yí dagbewà do zòn hẹ devi towe, na yẹn nido nọgbó, Mọwẹ yẹn na nọ payi ohó towe go do.

¹⁸ Hiẹ ni hùn nukun ṣie, Na yẹn nido pọ́n onú jawujawu lẹ sọn osẹ́n towe mẹ.

¹⁹ Wásinu wẹ yẹn to aigba ji: A yí gbèdide towe lẹ whlá sọn dẽ blo.

²⁰ Ayiha ṣie gbà na tenọpón He e tindo to ojlẹ lẹpo mẹ hlan whẹ̀dida towe lẹ

²¹ Hiẹ ko wọhẹ saklanọ he yè hodẹ́do lẹ. He buali sọn gbèdide towe lẹ mẹ.

²² Zé ovlẹ po ṣanko po sọn dẽ; Na yẹn kọ to aṣẹdai; towe le yìn.

²³ Ahọvi lẹ sinai bo to hódọ do ogo e ga: Ṣigba devi towe to ayihamẹlẹnpón to osẹ́ndoai towe lẹ mẹ

²⁴ Aṣẹdai towe lẹ wẹ homẹhùnhùn ṣie, Podọ omẹ hónamẹ tọn ṣie lẹ.

DALẸTI.

²⁵ Ayiha ṣie tẹ́do kọ́gudu go: Nagbẹ̀ mi kẹdẹdi ohó towe.

²⁶ Yẹn ko la aliho ṣie lẹ, hiẹ sọ siọ mi: Plọ́n oséndoai towe mi.

²⁷ Hẹn mi tunwun aliho ogbèdai towe lẹ tọn: Mọwẹ yẹn na nọ to ayihamẹlẹnpón to azọ́n jawu towe lẹ mẹ.

²⁸ Ayiha ṣie jà kònyingbe na homẹgble: Hẹn mi lódo kẹdẹdi óhó towe.

²⁹ Zé aliho lalodido tọn sọn dẽ: Bo yí homẹdagbe do na òsẹ́n towe mi.

³⁰ Yẹn ko dè aliho nugbo tọn: Yẹn ko sọ yí whẹ̀dida towe do nukọn ṣie.

³¹ Asẹdài towe lẹ go wẹ yẹn hẹn: OKLUNỌ E, a yí mi do winyan mẹ blo.

³² Na yẹn na dowẹzun to aliho gbèdide towe lẹ tọn jì, Whenuena hiẹ na kándeji na ayiha ṣie.

HE.

³³ OKLUNỌ È, plọ́n aliho oséndoai tow e lẹ tọn mi; Yẹn nasọ yìn in jẹ opòdo.

³⁴ Na nuyọnẹn mi, yẹn na yìn osẹ́n towe; Nugbo, yẹn na yí ayiha ṣie lẹpo pete do payi e go.

³⁵ Hen mi gbọn omọ́ gbèdide towe lẹ tọn ji; Na e mẹ wẹ homẹhùn mi te.

³⁶ Dẹ́ ayiha ṣie hlan aṣẹdai towe lẹ, E yín hlan ale bublu tọn blo.

³⁷ Dè nukun ṣie sọn ovọ́ pinpọ́n go: Bo nagbẹ̀ mi to aliho towe lẹ ji.

³⁸ Hẹn ohó towe lódo hlan devi towe de, Ehe yín osí towe tọn.

³⁹ Dè ovlẹ ṣie he yẹn dibuna sẹ́: Na yinyọ́n wẹ whẹ̀dida towe lẹ.

⁴⁰ Dayi e go, yẹn ko nọtepọ́n osẹ́n towe lẹ: Nagbẹ̀ mi dódó towe mẹ.

VAV.

⁴¹ OKLUNỌ È, gbọ dagbewanyi towe ni wádẽ ga, Yèdọ whlẹngan towe, kẹdẹdi ohó towe.

⁴² Mọwẹ yẹn na tindo hógbigblọn na ewọ he vivlẹ mi: Na ohó towe go wẹ yẹn dotudo.

⁴³ A yi ohó nugbo sẹ̀ sọn onùṣíe pata pata blo; Na yẹn tindo tódido to whẹ́dida towe lẹ mẹ.

⁴⁴ Mọwẹ yẹn na to ayipa osẹ́n towe go zọ̀nmī do.

⁴⁵ Yẹn nasọ to zọnlinzin blẹo; Na ogbèdai towe wẹ yẹn ko din

⁴⁶ Yẹn na nọ dọhó aṣẹdai towe lẹ tọn to ahọlu lẹ nukọn ga, Bo ma to na yín winyannọ.

⁴⁷ Yẹn na nahomẹhùnhùn dẽ to gbèdide towe lẹ mẹ, He yẹn ko yiwanna.

⁴⁸ Yẹn nasọ zé alọ ṣie daga hlan gbèdide towe lẹ ga, he yẹn ko yiwanna; Yẹn nasọ to ayihamẹlẹnpón to osẹ́ndoai towe lẹ mẹ.

ZAINI.

⁴⁹ Flin ohó lọ hlan devi towe, Na hiẹ hẹn mi nado tindo tódido wutu.

⁵⁰ Ehẹ wẹ homẹmiọn ṣie to nukunbibia ṣie mẹ: Na ohó towe ko nagbẹ̀ mi.

⁵¹ Saklanọ lẹ ko yi mi do davlẹ dahodaho: Gãnṣo yẹn ma klán sọn osẹ́n towe kọ̀n gba.

⁵² Yẹn flin whẹ̀dida towe hóhó tọn lẹ, OKLUNỌ E; Bo sọ miọnhomẹna dẽ.

⁵³ Adanjijẹ zogbe gbo mi fán Na mẹylankan he gbẹ́ osẹ́n towe dai lẹ tọn wutu.

⁵⁴ Oséndoai towe lẹ wẹ ohàn ṣie To ohó tọ̀wiwezònlinnọ tọn ṣie mẹ.

⁵⁵ OKLUNỌ E, yẹn ko flin oyín towe to ozán mẹ, Bo sọ payi osẹ́n towe go.

⁵⁶ Ehe wẹ yẹn tindo, Na yẹn yìn ogbèdai towe wutu.

KETI.

⁵⁷ Mimá ṣie wẹ OKLUNỌ: Yẹn ko dọ dọ yẹn na payi ohó towe lẹ go.

⁵⁸ Yẹn yí ayiha ṣie lẹpo pete do to vẹ́vẹ́ na nukundagbe towe: Yín lẹblanunọ hlan mi kẹdẹdi ohó towe.

⁵⁹ Yẹn lẹn aliho ṣie lẹ tọn pọn, Bo sọ lẹ́ afọ ṣie hlan aṣẹdai towe.

⁶⁰ Yẹn yawu, bo ma sọ whleawu Nado payi gbèdide towe lẹ go gba.

⁶¹ Okàn mẹylankan lẹ tọn lẹhla mi pé: Ṣigba yẹn ma wọnji osẹ́n towe go gba.

⁶² Yẹn na nọ fọ́n zángbodawemẹ nado na opẹ́ hlan we Na whẹ̀dida dódónọ tọn towe lẹ wutu.

⁶³ Ogbẹ́ yé he dibusi we lẹpo tọn wẹ yẹn, Podọ yé he payi ogbèdai towe go lẹpo tọn.

⁶⁴ OKLUNỌ E, aigba gọ́ na dagbewanyi towe: plọ́n oséndoai towe lẹ mì.

TETI.

⁶⁵ OKLUNỌ È, hiẹ ko wà dagbe na devi towe, Kẹdẹdi ohó towe.

⁶⁶ Plọ́n zìnzìn dagbe po yinyọnẹn po mi: Na yẹn ko yí gbèdide towe lẹ sè.

⁶⁷ Yẹn ko búali whẹpo yè bianukunna mi; Ṣigba dinvie yẹn to ayipa osẹ́n towe lẹ go.

⁶⁸ Yínyọn wẹ hiẹ, bo sọ nọ wà yínyọn; Plọ́n oséndoai towe lẹ mi.

⁶⁹ Saklanọ lẹ ko tlẹ́ lalo do ogo e: Ṣigba yẹn na yí ayiha ṣie lẹpo pete do yìn ogbèdai towe lẹ.

⁷⁰ Ayiha yetọn whè dopọ di yìnnóhihò; Ṣigba homẹhùnhùn ṣie tin to osẹ́n towe mẹ.

⁷¹ E yín dagbe na mi dọ yè ko bianukunna mi; Na yẹn nido plọ́n oséndoai towe lẹ.

⁷² Osẹ́n onù towe mẹ tọn yín dagbe hlan dali ṣie Hú fọtónfọtón sika po fataka po tọn.

YỌDI.

⁷³ Alọ towe wẹ da mi bo sọ wànà ṣie. Na nuyọnẹn mi, na yẹn nido plọ́n gbèdide towe lẹ.

⁷⁴ Yé he dibusi we lẹ na mọ mi bo yín homẹhùnnọ; na yẹn ko tindo tódido to ohó towe mẹ.

⁷⁵ OKLUNỌ E, yẹn yọnẹn dọ dódónọ wẹ whẹ̀dida towe lẹ; Podọ to nugbo mẹ wẹ hiẹ bianukunna mi.

⁷⁶ Yẹn vẹ́ we, gbọ dagbewanyi towe ni tin na homẹmiọn ṣie, Kẹdẹdi ohó towe hlan devi towe.

⁷⁷ Gbọ lẹblanu bibọ towe lẹ ni wá dè, na yẹn nido nọgbẹ́: Na osẹ́n towe wẹ homẹhùnhùn ṣie.

⁷⁸ Gbọ winyan ni hù saklanọ lẹ; na yé ko takitina mi gbọn lalo dali: Ṣigba yẹn na to ayihamẹlẹnpón to ogbèdai towe lẹ mẹ.

⁷⁹ Gbọ yé he dibusi we lẹ ni lé hlan dẽ; Yèdọ yé he yón aṣẹdai towe lẹ.

⁸⁰ Gbọ ayiha ṣie ni yín pipé to oséndoai towe lẹ mẹ; Bọ yẹn ma na do yín winyannọ winyan ma nado hù mi.

KAFI.

⁸¹ Nugbla ayiha ṣie hù na whlẹngan towe: Ṣigba yẹn tindo tódido to ohó towe mẹ.

⁸² Nukun ṣie yìsagbé na ohó towe, whenuena yẹn dọmọ, Whetẹnu wẹ hiẹ na miọnhomẹna mi?

⁸³ Na yẹn tin lẹzun taidi ayúgò de to azòli; Gãnṣo yẹn ma wọn oséndoai towe lẹ gba.

⁸⁴ Nẹmu wẹ azán devi towe tọn lẹ? Whetẹnu wẹ hiẹ na hẹn whẹ̀dida ṣẹ to yé he homẹkẹndo mi lẹ ji?

⁸⁵ Saklanọ lẹ ko kùndò dote na mi mẹhe ma gbọn osẹ́n towe dali.

⁸⁶ Nugbo wẹ gbèdide towe lẹpo: Yé yí lalo do to homẹkẹndo mi; hiẹ ni bo gọalọna mi.

⁸⁷ Yé ko bla sukún ṣie do to aigba ji: Ṣigba yẹn ma gbé ogbèdai towe lẹ dai gba.

⁸⁸ Nagbẹ̀ mi kẹdẹdile dagbewanyi towe te: Mọwẹ yẹn na nọ payi aṣẹdai onù towe tọn go.

LAMẸDI.

⁸⁹ OKLUNỌ È, ohó towe hẹnai to olọn mẹ Kakadoi.

⁹⁰ Nugbo towe tin jẹ whẹndo lẹpo mẹ: hiẹ hẹn aigba lódo, é so nọte.

⁹¹ Yé to ote jẹ egbé kẹdẹdi oséndoai towe lẹ; Na devi towe wẹ omẹ lẹpo.

⁹² Eyín osẹ́n towe ma ko yín homẹhùnhùn ṣie gba, Yẹn do ko dọ́n to nukunbibia ṣie mẹ.

⁹³ Yẹn ma na wọnji ogbèdai towe lẹ go gbède: Na yé wẹ hiẹ yí do nagbẹ̀ mi.

⁹⁴ Towe wẹ yẹn, whlẹn mi; Na yẹn ko din ogbèdai towe lẹ.

⁹⁵ Mẹylankan lẹ ko tọwù na mi nado hù mi súdo: Ṣigba yẹn na nọ lẹn aṣẹdai towe lẹ pọ́n.

⁹⁶ Yẹn ko mọ opòdo pipé lẹpo tọn de: Ṣigba gbèdide towe wẹ gblo gbahúgbahú.

MEMI.

⁹⁷ Ṣó na yẹn ka yiwanna osẹ́n towe dole! Ewu wẹ ayihamẹlẹnpón ṣie to azán popo gbè.

⁹⁸ Gbèdide towe lẹ ko hẹn mi yín nu yọnẹntọ hú kẹ̀ntọ ṣie lẹ: Na ye tin to dẽ wheponu.

⁹⁹ Yẹn zìn hú mẹplọntọ ṣie lepo: Na aṣẹdai towe lẹ wẹ ayihamẹlẹnpón ṣie.

¹⁰⁰ Yẹn zìn hú mẹhóhó lẹ, Na yẹn ko yìn ogbèdai towe lẹ wutu.

¹⁰¹ Yẹn ko dón afọ ṣie do godo sọn aliho ylankan lẹpo ji, Na yẹn nido nọ payi ohó towe go.

¹⁰² Yẹn ma fẹ́ sọn whẹ̀dida towe lẹ ji gba; Na hiẹ wẹ ko plọ́n mi.

¹⁰³ Na ohó towe vivi to okè ṣie mẹ dole! Nugbo, é vivi hú owín na onu ṣie!

¹⁰⁴ Gbọn osẹ́n towe lẹ dali wẹ yẹn tindo nuyọnẹn: Enẹwutu wẹ yẹn gbẹwanna aliho lalo tọn lẹpo.

NUNI.

¹⁰⁵ Ohó towe wẹ zogbán de hlan afọ ṣie, Hinhọ́n hlan omọ́liho ṣie.

¹⁰⁶ Yẹn ko whle, yẹn ko sọ ẹ hẹnai, Dọ yẹn na nọ yin whẹ̀dida dódónọ towe lẹ.

¹⁰⁷ Yè bianukunna mi gbahugbahu: OKLUNỌ È, nagbẹ̀ mi kẹdẹdi ohó towe.

¹⁰⁸ OKLUNỌ È, yẹn vẹ́ wẹ, yí avọ́ jijlo onù ṣie mẹ tọn lẹ, Bo plọ́n whẹ̀dida towe lẹ mi.

¹⁰⁹ Whepoponu wẹ ayiha ṣie tin to alọ ṣie mẹ: Gãnṣo yẹn ma wọnji osẹ́n towe go.

¹¹⁰ Mẹylankan lẹ ko kẹ̀ omọ̀ de dote na mì: Gãnṣo yẹn ma búali sọn ogbèdai towe lẹ mẹ gba.

¹¹¹ Asẹdai towe lẹ wẹ yẹn yí na ogúigba de kakadoi: Na yé wẹ ayajijẹ ayiha ṣie tọn.

¹¹² Yẹn ko dó ayiha ṣie nado nọ basi oséndoai towe lẹ kakadoi, Yèdọ kaka jẹ opòdo.

SAMẸKI.

¹¹³ Yẹn gbẹwanna ayiawenọ lẹ: Ṣigba osẹ́n towe wẹ yẹn yiwanna.

¹¹⁴ Hiẹ wẹ fiwhiwhla ṣie po awòyinú ṣie po: Yẹn tindo tódido to ohó towe mẹ

¹¹⁵ Mì yì sọn dẽ, mì ylanwàtọ emi: Na yẹn na yìn gbèdide Jiwheyẹwhe ṣie tọn lẹ.

¹¹⁶ Hẹn mi dote kẹdẹdi ohó towe, na yẹn nido nọgbẹ̀; A dike winyan otódo ṣie tọn hù mi blo

¹¹⁷ Zé mi dote, yẹn nasọ gán: Yẹn nasọ nọ dayi osẹ́ndoai towe go whepoponu.

¹¹⁸ Hiẹ ko deafùdo yé he búali sọn osẹ́ndoai towe lẹ mẹ: Na ovọ́ wẹ oklọ yetọn.

¹¹⁹ Hiẹ dè mẹylankan aihọn mẹ tọn lẹpo sẹ́ di ahaya: Enẹwutu wẹ yẹn yiwanna aṣẹdai towe lẹ.

¹²⁰ Agbasalan ṣie koì na osi towe tọn: Obu whẹ̀dida towe lọ tọn sọ dimi.

AINI.

¹²¹ Yẹn ko basi whẹ̀dida po dódó po: A jo mi hlan awusinyẹnnamẹtọ ṣie lẹ bló.

¹²² Yíalọ na devi towe na dagbe: A sọ dike saklanọ lẹ sinyẹnawuna mi blo.

¹²³ Nukun ṣie yìsagbó na whlẹngan towe, Podọ na ohó dódónọ towe.

¹²⁴ Wàhẹ devi towe kẹdẹdi dagbewanyi towe, Bo sọ plọ́n osẹ́ndoai towe lẹ mi.

¹²⁵ Devi towe wẹ yẹn; na nuyọnẹn mi, Na yẹn nido yọ́n aṣẹdai towe lẹ.

¹²⁶ Ojlẹ sò na OKLUNỌ nado wàzón: Na yé ko hẹn osẹ́n towe gble.

¹²⁷ Enẹwutu wẹ yẹn yiwanna gbèdide towe hú sika; Nugbo, hú sika dagbedagbe.

¹²⁸ Enẹwutu yẹn hia osẹ́n towe gbọn onú lẹpo dali nado yín jijlọ; Yẹn sọ gbẹwanna aliho lalo tọn lẹpo.

PE.

¹²⁹ Nujawu wẹ aṣẹdai towe lẹ: Enẹwutu wẹ ayiha ṣie do yìn yé.

¹³⁰ Hùnhùn ohó towe lẹ tọn na hinhọ́n omẹ; E na nuyọnẹn hlan mayọndẽnọ lẹ.

¹³¹ Yẹn kẹ́ onù ṣie gblo, bo to gbigbọjiji: Na yẹn to dindón do gbèdide towe lẹ go.

¹³² Lẹ́ pànnukọn mi, bo wàlẹblanuna mi, Dile a nọ basi hlan yé he yiwanna oyín towe lẹ do.

¹³³ Jla afọdide ṣie do to ohó towe mẹ: A sọ dike ylando depope duahọlu to oji e blo.

¹³⁴ Fli mi sọn awusinyẹnnamẹ gbẹtọ tọnsi: Mọwẹ yẹn nasọ nọ payi ogbèdai towe lẹ go.

¹³⁵ Hẹn nukun towe hónun do devi towe ji; Bo sọ plọ́n osẹ́ndoai towe lẹ mi.

¹³⁶ Otọ̀ osìn tọn lẹ sà sọn nukun ṣie mẹ, Na yé ma payi osẹ́n towe go wutu.

TZADE.

¹³⁷ Dódónọ wẹ hiẹ, OKLUNỌ È, Podọ tenọgliglinọ to whẹ̀dida towe lẹ mẹ.

¹³⁸ Dódó mẹ wẹ hiẹ ko degbè aṣẹdai towe lẹ tọn te Po nugbo lọsulọsu po.

¹³⁹ Vivẹnu ṣie hù mi súdo, Na mẹglatọ ṣie lẹ ko wọnji ohó towe lẹ go.

¹⁴⁰ Ohó towe wé gbahú: Enẹwutu wẹ devi towe yiwan nẹ̃.

¹⁴¹ Yẹn whè, yè sọ to vivlẹ mi: Gãnṣo yẹn ma wọnji ogbèdai towe lẹ go gba.

¹⁴² Dódó towe dódó madopodo de wẹ, Nugbọ sọ wẹ osẹ́n towe.

¹⁴³ Tukla po awuvẹ́ po pla mi: Ṣigba gbèdide towe lẹ wẹ homẹhùn ṣie.

¹⁴⁴ Dodónọ wẹ aṣẹdai towe lẹ kakadoi: Na nuyọnẹn mi, yẹn nasọ nọgbẹ̀.

KOFI.

¹⁴⁵ Ayiha ṣie lẹpo wẹ yẹn do dawhá; siọ mi, OKLUNỌ E, Yẹn na yìn osẹ́ndoai towe lẹ.

¹⁴⁶ Yẹn dawhá hlan we; whlẹn mi, Yẹn nasọ nọ payi aṣẹdai towe lẹ go.

¹⁴⁷ Yẹn yì nukọn to hinhọ́n afọnnu tọn mẹ, bo dawhá na alọgọ: Yẹn tindo tódido to ohó towe mẹ.

¹⁴⁸ Nukun ṣie lẹ yí nukọnna zánhihó lẹ, Na yẹn nido to ayihamẹlẹnpón to ohó towe mẹ.

¹⁴⁹ Sè ogbẹ̀ ṣie kẹdẹdi dagbewanyi towe: Nagbẹ̀ mi, OKLUNỌ E, kẹdẹdi whẹ̀dida towe.

¹⁵⁰ Yé he nọ domọ na ylankan lẹ dón sẹpọ́: Yé dẹn do osẹ́n towe.

¹⁵¹ OKLUNỌ E, hiẹ tin yakẹ; Nugbo sọ wẹ gbèdide towe lẹpo.

¹⁵² Yẹn ko yọ́nẹn gbọn aṣẹdai towe lẹ mẹ sọn hóhówhenu dọ, Hiẹ do yé ai kakadoi.

LEṢI.

¹⁵³ Pọ́n nukunbibia ṣie, bo whlẹn mi: Na yẹn ma wọnji osẹ́n towe go gba.

¹⁵⁴ Yí owhẹ́ ṣie dọ, bọ fli mi: Nagbẹ̀ mi kẹdẹdi ohó towe.

¹⁵⁵ Whlẹngan dẹn do mẹylankan lẹ; Na yé ma din osẹ́ndoài towe lẹ.

¹⁵⁶ OKLUNỌ E, daho wẹ lẹblanu bibọ towe lẹ: Nagbẹ̀ mi kẹdẹdi whẹ̀dida towe lẹ.

¹⁵⁷ Susu wẹ homẹkẹndomẹtọ ṣie po mẹglatọ ṣie lẹ po; Gãnṣo yẹn ma joagọ́ sọn aṣẹdai towe lẹ mẹ gba.

¹⁵⁸ Yẹn dayi bublutọ lọ go, bo sọ yín adinọ; Na yé ma payi ohó towe go wutu.

¹⁵⁹ Lẹ́n le yẹn yiwanna ogbèdai towe lẹ do: nagbẹ̀ mi, OKLUNỌ E, Kẹdẹdi dágbewanyi towe.

¹⁶⁰ Nugbo wẹ osọha ohó towe tọn: Dopodopo sọn whẹ̀dida dódónọ towe lẹ mẹ to ote kakadoi.

ṢINI.

¹⁶¹ Ahọvi lẹ dohomẹkẹn mi mahuwhẹ́: Ṣigba ayiha ṣie nọte to osi ohó towe lẹ tọn mẹ.

¹⁶² Yẹn to ayajẹ tọ ohó towe kọ̀n, Di yé he mọ ogblàn susu bẹ́.

¹⁶³ Yẹn gbẹwanna bo sọ dọ ṣiọ̃ na lalọdido, Ṣigba osẹ́n towe wẹ yẹn yiwanna.

¹⁶⁴ Whla ṣinawe gbèdopo wẹ yẹn nọ pa we, Na whẹ̀dida towe dódónọ lẹ wutu.

¹⁶⁵ Daho wẹ jijọho hẹ yé he yiwanna osẹ́n towe lẹ tindo: Yé ma tindo núhẹnmẹklẹnafọ ahlida tọn depope.

¹⁶⁶ OKLUNỌ È, yẹn ko tódo whlẹngan towẹ. Bo sọ basi gbèdide towe lẹ.

¹⁶⁷ Ayiha ṣie ko payi aṣẹdai towe lẹ go; Yẹn sọ yiwanna yé gbahúgbahú.

¹⁶⁸ Yẹn ko payi ogbèdai tọwe lẹ go, po aṣẹdai towe lẹ po: Na aliho ṣie lẹpo tin to nukọn towe.

TAU.

¹⁶⁹ Gbọ awhá ṣie ni sẹ́wá nukọn towe, OKLUNỌ E: Na nuyọnẹn mi kẹdẹdi ohó towe.

¹⁷⁰ Gbọ ovẹ́ ṣie ni wà nukọn towe: Whlẹn mi kẹdẹdi ohó towe.

¹⁷¹ Gbọ onuflo ṣie ni túntún pipa jẹgbonu, Na hiẹ nọ plọ́n oséndoai towe lẹ mi wutu.

¹⁷² Gbọ odẹ́ ṣie ni jihàn ohó towe tọn: Na dódó wẹ gbèdide towe lọ.

¹⁷³ Gbọ alọ towe ni gọalọna mi: Na yẹn ko dè ogbèdai towe lẹ.

¹⁷⁴ OKLUNỌ E, ayiha ṣie dón do whlẹngan towe go; Osẹ́n towe sọ wẹ homẹhùn ṣie.

¹⁷⁵ Gbọ ayiha ṣie ni nọgbó, é nasọ to pipa we; Bo sọ gbọ whẹ̀dida towe lẹ ni gọalọna mi.

¹⁷⁶ Yẹn ko danbú di lẹngbọ he bú; din devi towe; Na yẹn ma wọnji gbèdide towe lẹ go gba.