PSALM 118 - BIBLU WIWE LỌ 1923

¹ MÌ na opẹ́ hlan OKLUNỌ: na yínyón we ewọ: Na dagbewanyi etọn to ote kakadoi.

² Gbọ Islaeli ni dọ lò, Dọ dagbewanyi etọn to ote kakadoi.

³ Gbọ whédo Aalọn tọn ni dọ lò, Dọ dagbewanyi etọn to ote kakadoi.

⁴ Gbọ yé he dibusi OKLUNỌ lẹ ni dọ lò, Dọ dagbewanyi etọn to ote kakadoi.

⁵ Yẹn dawhá ylọ OKLUNỌ sọn awusinyẹn ṣie mẹ: OKLUNỌ siọ mi bo zé mi do otẹn gbigblo de mẹ.

⁶ OKLUNỌ tin to awhàn ṣie mẹ; yẹn ma obu na di: Etẹ gbẹtọ sọgan wá hlan mi?

⁷ OKLUNỌ tin to awhàn ṣie mẹ to yé he to alọgọna mi lẹ ṣẹnsẹn: Enẹwutu wẹ yẹn na mọ ojlo ṣie to yé he gbẹwanna mi lẹ ji.

⁸ É yón nado nọ din fibẹ̀tado to OKLUNỌ mẹ hú nado dotudo gbẹtọ go.

⁹ E yón nado din fibẹ̀tado to OKLUNỌ mẹ Hú nado dotudo ahọvi lẹ go.

¹⁰ Akọa lẹpo lẹhla mi pé: Ṣigba to oyín OKLUNỌ tọn mẹ yẹn na sán yé sẹ́.

¹¹ Yé lehla mi pé; nugbo, yé lẹhla mi pé; Ṣigba oyín OKLUNỌ tọn mẹ yẹn na sán yé sẹ̀.

¹² Yé lẹhla mi pé taidi owín; yè sọ si yé di miyọn owùn tọn: Na to oyín OKLUNỌ tọn mẹ yẹn na sán yé sẹ̀.

¹³ Hiẹ sisẹ́ mi gángán na yẹn nido jai: Ṣigba OKLUNỌ gọalọna mi.

¹⁴ OKLUNỌ wẹ huhlọn po ohàn ṣie po, Bo sọ lẹzun whlẹngan ṣie.

¹⁵ Ogbè ayajijẹ po whlẹngan po tọn tin to gohọ dódónọ lẹ tọn mẹ: Alọ adusi OKLUNỌ tọn yi hlọnhlọn do basi.

¹⁶ Adusilọ OKLUNỌ tọn wẹ yè zédaga; Alọ adusi OKLUNỌ tọn yí hlọnhlọn do basi.

¹⁷ Yẹn ma na kú, ogbẹ́ yẹn na nọ̀. Bo la azọn OKLUNỌ tọn lẹ.

¹⁸ OKLUNỌ wọhẹ mi badabada, Ṣigba é ma jo mi hlan okú gba.

¹⁹ Hùn hóngbo dódó tọn lẹ hlan mi: yẹn na biọ hòmẹ yì yé de, Yẹn na to opẹ́ na hlan OKLUNỌ:

²⁰ Ehe wẹ họ̀ngbo OKLUNỌ tọn; Dódónọ lẹ na biọ e mẹ.

²¹ Yẹn na to opẹ́ na hlan we: Na hiẹ ko siọ mi, bo sọ lẹzun whlẹngan ṣie.

²² Zannu he hódótọ lẹ gbédai Wẹ lẹzun gángánsu hólọnglọnẹn tọn.

²³ Ehe wẹ azọ́n OKLUNỌ tọn; E yín awujinú nukun mítọn mẹ.

²⁴ Ehe wẹ azán he OKLUNỌ do; Mí na to ayajẹ bo sọ yín homẹhùnnọ to e mẹ.

²⁵ Whlẹnmẹ lò, mì vẹ́ we, OKLUNỌ E: Do yọ́nna hlan lò, mí vivẹ̀ we, OKLUNỌ E.

²⁶ Donanọ wẹ ewọ he ja to oyín OKLUNỌ tọn mẹ ni yín: Mí ko dona we sọn ohọ̀ OKLUNỌ tọn mẹ.

²⁷ Jiwheyẹwhe wẹ OKLUNỌ, he do hinhọ́n hia mí: Yí okàn do sín avọ́ lọ hlan azò agbà tọn lẹ.

²⁸ Hiẹ wẹ Jiwheyẹwhe ṣie, yẹn na to opẹ́ na hlan we: Hiẹ wẹ Jiwheyẹwhe ṣie, yẹn na zé we daga.

²⁹ Mì na opẹ́ hlan OKLUNỌ; na yínyón wẹ ewọ: Na dagbewanyi etọn to ote kakadoi.