PSALM 116 - BIBLU WIWE LỌ 1923

¹ YẸN yiwanna OKLUNỌ, na ewọ ko sè ogbẹ̀ Ṣie po ovẹ́ ṣie po wutu.

² Na é ko tuntóai hlan mi wutu, Enẹwutu wẹ yẹn na nọ dawhá ylọ ẹ le yẹn tin to ogbẹ́ dẹn sọ.

³ Okàn okú tọn lẹhla mi pé, Awufiẹsa kutòmẹ tọn gbò mi do: Yẹn mọ tukla po awúbla po.

⁴ Whenẹnu wẹ yẹn dawhá ylọ oyin OKLUNỌ tọn; Yẹn vẹ́ wẹ, OKLUNỌ È, whlẹn ayiha ṣie.

⁵ Dagbenọ wẹ OKLUNỌ, dódónọ sọ we; Nugbo, lẹblanunọ wẹ Jiwheyẹwhe mítọn.

⁶ OKLUNỌ hẹn mayọndẹnọ lẹ dote: Yè gọ̀ mi do odọ̀, ewọ sọ whlẹn mi

⁷ Gò do ogbọjẹ towe mẹ, hiẹ Ayiha ṣie; Na OKLUNỌ ko yi dagbewà do zọ̀n hẹ we.

⁸ Na hiẹ ko whlẹn ayiha ṣie sọn okú mẹ, Nukun ṣie sọn dasìn mẹ, Podọ afọ ṣie sọn ṣinṣọ̀n mẹ.

⁹ Yẹn na zọnlinzin to OKLUNỌ nukọn To aigba gbènọ lẹ tọn ji.

¹⁰ Yẹn yise, na yẹn na dọhó: Yè bianukunna mi glanglan:

¹¹ Yẹn sọ dọ to awuya ṣie mẹ Dọ lalo de wẹ gbẹtọ lẹpo.

¹² Etẹ yẹn na na hlan OKLUNỌ Na dagbewà etọn lẹ hlan dali ṣie?

¹³ Yẹn na zé kofo whlẹngan tọn lọ, Bo dawhá ylọ oyín OKLUNỌ tọn.

¹⁴ Yẹn na depà ṣie lẹ hlan OKLUNỌ; Nugbo, to nukun gbẹtọ etọn lẹpo tọn mẹ.

¹⁵ Nùhọakuẹ to nukun OKLUNỌ tọn mẹ We okú mẹwiwe etọn lẹ tọn.

¹⁶ OKLUNỌ È, devi towe wẹ yẹn nugbo: Devi towe wẹ yẹn, ovisunnu deviyọnnu towe tọn: Hiẹ ko tún ogàn ṣie lẹ.

¹⁷ Yẹn na sán avọ́ opẹ́ tọn hlan we, Bo sọ dawhá ylọ oyin OKLUNỌ tọn.

¹⁸ Yẹn na depà ṣie lẹ hlan OKLUNỌ, Nugbo, to nukun gbẹtọ etọn lẹpo tọn mẹ;

¹⁹ To opá owhé OKLUNỌ tọn tọn mẹ, To hiẹ Jelusalẹm ṣẹnsẹn. Hallelujah.