PSALM 115 - BIBLU WIWE LỌ 1923

¹ OKLUNỌ È, hlan míwlẹ magba, Hlan míwlẹ ma gba, Adavo hlan oyín towe wẹ a ni na gigo, Na dagbewanyi towe, po nugbo towe po tọn wutu.

² Etẹwutu kosi lẹ na do dọ, dọmọ, Fie wẹ Jiwheyẹwhe yetọn te lò?

³ Ṣigba Jiwheyẹwhe míwlẹ tọn tin to olọn lẹ mẹ: E ko wà onú depope he é jlo.

⁴ Fataka po sika po wẹ bosiọ yetọn lẹ, Alọnuzón gbẹtọ tọn.

⁵ Yé tindo onù, gãnṣo yé ma dọhó; Yé tindo nukun, gãnṣo yé ma mọnú:

⁶ Yé tindo otọ́, gãnṣo yé ma sènú: Yé tindo awọntin, gãnṣo yé ma sèwán:

⁷ Yé tindo alọ, gãnṣo yé ma hẹnnú: Yé tindo afọ, gãnṣo yé ma zinzọnlin: Mọ yé ma dọhó gbọn ovégo yetọn mẹ.

⁸ Yé he basi yé lẹ na yín nuyíjlẹ do yé go: Nugbo, omẹ dopodopo he dotudo yé go.

⁹ Dotudo OKLUNỌ go, hiẹ Islaeli: Ewọ wẹ alọgọ yetọn, po awòyinú po.

¹⁰ Whédo Aalọn tọn emi, mì dotudo OKLUNỌ go, Ewọ wẹ alọgọ yetọn po awòyinú yetọn po.

¹¹ Mì dotudo OKLUNỌ go, mì he dibusi OKLUNỌ emi: Ewọ wẹ alọgọ yetọn po awòyinú yetọn po.

¹² OKLUNỌ ma wọnji mí go gba: É na dona mí; É na dona whédo Islaeli tọn; E na dona whédo Aalọn tọn.

¹³ E na dona yé he dibusi OKLUNỌ lọ, Pẹvi po daho po.

¹⁴ OKLUNỌ ni hẹn mì jideji susu, Mìwlẹ po ovi mítọn lẹ po.

¹⁵ Donanọ sọn OKLUNỌ de wẹ mìwlẹ, He da olọn po aigba po.

¹⁶ Olọn lẹ wẹ olọn OKLUNỌ ton lẹ: Ṣigba aigba wẹ é yi na ovi gbẹtọ lẹ tọn lẹ.

¹⁷ Osiọ lẹ ma pa OKLUNỌ, Kavi mẹdepope he jẹte yí aboẹninọ̀ mẹ;

¹⁸ Ṣigba miwlẹ na to OKLUNỌ lọ pa Sọn ojlẹ he mẹ kakadoidoi. Hallelujah.