PSALM 113 - BIBLU WIWE LỌ 1923

¹ HALLELUJAH. Mì mẹdagun OKLUNỌ tọn emi, Mì pa ẹ, mì pa oyín OKLUNỌ tọn.

² Oyín OKLUNỌ tọn ni yín donanọ Sọn ojlẹ he mẹ zònmí kakadoidoi.

³ Sọn whèzẹtẹn yì whèyihọ Oyín OKLUNỌ tọn wẹ yè ni to pipa.

⁴ OKLUNỌ tin yìaga hú akọta lẹpo, Gigo etọn sọ yìji hú olọn lẹ.

⁵ Mẹnu wẹ taidi OKLUNỌ Jiwheyẹwhe mítọn, He hẹn ede sinai to aga ji,

⁶ He huwhé ede Nado payi olọn po aigba po go?

⁷ É zé wamọnọ tite sọn kógudu mẹ, Bo sọ zé agbátọnọ sọn ogbóji;

⁸ Na é nido zé e sinai hẹ ahọvi lẹ, Yèdọ hẹ ahọvi omẹ etọn lẹ tọn.

⁹ E hẹn yọnnu wẹnsinọ nado pọ́n owhégbè go, Podọ nado yín onọ ayajẹnọ ovi lẹ tọn. Hallelujah.