PSALM 11 - BIBLU WIWE LỌ 1923

¹ OKLUNỌ mẹ wẹ yẹn fibẹ̀tado din te: Nawẹ mi wà dọ na mi, dọ, Hòawàwuyawuya di ohẹ́ yì osó towe ji aga?

² Do ayi e go, mẹylankan lẹ ko dọ̀n ogába yetọn sinyẹn; Yé ko jla ogá do to okàn go, Na yé nido yìn i to nuglọ do tenọglìnọ to ayiha mẹ lẹ.

³ Eyín dòdonu gble, Etẹ dódónọ lẹ na wà?

⁴ OKLUNỌ tin to tẹmpli wiwe etọn mẹ, Ofìn OKLUNỌ tọn tin to olọn mẹ: Nukun etọn to pinpọn, nukundama etọn to ovi gbẹtọ tọn lẹ whlepọ́n.

⁵ OKLUNỌ to dódónọ lẹ whlepọ́n: Ṣigba mẹylankan po omẹ he yiwanna adingbàndido po ayiha etọn gbẹwanna.

⁶ Do mẹylankan ji wẹ é na jà zokán zozo tọn do, Ozò po whèmí po, po oyú miyọnawu po, ehe wẹ na yín jlẹka yetọn.

⁷ Na OKLUNỌ dódónọ, é yiwanna dódó; Zọnlin jlọjlọnọ na pọ́n nukun etọn mẹ.