PSALM 109 - BIBLU WIWE LỌ 1923

¹ A NABỌẸ blo, Jiwheyẹwhe pipa ṣie È,

² Na onù mẹylankan tọn, podọ onù mẹklọtọ lẹ tọn kẹ̀ do oji e, Yé ko yí odẹ́ lalo tọn do dọhó hlan mi.

³ Yé yí ohó wangbẹnamọ tọn do lẹhla mi pé; Bo sọ to avùnhò hẹ mi mahuwhẹ.

⁴ Na owanyi ṣie mẹslẹtọ ṣie yé yín; Ṣigba yẹn jo dè hlan odẹ̀.

⁵ Yé vi oylan do suahọ dagbe tọn mi, Wangbẹna na owanyi ṣie.

⁶ Dè mẹylankan do e ji: Bo sọ gbọ mẹslẹtọ ni ṣite to adusilọ etọn mẹ

⁷ Whenuena yè dawhẹ́ etọn, gbọ é ni tọ́n whẹgbledonọ jẹgbonu; Bo sọ gbọ odẹ̀ etọn ni lẹzùn ylando.

⁸ Gbọ azán etọn ni whète; Bo sọ gbọ mẹdẽvo ni yí ogán etọn.

⁹ Gbọ ovi etọn ni yín tọ́ṣiọvi, Na asi etọn ni yín asuṣiọsi.

¹⁰ Gbọ ovi etọn lẹ ni yín dànpetọ, nuwhedutọ: Bo gbọ yé ni to núdùdù yetọn dinpe sọn whéto yetọn lẹ mẹ to aigba dẽvo ji,

¹¹ Gbọ akuẹnọ lọ ni wle onú he é tindo lẹpo; Bo sọ gbọ ojonọ lọ ni yí azọ́n etọn do dugbànna.

¹² A dike mẹde tin! nado hẹn dagbewanyi dote hlan ẹn blo: A sọ dike mẹde tin nado walẹblanuna tọ́ṣiọvi etọn lẹ blo.

¹³ Gbọ yè ni sán whẹndo etọn sẹ̀; Podọ to whẹndo he ja mẹ, gbọ yè ni súnsún oyín yetọn sẹ̀.

¹⁴ Gbọ ylando otọ́ etọn lẹ tọn ni yín finflin to OKLUNỌ de: A sọ dike yè súnsún ylando onọ etọn tọn sẹ̀ blo.

¹⁵ Gbọ yé ni tin to nukọn OKLUNỌ tọn jeijei, Na é nido sán oflin yé tọn sọn aigba ji.

¹⁶ Na ewọ ma flin nado wà dagbewanyi wutu, Ṣigba bo to homẹkẹndo wamọnọ po agbátọnọ po, Po ayigbadonanọ po, na é nido hù yé.

¹⁷ Nugbo, é yiwanna dẹ́hodo, é sọ wá e de: Homẹ etọn ma hùn to didona mẹ, é sọ tin to aganu nó.

¹⁸ Di awù etọn é yí dẹ́hodo ga do ṣinyọ̀navọ̀na ede, É sọ biọ ohò etọn mẹ wá taidi osìn, Podọ taidi amì to ohú etọn lẹ mẹ.

¹⁹ Gbọ é ni yín hlan ẹn di avọ̀ he é yí ṣinyọn ede, Podọ na homẹbla he é do nọ blahomẹ whepoponu.

²⁰ Mì gbọ ehe ni yín ale mẹslẹtọ ṣie lẹ tọn sọn OKLUNỌ de, Po omẹ he to oylan hódọ do ayiha ṣie go lẹ po tọn.

²¹ Ṣigba hiẹ ni zán hẹ mi, JIWHEYẸWHE OKLUNỌ E, na oyín towe wutu: Na dagbe wẹ dagbewanyi towe wutu: whlẹn mi.

²² Na wamọnọ, agbátọnọ wẹ yẹn, Ayiha ṣie sọ hòalan to ohò ṣie mẹ.

²³ Yẹn yìyì taidi oyẹ́ whenuena é diẹn jẹgbonu; Yè mì mi dlẹn di owẹ́n.

²⁴ Kligonu ṣie nọ whàn na nùbibla wutu; Agbasalan ṣie húliwhan, é ma tindo ojo de.

²⁵ Yẹn sọ lẹzùn ovlẹ na yé ga, Whenuena yé mọ mi, yé mimí ota yetọn.

²⁶ OKLUNỌ E Jiwheyẹwhe ṣie, gọalọna mi; Ṣó whlẹn mi kẹdẹdi dagbewanyi towe:

²⁷ Na yé nido yọnẹn dọ alọ towe wẹ ẹhe: Dọ hiẹ, OKLUNỌ, wẹ basi i.

²⁸ Gbọ yé ni to dẹ́hodo, ṣigba hiẹ ni to didona: Whenuena yé tite, winyan na hù yé; sigoa gbọ devi towe ni to ayajẹ.

²⁹ Gbọ yè ni yí yẹyimatin do ṣiyọnavọna mẹslẹtọ ṣie lẹ, Bo sọ gbọ yé ni yí winyan yetọn titi ṣinyọn yéde di avọ̀.

³⁰ Yẹn na yí onù ṣie do dopẹ́na OKLUNỌ talala; Nugbo, yẹn na nọ pa ẹ to mẹsusu ṣẹnsẹn;

³¹ Na e na ṣite to adusilọ agbátọnọ tọn mẹ, Nado whlẹn ẹn sọn omẹ he to whèdana ayiha etọn lẹ si.