PSALM 108 - BIBLU WIWE LỌ 1923

¹ JIWHEYẸWHE È, ayiha ṣie ko wleawu; Yẹn na jihàn bo sọ na pipa, yèdọ po gigo ṣie po.

² Fọ́n, asiazọ́n hànjinu po ajalẹn po: Yẹn lọsu na fọ́n afọnnufu.

³ OKLUNỌ E, yẹn na pa we to gbẹtọ lẹ ṣẹnsẹn: Yẹn nasọ jihàn pipa lẹ hlan we to akọta lẹ ṣẹnsẹn.

⁴ Na dagbewanyi towe yín kiklo yìagahú olọn lẹ: Nugbo towe sọ jẹ aslọ lẹ de.

⁵ Yín zizẹdaga to olọn lẹ ji, Jiwheyẹwhe E, Podọ gigo towe to aigba lẹpo ji;

⁶ Na yé nido whlẹn mẹyiwanna towe: Yi adusilọ towe do whlẹngan, bo sọ siọ mi.

⁷ Jiwheyẹwhe ko dọhó to owàlọwiwe etọn mẹ, dọ, Yẹn na doawagun: Yẹn na má Ṣekẹmi, bo sọ jlẹ agbàdò Sukọti tọn.

⁸ Ṣie wẹ Gileadi; ṣie wẹ Manasẹ; Eflaimi ga wẹ nuglonu ota ṣie tọn; Juda wẹ ogánpò ṣie.

⁹ Moabi wẹ awulẹzén ṣie; Edọmi ji wẹ yẹn na dè afọpa ṣie gbọn: Filistia ji wẹ yẹn na jaya homẹhùnhùn tọn te.

¹⁰ Mẹnu wẹ na hẹn mi biọ otòdaho dòkọnọ lọ mẹ? Mẹnu wẹ na plan mi yì Edọmi?

¹¹ Bé hie ma na, Jiwheyẹwhe È, he ko zé mí dlangbe, Bo ma sọ jẹgbonu yì hẹ awhànpa mítọn lẹ?

¹² Na alọgọ mí to tukla mẹ: Na ovọ́ wẹ alọgọ gbẹtọ tọn.

¹³ Gbọn alọ Jiwheyẹwhe tọn mẹ wẹ mí na wàdan; Na ewọ wẹ mẹhe na tùnafọ mẹglatọ mítọn lẹ ji.