PSALM 107 - BIBLU WIWE LỌ 1923

OWÉ 5.

¹ MÌ na opẹ́ hlan OKLUNỌ; na yínyọ́n wẹ ewọ: Na dagbewanyi etọn to ote kakadoi.

² Mì gbọ mẹfligò OKLUNỌ tọn lẹ ni dọ mọ, Mẹhe é fli sọn alọ mẹglatọ lọ tọn mẹ;

³ Bo sinyan yé sọn aigba lẹ ji, Sọn whèzẹtẹn podọ sọn whèyihọ̀, Sọn agewaji podọ sọn hùwaji.

⁴ Yé to dindanpe to ozùngbo mẹ, to aliho figbògbé tọn ji; Yé ma mọ otòdaho fininò tọn de.

⁵ Hùvé to yé hù, ovẹ́ to yé hú, Ayiha yetọn kuṣiọ to yé homẹ.

⁶ Whenẹnu wẹ yé dawhá hlan OKLUNỌ to tukla yetọn mẹ, Ewọ sọ whlẹn yé sọn nukunbibia yetọn lẹ mẹ.

⁷ E do yé ga gbọn aliho jijlọ ji, Na yé nido yì otòdaho fininò tọn de mẹ.

⁸ Só gbẹtọ do nọ pa OKLUNỌ na dagbewanyi etọn, Podọ na azọ́n jawujawu etọn lẹ hlan ovi gbẹtọ lẹ tọn lẹ!

⁹ Na é hẹn onú pékòna ayiha he to nújlo, Bo sọ yí dagbe do gọhò na ayiha he hùvé to hùhù.

¹⁰ Omẹ hunkọ he sinai to zinvlu me, Podọ to zinvlu gọ́ngọ́n mẹ he yè sín do nukunbibia po ogàn po mẹ;

¹¹ Na yé ṣiatẹ hẹ ohó OKLUNỌ tọn, Bo sọ vlẹ ohónamẹ Gigogán tọn wutu:

¹² Enẹwutu wẹ é yí oyà do hẹn ayiha yetọn huwhé; Yé jai, omẹ he na gọalọ de ma sọ tin.

¹³ Whenẹnu wẹ yé dawhá hlan OKLUNỌ, to tukla yetọn mẹ, É bọ whlẹn yé sọn nukunbibia yetọn lẹ mẹ.

¹⁴ É hẹn yé tọ́n sọn zinvlu mẹ podọ sọn zinvlu gọ́ngọ́n mẹ, Bo sọ wẹ́n ogàn yetọn gidigidi.

¹⁵ Ṣó gbẹtọ do nọpa OKLUNỌ na dagbewanyi etọn, Podọ na azọ́n jawujawu etọn lẹ hlan ovi gbẹtọ lẹ tọn lẹ!

¹⁶ Na é gbà hòngbo ogànvẹ̃ tọn lẹ, Bo sọ sán opatin ogàn tọn lẹ sọn ṣẹnsẹn.

¹⁷ Oklenọ lẹ na aliho sẹ́nmẹjẹ tọn yetọn wutu, Podọ na ylando yetọn lẹ tọn wutu, nukun to yé bia.

¹⁸ Ayiha yetọn gbéna núdùdù alọpa depope tọn; Yé sọ sẹpọ́ hòngbo okú tọn lẹ.

¹⁹ Whenẹnu wẹ yé dawhá hlan OKLUNỌ to tukla yetọn mẹ, É sọ whlẹn yé sọn nukunbibia yetọn lẹ mẹ.

²⁰ E do ohó etọn hlan, bo hẹn azọ̀n yetọn gbọ na yé, Bo sọ whlẹn yé sọn vàsúdo yetọn mẹ.

²¹ Ṣó gbẹtọ do nọ pa OKLUNỌ na dagbewanyi etọn, Podọ na azọ́n jawujawu etọn lẹ hlan ovi gbẹtọ lẹ tọn lẹ!

²² Mì gbọ yé ni sánvọ́ opẹ́ tọn Bo sọ yí ohàn ayajijẹ tọn do la azọ́n etọn lẹ.

²³ Yé omẹ he nọ jẹte yì ohù mẹ to ohún mẹ lẹ, He nọ wàzọ́n to osìn daho lẹ me;

²⁴ Ehelẹ̃ mọ azọ́n OKLUNỌ tọn Po nujawujawu etọn lẹ po to dòsisosiso mẹ.

²⁵ Na é degbè, bo hẹn oyú jẹhọn tite, Ehe zé agbowhẹn etọn lẹ daga.

²⁶ Yé hẹji yì aga, yé sọ jẹte yì osédò lẹ mẹ; Ayiha yetọn yé na tukla tọn wutu.

²⁷ Yé to sàmu yìgodo yìnukọn, bo sọ to ahlida taidi ahannumunọ de, Yè sọ hẹn nuyọnẹn yetọn lẹpo tlọ.

²⁸ Whenẹnu wẹ yé dawhá hlan OKLUNỌ to tukla yetọn mẹ, É sọ hẹn yé tọn sọn nukunbibia yetọn lẹ mẹ.

²⁹ É hẹn oyú hùwhé. Mọwẹ agbowhẹn etọn lẹ sọ doalọte.

³⁰ Whenẹnu wẹ homẹ yaton hùn, na yè hẹn yé nabọẹ wutu; Mọwẹ é hẹn yé jẹ otòpa, ojlo yetọn tọn.

³¹ Ṣó gbẹtọ do nọ pa OKLUNỌ na dagbewanyi etọn, Podọ na azọ́n jawujawu etọn lẹ hlan ovi gbẹtọ lẹ tọn lẹ.

³² Mì gbọ yé ni zé e daga to agùn gbẹtọ lẹ tọn mẹ, Bo sọ pa ẹ to aisintẹn mẹho lẹ tọn mẹ.

³³ É diọ otọ̀ zùn ozùngbo de, Bo sọ diọ asisanuvo zùn aigba húhu de;

³⁴ Aigba sinsẹ́nnọ zùn zùngbo yigba véjẹ́, Na kanyinylan omẹ he nọnọ̀ e mẹ lẹ tọn wutu.

³⁵ É diọ ozùngbo de zùn otando osìn tọn de, Bo sọ hẹn aigba húhú de zùn asisanuvo.

³⁶ Finẹ wẹ é hẹn huvẹtọno sinai do, Na yé nido wleawu otòdaho fimno tọn de;

³⁷ Nado nọ donu do oglè mẹ, bo do vẹ̃ngle, Bo tindo na yé sinsẹ́n jideji tọn.

³⁸ E dona yé ga, sọmọ bọ yé jìgba susu; E ma sọ dike kanlin yetọn lẹ ni depò.

³⁹ Yé depò bo sọ dó na awusinsinyẹn, Nukunbibia, po awúbla po wutu.

⁴⁰ É kọ̀n ovlẹko do ahọvi lẹ ji, Bo sọ hẹn yé danpe to ogbògbé lọ mẹ, fie aliho de ma tin te.

⁴¹ Gánso é zé agbátọnọ de daga sọn nukunbibia mẹ, Bo sọ basi whédo nẹ̃ taidi lẹngbọpa de.

⁴² Dódónọ lẹ na mọ ẹn, bo jaya: Ylando lẹpo na bọnù etọn do.

⁴³ Mẹdepope he yin nuyọnẹntọ, ewọ wẹ na doayi onú helẹ go, Bo na tunwun dagbewanyi OKLUNỌ tọn.