PSALM 104 - BIBLU WIWE LỌ 1923

¹ DONA OKLUNỌ, hiẹ ayiha ṣie. OKLUNỌ È, Jiwheyẹwhe ṣie, hiẹ klo gbahúgbahú, Yẹyi po gigodaho po wẹ hiẹ do ṣinyọnavọ̀.

² Mẹhe yí hinhọ́n do ṣinyọn dewe di avọ̀: Mẹhe dlẹn olọn lẹ taidi avọ̀dido.

³ Mẹhe do zatin abò etọn tọn to osìn mẹ: Mẹhe yí aslọ do basi kẹkẹ etọn: Mẹhe nọ zinzọnlin to awà jẹhọn tọn ji:

⁴ Mẹhe yí jẹhọn do basi mẹdagun etọn, Bo sọ yí ozolọ do basi lizọnyítọ etọn lẹ.

⁵ Ewọ ko do aihọn ai do dòdó etọn ji, Bọ é ma nado yín tẹnsẹna gbèdegbède.

⁶ Hiẹ yí osédò ṣinyọn e ji taidi avọ̀: Osìnsọ nọte to aga na osé lẹ.

⁷ To wọhẹ towe mẹ, yé fọ́nyì: To ogbẹ̀ osò towe tọn mẹ, yé yawu yi;

⁸ (Osó lẹ yì aga; tando lẹ whẹ;) Yì ofi he hiẹ ko dèdai na yé.

⁹ Hiẹ ko dè agbó de he yé ma sọgan dasa; Bọ yé ma nado lẹ́ nado ṣinyọn aihọn ji gba.

¹⁰ E do tọ̀sisa hlan tando lẹ mẹ; Yé to sisa to osé lẹ ṣẹnsẹn.

¹¹ Yé to osìn na kanlin ozùnmẹ tọn lẹpo: Kẹtẹkẹtẹ ogbé mẹ tọn lẹ sọ to nugbla yetọn hù.

¹² To ye dali wẹ ohẹ́ he to aga lẹ tindo fininò yetọn te; Yé nọ to hànji to atinla lẹ ṣẹnsẹn.

¹³ Ewọ to sinhu osé lẹ sọn abò etọn mẹ; Yè sọ yí sinsẹ́n azọ́n towe lẹ tọn do pékòna aigba.

¹⁴ Ewọ hẹn ogbé wu na kanlin lẹ, Oma, na sinsẹ̀n gbẹtọ tọn; Na é nido hẹn núdùdù jẹgbonu sọn aigba mẹ,

¹⁵ Podọ na ovẹ̃n nido hẹn ayiha gbẹtọ tọn homẹhùn: Na é nido yí amì do hẹn nukunmẹ etọn nado nọ sẹ́, Podọ na núdùdù nido hẹn ayiha gbẹtọ tọn gla.

¹⁶ Yè do pekò na atin OKLUNỌ tọn lẹ; Kedali Lẹbanọni tọn lẹ, he ewọ ko do;

¹⁷ Fie ohẹ̀ le nọ wà adọ́ yetọn lẹ do: Eyín adọ̀we tọn, filìtin lẹ wẹ owhé eton gbè.

¹⁸ Osó he yìaga lẹ tin na otẹgbọẹ lẹ; Osó lẹ wẹ fibẹ̀tado de na azui lẹ.

¹⁹ Ewọ dè osùn na ojlẹ: Owhè sọ yón odò yìyì etọn.

²⁰ Hiẹ basi zinvlu, ozan wẹ; Ehemẹ okanlin ozùnmẹ tọn lẹ nọ to lìnlìn jẹgbonu sọn.

²¹ Kinnikinni ovu lẹ nọ to gbigbó do nuyànwẹnna yetọn ji, Bo sọ nọ to núdùdù yetọn din sọn Jiwheyẹwhe de.

²² Owhè klẹn, yé bé yéde plidopọ, Bo mlọnai to odọ̀ yetọn me.

²³ Gbẹtọ tọ́n yì azọ́n etọn kọ̀n, Podọ yì magbọjẹ etọn kọ̀n kaka jẹ whèjai.

²⁴ Na azọ́n towe sù do le, OKLUNỌ E! Nuyọnẹn mẹ wẹ hiẹ basi yé omẹ pó te: Aigba gọ́ na nutindo towe.

²⁵ Ohù lọ tin nukọndọn, kiklo gbigblo, Ehemẹ onú he nọ lìn madosọha te, Kanlin pẹvipẹvi po dahodaho lẹ po.

²⁶ Finẹ wẹ ohún lẹ nọ gbòn yì: Finẹ wẹ lẹviatani nẹ te, he hiẹ da nado nọ daihún to e mẹ.

²⁷ Ehelẹ̃ pó nọte to pinpọ́n we; Na hiẹ nido na núdùdù yetọn yé to ojlẹ etọn mẹ.

²⁸ Hiẹ na hlan yé, yé bẹ́: Hiẹ kẹ́ alọ towe, yè yí onú dagbe do pékòna yé.

²⁹ Hiẹ sọ nukunmẹ towe whlá, tuklapla yé; Hiẹ yí gbọfufu yetọn, yé kú, Bo sọ gọ̀ do okógudu yetọn de.

³⁰ Hiẹ do gbigbọ towe hlan, yè da yé: Hiẹ sọ hẹn aigba nukunmẹ jeyọ́yọ́.

³¹ Gigo OKLUNỌ tọn ni denai kakadoi: OKLUNỌ ni to ayajẹ to azọ́n etọn lẹ mẹ:

³² Mẹhe pọ́n aigba, bọ é sisọ: É soalọ osé lẹ, yé sọ tiazọ̀.

³³ Yẹn na to hànji hlan OKLUNỌ sọle yẹn tin to ogbẹ́ dẹn sọ: Yẹn na to pipa hànji hlan Jiwheyẹwhe ṣie whenuena yẹn tin to ogbẹ̀.

³⁴ Gbọ ayihamẹlẹnpón ṣie ni yín vivi hlan ẹn: Yẹn na nọ jaya to OKLUNỌ mẹ.

³⁵ Mì gbọ ylandonọ lẹ ni súdo sọn aigba ji, Mì dike mẹylankan lẹ tin ba blo. Dona OKLUNỌ, hiẹ ayiha ṣie. Hallelujah.