PSALM 103 - BIBLU WIWE LỌ 1923

¹ DONA OKLUNỌ, hiẹ ayiha ṣie: mì sọ pa oyín wiwe etọn, mì: onú he tinito ohò ṣie mẹ lẹpo emi.

² Dona OKLUNỌ, hiẹ ayiha ṣie, A wọn dagbe etọn lẹ blo:

³ Mẹhe jo ylando towe lẹpo na we; mẹhe hẹn azọ̀n towe lẹpo gbọ.

⁴ Mẹhe fli ogbẹ́ towe sọn odọ̀ mẹ: Mẹhe yí dagbewanyi po lẹblanu bibọ po do ṣinyọn ojẹgbakun na we;

⁵ Mẹhe yí onú dagbe lẹ do pékòna onù towe; Sọmọ bọ ovu towe jẹyóyó taidi akùn lọ.

⁶ OKLUNỌ hen owalọ dódónọ lẹ Po whẹ̀dida po ṣẹ na omẹ yè bianukunna lẹ.

⁷ E hẹn aliho etọn zùn yinyọnẹn hlan Moṣe, Owalọ etọn lẹ hlan ovi Islaeli tọn lẹ

⁸ Lẹblanunọ, dagbenọ wẹ OKLUNỌ, é whleawu nado sadi, Podọ susunọ to dagbewanyi mẹ

⁹ É ma na yí whepoponu do wọhẹmẹ: Mọ é ma na yí adì etọn whlá kakadoi gba.

¹⁰ E ma wà hẹ mí kẹdẹdile ylando mítọn te gba; Mọ é ma sọ na ale mí kẹdẹdi oylanwiwà mítọn.

¹¹ Na le olọn yìaga hú aigba do, Sọmọ wẹ dagbewanyi etọn hlan omẹ he dibusi i lẹ dali.

¹² Dile whèzẹtẹn dẹ́n do whèyihọ do, Dẹ̀n sọmọ wẹ ewọ do zé sẹ́nmẹjẹ mítọn yì dẹ́n sọn mí de.

¹³ Taidile otọ́ de nọ blawuna ovi etọn lẹ do, Mọwẹ OKLUNỌ nọ blawúna yé he dibusi i lẹ do.

¹⁴ Na ewọ yón dida mítọn; É sọ flin dọ okógudu wẹ mí.

¹⁵ Gbọn gbẹtọ tọn dali, azán etọn lẹ taidi ogbé; Taidi võvo danji tọn, mọwẹ é vùn do.

¹⁶ Na jẹhọn jugbọn e ji, é ma tin ba: Otẹn etọn ma nasọ yón ẹn gbède ba.

¹⁷ Ṣigba dagbewanyi OKLUNỌ tọn tin sọn madopodo jẹ madopodo to omẹ he dibusi i lẹ ji, Dódó etọn hlan ovi ovi lẹ tọn;

¹⁸ Hlan omẹ mọtọnnkọ he yìn alẹ́nu etọn, Podọ hlan omẹ nẹlẹ̃ he flin ogbèdai etọn lẹ nado nọ basi yé.

¹⁹ OKLUNỌ ko hẹn ofìn etọn lódo to olọn lẹ mẹ; Ahọludu etọn dugán to onú popo ji.

²⁰ Mì dona OKLUNỌ, mì angẹli etọn lẹ emi; Mì hlọnhlọnnọ to huhlọn mẹ lẹ emi, he to ohó etọn basi, He to tótunai hlan ogbẹ̀ ohó etọn tọn.

²¹ Mì dona OKLUNỌ, mì awhàn etọn lẹ emi; Mì devizónwàtọ etọn lẹ, he to homẹ hùnnú etọn wà lẹ.

²² Mì dona OKLUNỌ, mì azọ́n etọn lẹpo, to ofi ahọludutẹn etọn te lẹpo mẹ: Dona OKLUNỌ hiẹ ayiha ṣie.