PSALM 102 - BIBLU WIWE LỌ 1923

Odẹ̀ awúblanọ tọn de, whenuena é kusiọ bo sọ kọ̀n whẹgbè etọn dai do OKLUNỌ nukọn.

¹ OKLUNỌ È, sè odẹ̀ ṣie, Bo sọ gbọ awhá ṣie ni wá de we

² A yí nukunmẹ towe whlá sọn dẽ azán he gbè yẹn tin to tukla mẹ blo: Dotó towe ai hlan mi; To azán he gbè yẹn dawháylọ, siọ mi plaun.

³ Na azán ṣie lẹ to súsúdo di azọ̀, Yè sọ fiọ ohú ṣie lẹ di zòpómiyọn.

⁴ Yè ho ayiha ṣie di ogbé, é sọ yọ́; Na yẹn wọnji nado dù niídùdù ṣie.

⁵ Gbọn ogbè winwẹn ṣie tọn dali ohú ṣie tẹ́ do olan ṣie go.

⁶ Yẹn tin taidi apofó zùngbomẹ tọn de; Yẹn tin lẹzun taidi ajankusu figbọ́gbé tọn de.

⁷ Yẹn tò awuhọ, Bo sọ tin lẹzùn taidi awájihẹ́ he tin gánná to ohòta aga de.

⁸ Kẹntọ ṣie lẹ to vivlẹ mi to azán lẹpo gbè; Yé he yín alẹdatọ do ogo e lẹ to oyín ṣie ylọ do to dẹ́hodomẹ.

⁹ Na yẹn ko dù afín taidi núdùdù, Bo sọ yí dasìn do flusọ núnùnù ṣie:

¹⁰ Na kàndudu towe po homẹgble towe po wutu: Na hiẹ ko zé mi daga, bo sọ zé mì dlangbé.

¹¹ Azán ṣie lẹ tin taidi oyẹ́ he yè dogana de; Yẹn sọ yé taidi ogbé.

¹² Ṣigba hiẹ, OKLUNỌ È, na tin kakadoi: Podọ oflin towe hlan whẹndo lẹpo mẹ.

¹³ Hiẹ na tite, bo tindo lẹblanu to Ziọni ji: Na ojlẹ só nado tindo awúbla to e ji, nugbo, ojlẹ he yè dè lọ sọ̀.

¹⁴ Na devi towe lẹ yí homẹhùnhùn to zannu etọn lẹ mẹ, Bo sọ tindo awúbla to kógudu etọn ji.

¹⁵ Mọwẹ kosi lẹ na dibusi oyín OKLUNỌ tọn, Ahọlu aihọn mẹ tọn lẹpo nasọ dibusi gigo towe.

¹⁶ Na OKLUNỌ ko zé Ziọni dote, Ewọ ko sọawúhia to gigo etọn mẹ.

¹⁷ Odẹ̀ agbátọnọ lẹ tọn ewọ ko hopón, E ma ko vlẹ odẹ̀ yetọn gba.

¹⁸ Yè na wlan ehe na whẹndo he ja lọ: Gbẹtọ he yè na da de na to OKLUNỌ pa.

¹⁹ Na é ko pọ́n hlan odẹ̀ sọn aga fiwiwe etọn tọn mẹ wá; OKLUNỌ dekọ̀pọ́n aihọn sọn olọn mẹ;

²⁰ Nado sè winwẹn gàntọ tọn: Nado tún visunnu okú tọn lẹ dote;

²¹ Na gbẹtọ lẹ nido lá oyín OKLUNỌ tọn to Ziọni mẹ, Podọ pipa etọn to Jelusalẹm mẹ;

²² Whenuena yè dọ̀n gbẹtọ le plidopọ, Po ahọludu lẹ po, nado sẹ̀n OKLUNỌ.

²³ Ewọ dè huhlọn ṣie pò to aliho; É hẹn azán ṣie whègli.

²⁴ Yẹn dọmọ, A dè mi sẹ́ to ṣẹnsẹn azán ṣie lẹ tọn mẹ blo, Jiwheyẹwhe ṣie È: Owhè towe tin whẹndo lẹpo mẹ.

²⁵ Sọn hóhó wẹ hiẹ ko do dòdó aihọn tọn ai; Olọn lẹ sọ wẹ azọ́n alọ towe nu tọn.

²⁶ Yé na và, ṣigba hiẹ na to ote: Nugbo, yé omẹ pó wẹ na dohó taidi avọ́: Di awù wẹ hiẹ na diọ yé, yé nasọ yín didiọ:

²⁷ Ṣigba doponẹ wẹ hiẹ, Owhè towe ma na tindo opòdo.

²⁸ Ovi devi tọwe lẹ tọn na to ote, Okún yetọn na yín hinhẹnlódo to nukọn towe.