PSALM 10 - BIBLU WIWE LỌ 1923

¹ OKLUNỌ E, etẹwutu wẹ hiẹ do ṣite to ola boboe? Etẹwutu wẹ hiẹ sọ dewe whlá to nukunbibia whenu?

² Sakla mẹ wẹ mẹylankan to oyanọ lẹ yandowezunji te: Núbibla he yé lẹn mẹ wẹ yè ni wle yé te.

³ Na mẹylankan to awagundo to ojlo ayiha etọn tọn mẹ, E to didona nukunkẹnnọ, aigba é to OKLUNỌ vlẹ.

⁴ Mẹylankan to sakla nukunmẹ etọn tọn, dọ, É ma to na kàn ẹn se: Linlẹn etọn lẹpo wẹ, Jiwheyẹwhe de ma tin.

⁵ Whanpẹ mẹ wẹ aliho etọn lẹ te whepoponu; Whẹ̀dida towe yìaga gbahú sọn nukun etọn mẹ: Kẹntọ etọn lẹpo go wẹ é to kikla do.

⁶ E ko dọ to ayiha etọn mẹ, dọ, Yè ma to na fọ́n mi sọn otẹn ṣie mẹ; Whẹndo ṣie ma to nukunbibia mẹ na nò.

⁷ Onù etọn gó na dẹ̀hodo, podọ na oklọ, podọ na avàdomẹ: Danúwiwà po ylankanwiwà po tin to odẹ́ etọn glọ.

⁸ E sinai to avatẹn tòpẹvipẹvi lẹ tọn mẹ; To fìwhiwhlá lẹ mẹ wẹ é to homẹvọnọ lẹ hù: Nukun etọn sọ to matinalọgọtọ lẹ hẹ́ to nuglọ.

⁹ E bẹ̀ do fìwhiwhlá mẹ di kinnikinni to núkan etọn mẹ: E tọwù nado wlé oyanọ: E sọ wlé oyanọ, whenuena é dón ẹn do odọ̀ etọn mẹ.

¹⁰ E bẹ̀ bo zín ede dai; Matinalọgọtọ lẹ sọ flẹ́ jẹ alọ sinsinyẹn etọn mẹ.

¹¹ E dọ tò ayiha etọn mẹ, dọ, Jiwheyẹwhe ko wọnji: E ko sọ nukun etọn whlá, é ma to na mọ ẹn gbède.

¹² Tite, OKLUNỌ È; Jiwheyẹwhe È, zé alọ towe yìaga: A sọ wọnji whiwhẹnọ go blo.

¹³ Etẹwutu wẹ mẹylankan to Jiwheyẹwhe vlẹ, Bo to didọ to ayiha etọn mẹ, dọ, Hiẹ ma to na kànse?

¹⁴ Hiẹ ko mọ ẹn: na hiẹ to danúwiwà po mẹbadu po pọ́n, nado yí alọ towe do suahọ etọn: Matinalọgọtọ yí ede dalọmẹ na we: Hiẹ wẹ alọgọtọ tósiọvi tọn.

¹⁵ Wén awà mẹylankan tọn, podọ na sunnu ylanylan nẹ tọn: Hiẹ ni zin jijọ kanyinylan etọn, kaka hiẹ ma na do mọ núde ba.

¹⁶ OKLUNỌ wẹ Ahọlu kakadoi: Kosi lẹ ko gbidi sọn aigba etọn ji.

¹⁷ OKLUNỌ, hiẹ ko sè ojlo whiwhẹnọ lẹ tọn: Hiẹ nasọ hẹn ayiha yetọn lódo, hiẹ na yí otọ́ towe do sè:

¹⁸ Nado dawhẹ́ tọ́ṣiọvi po mẹhe awú to sinsinyẹn tọn po, Na sunnu aihọn tọn ma na do hẹnmẹ sisọ ba.