OSỌHIA 1 - BIBLU WIWE LỌ 1923

¹ OSỌHIA Jesu Klisti tọn, he Jiwheyẹwhe na hlan ẹn nado dohia hlan afànumẹ etọn lẹ, onu he ma na nọ ma wá jọ to zándevie, é sọ domẹhlan bo do yé hia gbọn angẹli etọn dali hlan Johanu, mẹmẹglọ eton:

² mẹhe de kunnuna ohó Jiwheyẹwhe tọn, na okunnu Jesu Klisti tọn, podọ na onú he é mọ lẹpo.

³ Donanọ wẹ ewọ he to hihia, podọ ye he to ohó dọdai he tọn sè, bo sọ to onu he yè wlan do e mẹ lẹ yí hẹn: na whenu to sisẹpọ wutu.

⁴ JOHANU hlan agùn ṣinawe he tin to Asia lẹ: Ojomiọn po jijọho po hlan mì sọn e de wa mehe tin, bo ko tin, bo sọ ja; podọ son Gbigbọ ṣinawe he tin to ofìn etọn nukon lẹ de;

⁵ sọn Jesu Klisti de, mẹhe yín kunnudetọ nugbonọ lọ, omẹ plọnji sọn osiọ lẹ mẹ, ahọvi ahọlu aigba tọn lẹ ton. Hlan ewọ he yiwanna mí, bo so yí ohùn etọn do klọ mí sọn ylando mítọn le me,

⁶ bo sọ yí mí do doahọlu, bo sọ yi do do yẹwhenọ hlan Jiwheyẹwhe Otọ etọn; wẹ gigo po huhlọn po ni tin hlan owhenu owhenu lẹ lọ tọn lẹ. Niṣẹ.

⁷ Do ayi e go, é ja po aslọ po; nukun lẹpo we na mọ en, yé he sọwhan ẹn lẹ ga hennu aigba tọn lẹpo wẹ na blawu to e ji. Yèdọ mọwẹ. Niṣẹ.

⁸ Oklunọ dọmọ, Yẹn wẹ Alfa, yẹn wẹ Omẹga, bibẹ po, opòdo, mẹhe tin, bo ko tin, bo sọ ja, Ganhunupo.

⁹ Yẹn Johanu, mehe yín mẹmẹsunnu, ogbẹ mìtọn to nukunbibia mẹ, to ahọludu po homẹfa Jesu Klisti tọn po mẹ, tin to lopo he yè nọ ylọ Patimos ji, na oho Jiwheyẹwhe tọn, po okunnuho Jesu Klisti tọn po.

¹⁰ Yẹn tin to Gbigbọ mẹ to azán Oklunọ tọn gbè, bo sọ sè ogbè daho de to godo ṣie, di ogbè opèn de tọn,

¹¹ He to didọmọ. Yẹn wẹ Alfa, yẹn wẹ Omẹga, nukọntọ, godoto: podọ, Onu he hiẹ mọ, wlan ẹn do owẹ́ de mẹ, bo sọ ẹ dohlan agùn ṣinawe he tin to Asia lẹ; hlan Efesu, hlan Smana, hlan Pagamu, hlan Tiatila, hlan Sadi, hlan Filadẹlfia podo hlan Laodikea

¹² Yẹn sọ lẹgodo nado pọn ogbè he to hódọ hẹ mi. Whenuena yẹn lẹgodo, yẹn mọ zogbantin sika tọn ṣinawe;

¹³ to zogbántin ṣinawe lẹ lọ ṣẹnṣẹn, mẹde taidi Ovi gbẹtọ tọn, he yè ṣinyọn avọ he dite jẹ afọkọ na, bo sọ yí gbaja sika tọn do gbàn ano na.

¹⁴ Ota eton po odà eton po wé di sekanfún, yé we di kẹnsu; nukun etọn sọ di zodẹ́;

¹⁵ afọ etọn di ganvẹ dagbedagbe, di ehe yè kọn; to zohò mẹ; ogbè etọn sọ di ogbè osìn susu tọn.

¹⁶ E tindo sunwhlẹvu ṣinawe to adusilọ etọn mẹ: onù etọn mẹ wẹ ohi dida nuawenọ de tọ́n sọn: nukunmẹ etọn so di owhè he yí huhlọn etọn do vivẹ́.

¹⁷ Whenuena yẹn mọ ẹn, yẹn jẹklo to afọ etọn go di oṣiọ. E so yí adusilo etọn do oji e, bo to didọ hlan mi, dọ, A savo blọ Yẹn wẹ nukọntọ, godotọ:

¹⁸ yẹn we ogbẹ̀nọ lọ, yen sọ lẹzun oṣiọ; do ayi e go, yẹn sọ tin to ogbẹ kakadoi, Niṣẹ; yẹn sọ tindo họ̀nhùngan kútomẹ po okú po tọn.

¹⁹ Wlanwe onú he hiẹ mọ lẹ tọn, onú he tin, po onu he na jọ to ehegodo tọn po;

²⁰ nudabla sunwhlẹvu ṣinawe lẹ tọn he hie mọ to adusilọ ṣie mẹ, po sika zogbántin ṣinawe le tọn po. Sunwhlẹvu ṣinawe lẹ wẹ angẹli agùn ṣinawe lẹ tọn; podọ zogbántin ṣinawe he hiẹ mọ lẹ wẹ agùn ṣinawe lẹ.