Osọha lẹ 5 - BIBLU WIWE LỌ 1923

¹ OKLUNỌ lọ sọ dọhó hlan Moṣe, dọmọ,

² Degbèna ovi Islaeli tọn lẹ lọ dọ yé ni dè opòtọ́nọ lẹpo jegbonu sọn osla lọ mẹ, po omẹ depope he tindo sisà de po, po mẹdepope he yín mawé gbọn oṣiọ dali po:

³ sunnu po yọnnu po wẹ mì na dè jẹgbonu, gbonu osla lọ tọn mì na yí yé do; dọ yé flu osla yetọn blo, gblagbla ehetọn mẹ yẹn ninò.

⁴ Ovi Islaeli tọn lẹ lọ sọ wà mọ, bo yí yé do gbonu osla lọ tọn: le OKLUNỌ lọ dọhó hlan Moṣe do, mọwẹ ovi Islaeli tọn lẹ wà do.

⁵ Podọ OKLUNỌ lọ sọ dọhó hlan Moṣe, dọmọ,

⁶ Dọhó hlan ovi Islaeli tọn lẹ lọ dọmọ, Whenuena sunnusi de kavi yọnnusi na wà ylando de he gbẹtọ lẹ nọ wà, nado wà osẹ́nmẹjẹ de do OKLUNỌ lọ go, bọ alindọn nẹ yín whègbledono,

⁷ whenẹnu yé na yigbè ylando yetọn ton he yé ko wà: ewọ bo na basi ogòjo na whègbledo etọn to gigọ́ mẹ, bo sọ yí madatóntọ etọn dogó ẹ, bo yí i na hlan ewọ mẹhe tọn wutu ewo ko yín whegbledonọ.

⁸ Ṣigba eyín omẹ lọ ma tindo hẹnnumẹ de mẹhe ogòjó sọgan yín bibasi hlan na whègbledo lọ, ogòjó lọ na whègbledo he yè basi hlan OKLUNỌ lọ na yín yẹwhenọ lọ tọn; gọ́na agbò ovẹ̀se lọ tọn lọ, gbọn ehe dali ovẹ̀se na yín bibasi na ẹn.

⁹ Podọ avọ́nunina zizédlanga tọn lẹpo sọn onú wiwe ovi Islaeli tọn lẹ tọn lẹpo mẹ, he yé yíwá yẹwhenọ lọ de, ena yín etọn.

¹⁰ Podọ onú hihiọ omẹ dopodopo tọn na yín etọn: núdepope omẹ de na yẹwhenọ lọ, é na yin etọn.

¹¹ OKLUNỌ lọ sọ dọhó hlan Moṣe, dọmọ,

¹² Dọhó hlan ovi Islaeli tọn lẹ lọ, bo dọ hlan yé dọmọ, Eyín asi sunnu de tọn yì jẹla, bo wà osẹnmẹjẹ de hlan ẹn,

¹³ bọ sunnu de zán he ẹ, bọ é yín bibè sọn nukun asú etọn tọn mẹ, bo sọ yín whiwhla, bọ ewọ so yín fuflu, bọ kunnu-detọ de ma tin do e go, mọ ewọ ma sọ yín wìwle to owàlọ lọ mẹ gba;

¹⁴ bọ gbigbọ awuwhàn tọn wá e ji, bọ ewọ yín awuwhàntọ asi etọn tọn, bọ ewọ sọ yín fuflu: kavi eyín gbigbọ awuwhàn tọn wá e ji, bọ ewọ yín awuwhantọ asì etọn tọn, bọ ewọ ma yín fuflu gba:

¹⁵ whenẹnu wẹ sunnu lọ na hẹn asi etọn wá yẹwhenọ lọ de, bo na hẹn avọ́nunina etọn wá na ẹn, madaotọ efa linfìn bali tọn dopo; éwọ ma na kọ̀n amì de do e ji gba, kavi yí núwhẹnwán do e ji gba; na avọ́nunina jinulili awuwhàn tọn de wẹ, avọ́nunina jinulili oflinnu tọn de, hinhẹn oylankan wá je oflin mẹ.

¹⁶ Yẹwhenọ lọ na hẹn ẹn sẹ̀pọ, bo zé e do OKLUNỌ lọ nukọn:

¹⁷ yẹwhenọ lọ bo na yí osìn wiwe to nuzinzán òkònọ de mẹ; podọ yẹwhenọ lọ nasọ yí sọn kọgudu he tin to agbà gohọ̀túntún lọ tọn go, bo yí i dò osìn lọ mẹ:

¹⁸ yẹwhenọ lọ nasọ zé yọnnu lọ do OKLUNỌ lọ nukọn, bo gbọ odà ota yọnnu lọ tọn ni jẹ wòwó, bo sọ yí avọ́nunina jinulili oflinnu lọ tọn do alọ etọn lẹ mẹ, ehe yín avọ́nunina jinulili awuwhàn tọn lọ: yẹwhenọ lọ bo na tindo osìn ovivẹ́ tọn lọ to alọ etọn mẹ he hẹn dóhodo lọ wá:

¹⁹ yẹwhenọ lọ nasọ hẹn ẹn nado whle, bo nasọ dọ hlan yọnnu lọ dọ, Eyín sunnu de ma ko zán hẹ we gba, podọ eyín hiẹ ma ko yì jẹla jẹ mawé kòn gba, to mẹdevo de to otẹn asú towe tọn mẹ, hiẹ ni yín gingán sọn osìn ovivẹ́ tọn he si he hẹn dẹ́hodo lọ wá.

²⁰ Ṣigba eyin hiẹ ko yi jẹla, to mẹdevo de to otẹn asu towe tọn mẹ, podọ eyín hiẹ yín fuflu, bọ sunnu de ko zán hẹ we gọ́na asu towe:

²¹ whenẹnu yẹwhenọ lọ na hẹn yọnnu lọ yí whiwhle opadido tọn do whle, yẹwhenọ lọ bo nasọ dọ hlan yọnnu lọ dọ, OKLUNỌ lọ ni hẹn we zùn opadido de po whiwhle de po to omẹ towe lẹ ṣẹnṣẹn, whenuena OKLUNỌ lọ hẹn asapada towe yọ̀n, podọ ohòto towe nado ji;

²² podọ osìn he ehe hẹn dẹ̀hodo lọ wá na biọ adọ̀ towe mẹ yì, bo hẹn ohòto towe nado ji, podọ asapada towe nado yọ̀n: yọnnu lọ bo nasọ dọ, Niṣẹ, Niṣẹ.

²³ Yẹwhenọ lo bo na wlan dẹ̀hodo helẹ do owé de mẹ, e bo na klọ́ yé do osìn ovivẹ́ tọn lọ mẹ:

²⁴ podọ ewọ nasọ hẹn yọnnu lọ nù osìn ovivé tọn lọ he hẹn déhodo lọ wá: osìn he hen dóhodo lọ wá nasọ biọ ohò etọn me bo sọ lezùn vivé.

²⁵ Yewhenọ lọ bo na yí avọ́nunina jinulili awuwhàn tọn lọ sọn alọ yọnnu lọ tọn mẹ, bo na zé avọ́nunina jinulili lọ hia to OKLUNỌ lọ nukọn, bo sọ hen ẹn wá jẹ agbà lọ kòn:

²⁶ yẹwhenọ lọ bo na yí alọgogo dopo sọn avọ́nunina jinulilì lọ mẹ, di oflinnú etọn lọ, bo mè ẹn to agbà lọ ji, podọ to enẹgodo na hẹn yọnnu lọ nù osìn lọ.

²⁷ Podọ whenuena ewọ ko hẹn ẹn nù osìn lọ, whenẹnu é na wá jọ, eyín ewọ yín fuflu, bo ko wà osẹ́nmẹjẹ de do asú etọn go, wẹ osìn lọ he hẹn dẹ̀hodo lọ wá na biọ ohò etọn mẹ bo sọ lẹzùn vivé, ohòto etọn bo na ji, asapada etọn bo na yón: yọnnu lọ bo na yín dẹ̀hodo de to omẹ etọn lẹ ṣẹnṣẹn.

²⁸ Podọ eyín yọnnu lọ ma yín fuflu gba, ṣigba yín wiwe; whenẹnu ewọ na yín gingan, bo na mọhò.

²⁹ Ehe wẹ osẹ́n awuwhàn tọn lọ, whenuena asi de, yì jẹla to mẹdevo de to oten asú etọn tọn mẹ, bo yín fuflu;

³⁰ kavi whenuena gbigbọ awuwhàn tọn lọ wá sunnu de ji, bọ ewọ yín awuwhàntọ do asi etọn ta; whenẹnu wẹ é na zé yọnnu lọ do OKLUNỌ lọ nukọn, yẹwhenọ lọ bo na hẹn osẹ́n he lẹpo sẹ to e ji.

³¹ Sunnu lọ bo na yín gingán sọn oylankan mẹ, yọnnu lọ bo na zé oylankan etọn hẹn.