Osọha lẹ 35 - BIBLU WIWE LỌ 1923

¹ OKLUNỌ lọ so dọhó hlan Moṣe to dànfáfá Moabi tọn lẹ lọ ji to Jọdani dali to Jẹliko, dọmọ.

² Degbèna ovi Islaeli tọn lẹ lọ, dọ yé ni na sọn ogú tòdaho nútindo yetọn lẹ tọn mẹ hlan Levinu lẹ nado nọnọ̀ e mẹ; podọ agbègbeji na tòdaho lẹ lọ lẹ́do yé pé wẹ mì na na hlan Levinu lẹ lọ.

³ Podọ tòdaho lẹ wẹ yé na tindo nado nọnọ̀ e mẹ; podọ agbègbeji yetọn lẹ na tin na kanlinyìnyìn yetọn lẹ, podọ na agbàn yetọn lẹ, podọ na kanlin yetọn lẹ.

⁴ Podọ agbègbeji tòdaho lẹ lọ tọn lọ, he mì na na hlan Levinu le lọ, na yín sọn adó tòdaho lọ tọn go podọ hlangbonu awàgba fọtọ́n lẹdo pé.

⁵ Mì bo nasọ jlẹ to gbonu tòdaho lọ tọn awàgba fọtọ́n awe na awà whèzẹtẹn tọn lọ, podọ awàgba fọtọ́n awe na awà huwaji tọn, podọ awàgba fọtọ́n awe na awà whèyìhọ tọn, podọ awàgba fọtọ́n awe na awà agewaji tọn, tòdaho lọ tintin to ṣẹnṣẹn. Ehe na yín agbègbeji tòdaho lẹ lọ tọn hlan yé.

⁶ Podọ tòdaho he mì na na hlan Levinu lẹ lọ, yé na yín tòdaho ṣidopo fibẹ̀tado tọn, he mì na na na mẹsihùtọ lọ nado nọ họ̀nyì finẹ; podọ mì nasọ na tòdaho kandenukunawe dogò yé.

⁷ Tòdaho he mì na na hlan Levinu lẹ pó na yín tòdaho kandeẹinatòn: yé wẹ mì na yína po agbègbeji yetọn lẹ po.

⁸ Podọ gbọn tòdaho lẹ lọ tọn dali he mì na na sọn nútindo ovi Islaeli tọn lẹ lọ tọn mẹ, sọn susu lọ mẹ mì na yí suhu; podọ sọn vude mẹ mì na yi vude: omẹ dopodopo kẹdẹdi ogú etọn he é do yígú na na sọn tòdaho etọn lẹ mẹ hlan Levinu lẹ lọ.

⁹ OKLUNỌ lọ SỌ dọhó hlan Moṣe, dọmọ,

¹⁰ Dọhó hlan ovi Islaeli tọn lẹ lọ, bo dọ hlan yé dọmọ, Whenuena mì juyì Jọdani gododọ̃n jẹ aigba Kanani tọn lọ mẹ,

¹¹ whenẹnu mì na dè tòdaho lẹ na mìde nado yín tòdaho fibẹ̀tado tọn lẹ na mì; na mẹṣihùtọ lọ he hù gbẹtọ de gbọn nuṣiwà mẹ nido nọ họ̀nyì finẹ.

¹² Tòdaho le lọ na tin hlan mì na fibẹ̀tado sọn ahọsuyítọ lọ de; na mẹsihùtọ lọ ma do kú blo, kaka ewọ na do ṣite to agùn lọ nukọn na whẹ̀dida.

¹³ Podọ tòdaho he mì na na lẹ lọ na yín tòdaho fibẹ̀tado tọn ṣidopo na mì.

¹⁴ Mì na na tòdaho atọ̀n to Jọdani gododọ̃n, mì nasọ na tòdaho atọ̀n to aigba Kanani tọn lọ ji; yé na yín tòdaho fibẹ̀tado tọn lẹ.

¹⁵ Na ovi Islaeli tọn lẹ, podọ na ojonọ lọ podọ na wásinu lọ to yé ṣẹnṣẹn, wẹ tòdaho ṣidopo helẹ na yín fibẹ̀tado na: na omẹ de he hù gbẹtọ de gbọn nusiwà mẹ nido nọ họ̀nyì finẹ.

¹⁶ Ṣigba eyín é yí núzinzán ogàn tọn de li i, sọmọ bọ é kú, hlọnhùtọ de wẹ ewọ: mẹhùtọ lọ na yín hùhù dandan.

¹⁷ Podọ eyín é yí zannu de to alọ lọ mẹ li i, gbọn ehedali omẹ de sọgan kú, bọ é sọ kú, hlọnhùtọ de wẹ ewọ; mẹhùtọ lọ na yín hùhù dandan.

¹⁸ Kavi eyín é yí adánwànu atin tọn de to alọ lọ mẹ li i, gbọn ehedali omẹ de sọgan kú, bọ é sọ kú, hlọnhùtọ de wẹ ewọ: mẹhùtọ lọ na yín hùhù dandan.

¹⁹ Ahọsuyítọ ohùn tọn lọsu wẹ na hù mẹhùtọ; lọ: whenuena é pla ẹ, é na hù i.

²⁰ Podọ eyín é sónú in sọn wangbẹ́na mẹ, kavi dlannú do e, vivà do owu mẹ, sọmọ bọ ewọ kú;

²¹ kavi to okẹ̀n mẹ yí alọ etọn li i, bọ é kú: ewọ he linú in na yín hùhù; hlọnhùtọ de wẹ ewọ: ahọsuyítọ ohùn tọn lọ na hù mẹhùtọ lọ, whenuena é pla ẹ.

²² Ṣigba eyín é sọ́nú in ajiji matin okẹ̀n, kavi dlẹn onú depope do e matin vivà do owu mẹ gba,

²³ kavi dlan zannu de, gbọn ehedali omẹ de pọgan kú, ma mọ ẹn gba, bo dlan ẹn do e, sọmọ bo é kú, bọ ewọ ma yín okẹ̀ntọ etọn gba, kavi to awugble etọn din gba:

²⁴ whenẹnu agùn lọ na dawhẹ̀ to núlimẹtọ lọ po ahọsuyítọ ohùn tọn lọ po ṣẹnṣẹn kẹdẹdi whẹ̀dida helẹ:

²⁵ agùn lọ bo na whlẹn mẹhùtọ lọ sọn alọ ahọsuyítọ ohùn tọn lọ si, agùn lọ bo na gò ẹ jó hlan tòdaho fibẹ̀tado tọn etọn mẹ, fie yè hẹn ẹn họ̀nyì: é bo nasọ nọnọ̀ finẹmẹ kakajẹ okú yẹwhenọ daho lọ tọn whenu, he yè yí amì wiwe lọ do dè.

²⁶ Ṣigba eyín mẹhùtọ lọ to ojlẹ depope mẹ na yì zẹ̀ agboji tòdaho fibẹ̀tado tọn etọn lọ tọn go, fie ewọ họ̀nyì;

²⁷ bọ ahọsuyítọ ohùn tọn lọ mọ ẹn to agbóji tòdaho fibẹ̀tado tọn etọn lọ tọn godo, bọ ahọsuyítọ ohùn tọn lọ hù mẹhùtọ lọ; whẹgbledohùntọn de ma na tin nẹ̃ gba:

²⁸ na é do ko nọte to tòdaho fibẹ̀tado tọn etọn lọ mẹ kakajẹ okú yẹwhenọ daho lọ tọn whenu wutu: ṣigba to okú yẹwhenọ daho lọ tọn godo mẹhùtọ lọ na lẹ́gọ̀ jẹ aigba nútindo etọn tọn lọ mẹ.

²⁹ Onú helẹ na tin na asẹdai whẹ̀dida tọn de hlan mì gbọn whẹndo mìtọn lẹ mẹ to fininò mìtọn lẹpo mẹ.

³⁰ Mẹdepope he hù omẹ de, mẹhùtọ lọ na yín hùhù to onù kunnudetọ lẹ tọn ji: ṣigba kunnudetọ dopo ma na dekunnu do omẹ de go na ewọ ni do kú gba.

³¹ Humọ mìwlẹ ma na yí mẹwhlẹnnú de na ogbè mẹhùtọ de tọn gba, he yín whẹgbledonọ okú tọn: ṣigba ewọ na yín hùhù dandan.

³² Podọ mìwlẹ ma nasọ yí mẹwhlẹnnú de na ewọ he yè hẹn họ̀nyì jẹ tòdaho fibẹ̀tado tọn etọn mẹ, é nido sọ gò wá nado nò aigba lọ mẹ kakajẹ okú yẹwhenọ lọ tọn whenu.

³³ Mọwẹ mì ma na flu aigba ehemẹ mì te lọ gba: na ohùn, é nọ hẹn aigba flu: podọ ovẹ̀se de ma sọgan ín bibasi na aigba lọ gba na ohùn he yè Sọndai to enẹ mẹ, adavo gbọn ohùn ewọ he kọ̀n ẹn dai lọ tọn dali.

³⁴ Podọ hiẹ ma na hẹn aigba he mẹ mì nínò lọ gble gba, gblagbla ehe tọn mẹ yẹn nọnọ̀: na yẹn OKLUNỌ lọ nọnọ̀ gblagbla ovi Islaeli tọn lẹ lọ tọn mẹ.