Osọha lẹ 32 - BIBLU WIWE LỌ 1923

¹ DINVIE ovi Lẹubeni tọn lẹ lọ po ovi Gadi tọn lẹ lọ po tindo ogégé kanlinyìnyìn lẹ tọn daho: podọ whenuena yé mọ aigba Jazeli tọn lọ, po aigba Gileadi tọn lọ po, enẹ, dayi e go, otẹn lọ otẹn de na kanlinyìnyìn wẹ;

² ovi Gadi tọn lẹ po ovi Lẹubeni tọn le lọ po wá bo dọhó hlan Moṣe, podọ hlan Eleazali yẹwhenọ lọ, podọ hlan ogán agùn lọ tọn lẹ dọmọ,

³ Ataloti, po Diboni po, po Jazeli po, po Nimla po, po Hẹṣboni po, po Eleale po, po Sebami po, po Nebo po, po Beoni po,

⁴ aigba he OKLUNỌ lọ hò to agùn Islaeli tọn lọ nukọn, aigba de na kanlinyìnyìn wẹ, devi towe lẹ sọ tindo kanlinyìnyìn.

⁵ Yé sọ dọmọ, Eyín míwlẹ ko mọ ojọmiọn to nukun towe mẹ, gbọ aigba he ni yín nina hlan devi towe lẹ na nútindo de; hiẹ sọ hẹn mi wá Jọdani godo blo.

⁶ Moṣe sọ dọ hlan ovi Gadi tọn lẹ lọ podọ hlan ovi Lẹubeni tọn lẹ lọ dọmọ. Mẹmẹsunnu mìtọn lẹ na yì jẹ awhàn lọ kón, bọ mìwlẹ na sín ofi?

⁷ Podọ etẹwutu mìwlẹ hẹnagbọpé ayiha ovi Islaeli tọn lẹ lọ tọn sọn yìyì aigba he OKLUNỌ lọ ko na yé lọ mẹ?

⁸ Le wẹ otọ́ mìtọn lẹ wà do, whenuena yẹn do yé hlan sọn Kadiṣ-balnea mẹ nado pọ́n aigba lọ.

⁹ Na whenuena yé yì aga jẹ agbadò Eṣkoli tọn lọ mẹ, bo mọ aigba lọ, yé hẹnagbọpé ayiha ovi Islaeli tọn lẹ lọ tọn, na yé ma na do sọgan yì jẹ aigba he OKLUNỌ lọ ko na yé lọ mẹ.

¹⁰ Yè sọ hẹn adi OKLUNỌ lọ tọn jimiyọn to gbenẹgbè, é bo sọ whle, dọmọ,

¹¹ Nugbonugbo ode sọn omẹ he hẹji jẹgbonu sọn Egipti mẹ wá lẹ tọn, sọn owhè òko mẹho podọ humọ, ma na mọ aigba lọ he yẹn whle hlan Ablaham, hlan Isaki, podọ hlan Jakob gba: na yé ma ko hodo mi petepete wutu:

¹² adavo Kalebi visunnu Jẹfunnẹ tọn lọ Kẹnizinu lọ, po Jọsua visunnu Nuni tọn lọ po: na yé ko hodo OKLUNỌ lọ petepete wutu.

¹³ Yè sọ hẹn adi OKLUNỌ lọ tọn jimiyọn do Islaeli ji, é bo sọ hẹn yé sàléle yígodo yìnukọn to zùngbo lọ mẹ owhè kande, kaka whẹndo lọ lẹpo, he ko wà oylan to nukun OKLUNỌ lọ tọn mẹ, yín súsúdo

¹⁴ Podọ, dayi e go, mìwlẹ tite to otẹn otọ́ mìtọn lẹ tọn mẹ, osùdeji gbẹtọ ylando lẹ tọn de, nado sọ do dotlanna adi zògbe OKLUNỌ lọ tọn hlan Islaeli dali.

¹⁵ Na eyín mìle lẹ́ sọn godo etọn é na gbé sọ jó yé do zùngbo lọ mẹ; mìwlẹ bo nasọ và omẹ he lẹpo.

¹⁶ Yé sọ wá sẹpọ jẹ e de, bo dọmọ, Míwlẹ na do lẹngbọpó lẹ do ofi na kanlinyìnyìn mítọn lẹ, po tòdaho lẹ po na omẹ flinflin mítọn lẹ:

¹⁷ ṣigba mí lọsu na yín biblagbajana dote nado to yìyì to ovi Islaeli tọn lẹ lọ nukọn, kaka mí ko do hẹn yé wá jẹ otẹn yetọn mẹ: omẹ flinflin mítọn lẹ bo na nọnó tòdaho dòkọnọ lẹ mẹ na tòmẹnu aigba lọ tọn lẹ lọ tọn wutu.

¹⁸ Míwlẹ ma na lẹ́gọ̀ jẹ owhé mítọn lẹ gbè gba, kaka ovi Islaeli tọn lẹ lọ ko yígú omẹ dopodopo ogú etọn.

¹⁹ Na míwlẹ ma na yígù po yé po to awà dóntọn Jọdani tọn ji gba, podọ donukọn; na ogú mítọn jẹ mi si to awà détọn Jọdani tọn ji hlan whèzẹtẹn dali wutu.

²⁰ Moṣe sọ dọ hlan yé dọmọ, Eyín mìwlẹ na wà onú he; eyín míwlẹ na blagbajana mìde nado to yìyì to OKLUNỌ lọ nukọn jẹ awhàn lọ,

²¹ bọ omẹ gbajanọ mì tọn dopodopo na juyì Jọdani godo to OKLUNỌ lọ nukọn, kaka é ko dò yàn kẹ́ntọ etọn lẹ jẹgbonu sọn nukọn etọn,

²² bọ aigba lọ yín hihòhuwhéna to OKLUNỌ lọ nukọn: whenẹnu enẹgodo mìwlẹ na lẹ́gọ̀, bo tin matinwhẹ̀gbledo hlan OKLUNỌ lọ dali, podọ hlan Islaeli dali, aigba he bo na yín nútindo de hlan mì to OKLUNỌ lọ nukọn.

²³ Ṣigba eyín míwlẹ ma na wà mọ gba, dayi e go, míwlẹ ko wàylando do OKLUNỌ lọ go: bo yin yọnẹnnọ dọ ylando mìtọn na din mì mọ.

²⁴ Mì do tòdaho lẹ na omẹ flinflin mìtọn lẹ, po apó lẹ po na lẹngbọ mìtọn lẹ; bo sọ wà enẹ be ko tón sọn onù mìtọn mẹ jẹgbonu.

²⁵ Ovi Gadi tọn lẹ lọ po ovi Lẹubeni tọn lẹ lọ po sọ dọhó hlan Moṣe, dọmọ, Devi towe lẹ na wà dile OKLUNỌ ṣie degbèna do.

²⁶ Omẹ flinflin mítọn le, asi mítọn lẹ, kanlinpá mítọn lẹ, pó kanlinyìnyìn mítọn lẹpo po, na tin to tòdaho Gileadi tọn lẹ lọ mẹ finẹ:

²⁷ ṣigba devi; towe lẹ na juyì gododọ̃n, omẹ dopodopo he yè blagbajana na awhàn, to OKLUNỌ LỌ nukọn jẹ awhànfùntẹn, dile OKLUNỌ ṣie dọ do.

²⁸ Mowẹ Moṣe na asẹ gbọn yé tọn dali hlan Eleazali yẹwhenọ lọ do, podọ hlan Jọṣua visunnu Nuni tọn lọ, podọ hlan nukọntọ owhé otọ́ whẹndo ovi Islaeli tọn lẹ tọn tọn lẹ tọn.

²⁹ Mòṣe sọ dọ hlan yé dọmọ, Eyín ovi Gadi tọn lẹ lọ po ovi Lẹubeni tọn lẹ lọ po na juyì Jọdani gododọn po mì po, omẹ dopodopo he yè blagbajana jẹ awhànfùntẹn, to OKLUNỌ lọ nukọn, bọ aigba lọ yín hihòhuwhẹ́na to mì nukọn: whenẹnu mì na na aigba Gileadi tọn lọ yé na nútindo de:

³⁰ ṣigba eyín yé ma na juyì gododọ̃n biblagbajana po mì po gba, yé na tindo nútindo lẹ to mì ṣẹnṣẹn to aigba Kanani tọn lọ mẹ.

³¹ Ovi Gadi tọn lẹ lọ po ovi Lẹubeni tọn lẹ lọ po sọ gblọn, dọmọ, Le OKLUNỌ lọ ko dọ hlan devi towe lẹ do, mọ mìlẹ na wà do

³² Mìwlẹ na juyì gododọ̃n bìblagbajana to OKLUNỌ lọ nukọn jẹ aigba Kanani tọn lọ mẹ, nútindo ogú mítọn tọn lọ na tin mí si to Jọdani godo.

³³ Moṣe sọ yi na hlan yé, yèdọ hlan ovi Gadi tọn lẹ lọ, podọ hlan ovi Lẹubeni tọn lẹ lọ, podọ hlan odá whẹndo Manasse tọn lọ visunnu Josẹfu tọn lọ, ahọludu Sihoni ahọlu Amolinu lẹ tọn lọ tọn, po ahọludu Ogi ahọlu Baṣani tọn lọ tọn po, aigba lọ, kẹdẹdi todaho etọn lẹ po agboji yetọn lẹ po, yèdọ todaho aigba lọ tọn lẹpo lẹ́do.

³⁴ Ovi Gadi tọn lẹ lọ sọ do Diboni, po Ataloti po, po Aloeli po;

³⁵ po Atlotisofani po, po Jazeli po, po Jogbeha po;

³⁶ po Beti-nimla po, po Beti-halani po, tòdaho odòkọnọ lẹ, po apó lẹ po na lẹngbọ lẹ.

³⁷ Ovi Lẹubeni tọn lẹ lọ sọn Hẹṣbọni, po Eleale po, po Kiliataimi po;

³⁸ po Nebo po, po Baali-meoni po, (oyin yetọn lẹ yínyín didiọ,) po Sibma po: bo sọ na oyín devo tòdaho he é do lẹ lọ.

³⁹ Podọ ovi Makili tọn lẹ visunnu Manasse tọn lọ yì jẹ Gileadi, bo yí i, bo yàn Amolinu he tin to e mẹ lẹ.

⁴⁰ Moṣe sọ yí Gileadi na hlan Makli visunnu Manasse tọn lọ; ewọ bo sọ nọnọ̀ e mẹ.

⁴¹ Podọ Jaili visunnu Manasse tọn lọ sọ yì bo yí tòpẹvi etọn lẹ, bo nọ ylọ yé dọ Havotijaili.

⁴² Podọ Noba sọ yì bo yí Kenate, po gbetatò etọn lẹ po, bo nọ ylọ ẹ Noba, kẹdẹdi oyín etọn lọsu.