Osọha lẹ 31 - BIBLU WIWE LỌ 1923

¹ OKLUNỌ lọ sọ dọhó hlan Moṣe, dọmọ,

² Yíahọsu ovi Islaeli tọn lẹ tọn to Midianinu lẹ lọ go: enẹgodo hiẹ na yín bibépli hlan omẹ towe lẹ de.

³ Moṣe sọ dọhó hlan gbẹtọ lẹ lọ, dọmọ, Mì blagbajana sunnu lẹ sọn mì ṣẹnṣẹn na awhàn lọ, na yé nido yì Midiani ji, nado hẹn ahọsuyí OKLUNỌ lọ tọn ṣẹ to Midiani go.

⁴ Fọtón dopo sọn whẹndo dopodopo mẹ, gbọn whẹndo Islaeli tọn lọ lẹpo mẹ, wẹ mì na dohlan awhàn lọ.

⁵ Mowẹ yè jó, sọn fọtọ́n omẹ Islaeli tọn lẹ lọ mẹ, fọtọ́n dopo sọn whẹndo dopodopo mẹ, fọtọ́n wiawe blagbajana na awhàn.

⁶ Moṣe sọ do ye hlan, fọtọ́n dopo sọn whẹndo dopodopo mẹ, hlan awhàn lọ, yé po Finehasi po visunnu Eleazali yẹwhenọ lọ tọn, jẹ awhàn lọ, po núzinzán fiwiwe lọ tọn lẹ po po opẹ́n lẹ lọ po na zínhihò lọ to alọ etọn mẹ.

⁷ Yé sọ funawhàn hẹ Midiani, dile OKLUNỌ lọ degbèna Moṣe do: yé sọ hù sunnusi lẹ dopodopo

⁸ Yé sọ hù ahọlu Midiani tọn lẹ po pipòtọ alántọsiọ yetọn lẹ tọn po; Evi, po Lekimi po, po Zuli po, po Huli po, po Leba po, ahọlu Midiani tọn atón lẹ: yé sọ yí ohi lọ do hù Balaami visunnu Beoli tọn lọ ga.

⁹ Ovi Islaeli tọn lẹ sọ wle yọnnu Midiani tọn lẹ mẹglọnọ po omẹ flinflin yetọn lẹ po; podọ kanlinyìnyìn yetọn lẹpo, po kanlinpá yetọn lẹpo po, po agbàn yetọn lẹpo po, yé bó na ogblannú de.

¹⁰ Podọ todaho yetọn lẹpo to otẹn he mẹ yé nọnọ lẹ mẹ, po oslahọ̀ yetọn lẹpo po, wẹ yé yí miyọn do mẹ̀.

¹¹ Yé sọ bé nújawla lọ lẹpo, po ogblannú lọ lẹpo po, gbẹtọ tọn po kanlin tọn po.

¹² Yé sọ hẹn mẹglọnọ lẹ lọ wá, po ogblannú lẹ lọ po, po nújawla lẹ lọ po, jẹ Moṣe de, podọ jẹ Eleazali yẹwhenọ lọ de, podọ jẹ agùn ovi Islaeli tọn lẹ lọ tọn de, jẹ osla lọ kòn to danfáfá Moabi tọn lẹ lọ ji, he tin to Jọdani dali to Jẹliko.

¹³ Moṣe, po Eleazali yẹwhenọ lọ po, po ogán agùn lọ tọn lẹpo po, jẹgbonu yì nado pé ye to osla lọ godo.

¹⁴ Moṣe sọ yín homẹgblenọ do azọngán awhànpa lọ tọn lẹ go, awhàngán fọtọ́n lẹ lọ tọn le po awhàngán kanweko lẹ tọn lẹ lọ po, he gọ sọn sinsẹ̀nzọ́n awhàn lọ tọn mẹ.

¹⁵ Moṣe sọ dọ hlan yé dọ, Mì ko hla yọnnusi lẹ pó dogbẹ́ wẹ?

¹⁶ Dayi e go, ehelẹ wẹ hẹn ovi Islaeli tọn lẹ lọ, gbọn hónamẹ Balaami tọn mẹ, nado wà sẹ́nmẹjẹnú do OKLUNỌ lọ go to owhẹ́hó Peoli tọn lọ mẹ, mọwẹ azònylankan lọ do tin to agùn OKLUNỌ lọ tọn lọ ṣẹnṣẹn.

¹⁷ Enẹwutu dinvie, mì hù sunnusi lẹpo to omẹ flinfiin lẹ lọ mẹ, bo sọ hù yọnnusi lẹ lọ lẹpo he ko yón sunnu gbọn aimlọn po e po dali.

¹⁸ Ṣigba yọ̀pọ yọnnusi lẹ lọ lẹpo he ma ko yón sunnu gbọn aimlọn po e po dali, mì hla dogbẹ́ na mìde.

¹⁹ Mì ni sọ dosla do osla lọ godo azán ṣinawe: mẹdepope he ko hù gbẹtọ de, podọ mẹdepope he ko doalọ alántọsiọ de go, mì lé mìde wé to azán atọ̀ntọ gbè podọ to azán sinawetọ gbè, mìlẹ po mẹglọnọ mìtọn lẹ po.

²⁰ Podọ na awu lẹ pó tọn, podọ ehe yè basi sọn ayú me lẹ pó, podọ azón sọn ofún gbọgbọẹ lẹ tọn mẹ lẹpo, podọ onú he yè basi sọn atin mẹ lẹpo, mì na léwe na mìde

²¹ Eleazali yẹwhenọ lọ sọ dọ hlan omẹ awhàn tọn lẹ lọ he yì jẹ awhànfùntẹn lọ dọmọ, Ehe wẹ asedai osén lọ tọn he OKLUNỌ lọ degbèna Moṣe:

²² gãnṣo sika lọ po fataka lọ po, ogànvẹ̃ lọ, ogànyù lọ, po osùnmí lọ po,

²³ onú he sọgan nọhẹ miyọn dopodopo, mìlẹ na hẹn gbọn miyọn mẹ yì, é bo nasọ yín wiwé; gãnṣo e na yín yíyí osìn klandovo tọn do lẹ́ ẹ wé: podo ehe ma sọgan nọhẹ miyọn lọ mì na hẹn gbọn osìn mẹ yì.

²⁴ Mìlẹ nasọ yàn avọ̀ mìtọn lẹ to azán ṣinawetọ lọ gbè, mì bo nasọ yin wiwé, enẹgodo mì bo na wá osla lọ mẹ.

²⁵ OKLUNỌ lọ sọ dọhó hlan Mo-je, dọmọ,

²⁶ Yí olẹndopọ ogblannú he yè bó lọ lọ tọn, gbẹtọ tọn po kanlin tọn po, hiẹ, po Eleazali yẹwhenọ lọ po, po nukọntọ owhé otọ́ lẹ lọ tọn lọ tọn po sọn agùn lọ mẹ:

²⁷ bo má ogblannú lẹ lọ do donu awe; to sunnu zìnzìntọ to awhàn mẹ, he jẹgbonu yì jẹ awhànfùntẹn, po agùn lọ lẹpo po ṣẹnṣẹn:

²⁸ bo sinyan onújọ de hlan OKLUNỌ lọ sọn gbẹtọ awhàn tọn lẹ lọ si he jẹgbonu yì jẹ awhànfùntẹn mẹ: alindọn sọn fòwekanweko mẹ, gbẹtọ lẹ lọ tọn, po oyin lẹ tọn po, po kẹtẹkẹtẹ lẹ tọn po, po kanlinpá lẹ tọn po:

²⁹ yí i sọn odá yetọn mẹ, bo yí i na hlan Eleazali yẹwhenọ lọ, na avọ́nunina zédlanga OKLUNỌ lọ tọn.

³⁰ Podọ sọn odá ovi Islaeli tọn lọ lọ tọn mẹ, hiẹ na yí dopo dindọn jegbonu sọn kandeao dopodopo mẹ, sọn gbẹtọ lẹ lọ mẹ, sọn oyin lẹ lọ mẹ, sọn kẹtẹkẹtẹ lẹ lọ mẹ, podọ sọn kanlinpa lẹ lọ mẹ, yèdọ sọn kanlinyìnyìn lẹ lọ mẹ, bo yí yé na hlan Levinu lẹ lọ, he to aṣẹ gohọ̀túntún OKLUNỌ tọn lọ tọn go payi.

³¹ Moṣe po Eleazali yẹwhenọ lọ po sọ wà dile OKLUNỌ lọ degbèna Moṣe do.

³² Dinvie ogblannú lọ, he lán bo hugán ojawla lọ yín lẹngbọ fọtọ́n nuọntónkandegbàntón,

³³ oyin lẹ fọtọ́n kandegbànnukunawe,

³⁴ kẹtẹkẹtẹ lẹ fọtọ́n kandekonukundopo,

³⁵ po gbẹtọ lẹpo po dopọ sọn yọnnu he ma ko yón sunnu lẹ mẹ gbọn aimlon po e po dali, fọtọ́n gbànnukunawe.

³⁶ Podọ odá lọ, he yín mimá yé he jegbonu yì jẹ awhànkọn lẹ tọn, yin to osọha mẹ, lẹngbọ fọtọ́n fọdekantọ̀nfọtónnukunawe po fowekanweko po:

³⁷ podọ onújọ OKLUNỌ lọ tọn lọ sọn lẹngbọ lẹ mẹ yín nuọntọnkandegbàntón.

³⁸ Podọ oyin lẹ yín fọtọ́n gbàntónnukundopo; sọn ehe mẹ onújọ OKLUNỌ tọn lọ yín kandegbànnukunawe.

³⁹ Podọ kẹtẹkẹtẹ lẹ lọ yín fọtọ́n ogbàn po fòwekanweko po; sọn ehe mẹ onújọ OKLUNỌ tọn lọ yín kandekonukundopo.

⁴⁰ Podọ gbẹtọ lẹ lọ yín fọfón fọtọ̀nnukundopo; sọn mẹhe mẹ onújọ OKLUNỌ tọn lọ yín gbẹtọ gbànnukunawe.

⁴¹ Moṣe bo sọ yí onújọ lẹ he yín avọ́nunina zédlanga OKLUNỌ tọn lọ na hlan Eleazali yẹwhenọ lọ dile OKLUNỌ lọ degbèna Moṣe do

⁴² Podọ sọn odá ovi Islaeli tọn lọ lọ tọn mẹ, he Moṣe má sẹ sọn omẹ he funawhàn lẹ si,

⁴³ (dinvie odá agùn lọ tọn lọ, yín lẹngbọ fọtọ́n fọdekantọ̀nfọtọ̀nnukunawe po fòwekanweko po,

⁴⁴ podọ oyin lẹ fọtọ́n gbàntónnukundopo,

⁴⁵ podọ kẹtẹkẹtẹ lẹ fọtọ́n ogbàn po fòwekanweko po,

⁴⁶ podọ gbẹtọ lẹ fọtọ́n fọtọ̀nnukundopo;)

⁴⁷ yèdọ sọn odá ovi Islaeli tọn lẹ lọ tọn mẹ, Moṣe yi dopo dindọn jẹgbonu sọn kandeao dopodopo mẹ gbẹtọ tọn po kanlin tọn po, bo yi yé na hlan Levinu lẹ lọ he to aṣẹ gohọ̀túntún OKLUNỌ tọn lọ tọn go payi; dile OKLUNỌ lọ degbèna Moṣe do.

⁴⁸ Azọ́ngán lẹ lọ he tin to fọtọ́n awhanpa lẹ lọ tọn ta, awhàngán fọtọ́n lẹ lọ tọn lẹ, po awhàngán kanweko lẹ lọ tọn lẹ po, sẹpọ́ wá jẹ Moṣe de:

⁴⁹ yé dọ hlan Moṣe dọmọ, Devi towe lẹ ko yí olẹndopọ omẹ awhàn tọn lẹ lọ tọn he tin to asẹ mítọn glọ, podọ sunnusi mí tọn dopo ma whè gba.

⁵⁰ Podọ mí ko sọ hẹn avọ́nunina OKLUNỌ tọn lọ wá, núhe omẹ dopodopo ko tindo, asọdonú sika tọn lẹ, ogódó sislo lẹ, awàgán lẹ, alọkẹ ohia tọn lẹ, otómẹgàn lẹ, po okòkle lẹ po, nado basi ovẹ̀se na alindọn mítọn lẹ to OKLUNỌ lọ nukọn.

⁵¹ Moṣe po Eleazali yẹwhenọ lọ po sọ yí sika lọ sọn yé si, yèdo asọdonu tùntùn lẹpo.

⁵² Po sika avọ́nunina zédlanga lọ tọn lẹpo po he yé yína hlan OKLUNỌ lọ, sọn awhàngán fọtọ́n lẹ lọ tọn lẹ si, podọ sọn awhàngán kanweko lẹ lọ tọn lẹ si, yín ṣekẹli fọtọ́n fọtọ̀nnukundopo po nuọntọ̀nkantọ̀ngbàn po.

⁵³ (Na omẹ awhàn tọn lẹ lọ ko yí ojawla, omẹ dopodopo na ede.)

⁵⁴ Moṣe po Eleazali yẹwhenọ lọ po sọ yi sika lọ sọn awhàngán fọtọ́n lẹ lọ tọn lẹ si podọ sọn kanweko lẹ tọn lẹ si, bo hẹn ẹn wá ogohó opli tọn lọ mẹ, na oflinnú de na ovi Islaeli tọn lẹ lọ to OKLUNỌ lọ nukọn.