Osọha lẹ 3 - BIBLU WIWE LỌ 1923

¹ DINVIE ehelẹ wẹ whẹndo Aalọn tọn lẹ lọ po Moṣe po to azán he mẹ OKLUNỌ lọ dọhó hẹ Moṣe toosó Sinai me.

² Podọ ehelẹ wẹ oyin visunnu Aalọn tọn lẹ tọn; Nadabi oplọnji lọ, po Abihu po, Eleazali, po Itamali po.

³ Ehelẹ wẹ oyín visunnu Aalọn tọn lẹ lọ tọn lẹ, yẹwhenọ he yè dè lẹ lọ, mẹhe ewọ dèdowiwe nado nọ wàdevizọ́n to azọ́nhò yẹwhenọ tọn lọ mẹ.

⁴ Nadabi po Abihù po kú to OKLUNỌ lọ nukọn, whenuena yé yí miyọn alọpadevo na to OKLUNỌ lọ nukọn, to zùngbo Sinai tọn lọ mẹ, yé ma sọ tindo ovi de; Eleazali po Itamali po sọ to devizọnwà to azọ́nhò yẹwhenọ tọn lọ mẹ to nukọn. Aalọn otọ́ yetọn tọn.

⁵ OKLUNỌ lọ SỌ dọhó hlan Moṣe, dọmọ,

⁶ Hẹn whẹndo Levi tọn lọ sèpọ, bo zé yé do Aalọn yẹwhenọ lọ nukọn, na yé nido nọ wàdevizọ́n hlan mi.

⁷ Yé bo nasọ nọ payi asẹ etọn go po asẹ agùn pete lọ tọn po to ogohò opli tọn lọ nukọn nado nọ basi sinsẹ̀n gohọtúntún lọ tọn.

⁸ Yè nasọ nọ payi asọvànu ogohò opli tọn lọ tọn lẹpọ go, po asẹ ovi Islaeli tọn lẹ lọ tọn po, nado nọ basi sinsẹ̀n gohọ̀túntún lọ tọn.

⁹ Hiẹ bo nasọ yí Levinu lẹ lọ na hlan Aalọn podọ hlan visunnu etọn lẹ: petepete wẹ yè yí yé na hlan ẹn sọn ovi Islaeli tọn lẹ lọ mẹ.

¹⁰ Hiẹ nasọ dè Aalọn po visunnu etọn lẹ po, yé nasọ nọ payi yẹwhenọzón yetọn go: podọ ojónọ lọ he wá sèpọ na yín hùhù.

¹¹ OKLUNỌ lọ sọ dọhó hlan Moṣe, dọmọ,

¹² Podọ Yẹn, dayi e go, Yẹn ko yí Levinu lẹ lọ sọn ovi Islaeli tọn lẹ lọ ṣẹnṣẹn to otẹn oplónji lọ lẹpo tọn mẹ he hùn adò lọ to ovi Islaeli tọn lẹ lọ ṣẹnṣẹn; Levinu lẹ lọ bo nasọ yín ṣie:

¹³ na ṣie wẹ oplónji lọ lẹpo; to azán he gbè yẹn linu oplónji lọ lẹpo to aigba Egipti tọn lọ ji yẹn biọ oplónji lọ lẹpo to Islaeli mẹ hlan dẽ, gbẹtọ po kanlin po: ṣie wẹ yé na ín; Yẹn wẹ OKLUNỌ lọ.

¹⁴ OKLUNỌ lọ sọ dọhó hlan Moṣe to zùngbo Sinai tọn lọ mẹ, dọmọ,

¹⁵ Yísọhana ovi Levi tọn lẹ lọ gbọn owhé otọ́ yetọn lẹ tọn lẹ dali, gbọn whédo yetọn lẹ dali: sunnusi dopodopo sọn osùn dopo mẹho podọ humọ wẹ hiẹ na do yísọhana yé.

¹⁶ Moṣe sọ yísọhana yé kẹdẹdi ohó OKLUNỌ lọ tọn, dile yè degbèna ẹn do.

¹⁷ Podọ ehelẹ wẹ visunnu Levi tọn lẹ lọ gbọn oyín yetọn lẹ dali; Gẹlsoni, po Kohati po, po Melaii po.

¹⁸ Ehelẹ wẹ oyín visunnu Gẹlsoni tọn lẹ lọ tọn gbọn whédo yetọn lẹ dali; Libni po Ṣimei po.

¹⁹ Podọ visunnu Kohati tọn lẹ lọ gbọn whédo yetọn lẹ dali; Amlami, po Izali po, Hebloni, po Uziẹli po.

²⁰ Podọ visúnnu Melali tọn lẹ lọ gbọn whédo yetọn lẹ dali; Mahli po Muṣi po. Ehelẹ wẹ whédo Levinu lẹ lọ tọn lẹ kẹdẹdi owhé otọ yetọn lẹ tọn lẹ.

²¹ Gẹlsoni ton wẹ whédo Libninu lẹ lọ tọn, po whédo Simeinu lẹ lọ tọn po: ehelẹ wẹ whédo Gẹlsoninu lẹ lọ tọn lẹ.

²² Enẹlẹ he yè yísọhana sọn yé mẹ lẹ, kẹdẹdi osọha oyin lọ lẹpo tọn, son osùn dopo mẹho podo humọ, yèdọ enele he yè yísọhana sọn yé mẹ yín fọtọ́n ṣinawe po fòwekanweko po

²³ Whédo Gelsoninu lẹ lọ tọn le na pénslahò to godo gohòtántún lọ tọn hlan whèyihọdali.

²⁴ Podọ ogán lọ sọn owhé otọ́ Gẹlsoninu le lọ tọn lẹ mẹ na yín Eliasafi visunnu Laelitọn lọ.

²⁵ Podọ ase visunnu Gẹlsoni tọn lẹ lọ tọn to ogohọ̀ opli tọn lọ mẹ na yín gohọ̀túntún lọ, po Ogohọ̀ lọ po, oṣinyọn etọn, po baṣẹ lo po na ohọ̀n ogohọ̀ opli tọn lọ ton,

²⁶ po avọ̀dido akanmahó lọ tọn lẹ po, po base lọ po na ohòn akànmahó lọ tọn, he tin to gohọ̀túntún lọ dali, podọ to agbà lọ dali lédo pé, po kànsisló e ton lẹ lọ po na sinsẹ̀nzọ́n etọn lẹpo lọ.

²⁷ Podo Kohati tọn wẹ whédo Àmlaminu lẹ lọ tọn, po whédo Izalinu lẹ lọ tọn pọ, po whédo Hebloninu lẹ lọ tọn po, po whédo Uziẹlinu lẹ lọ tọn po: ehele wẹ whédo Kohatinu lẹ lọ tọn lẹ

²⁸ Kẹdẹdi osọha Sunnusi lọ lẹpo tọn sọn osùn dopo mẹho podọ humọ yín fọtọ́n sinatòn po nuọntọ̀n po, he to ayipa aṣẹ fiwiwe lọ tọn go.

²⁹ Whedo visunnu Kohati tọn lẹ lọ tọn le na pénslahọ̀ do awà gohọ̀túntún lọ tọn go hlan huwaji dali.

³⁰ Podọ ogán lọ sọn owhé otọ́ lẹ ton gbè sọn whédo Kohatinu lẹ tọn lọ mẹ na yín Elizafani visunnu Ulieli tọn lọ.

³¹ Podọ aẹ yetọn na yín alki lọ, po tafo lọ po, po miyọngbántin lọ po, po agbà le lọ po po nuzinzán fìwiwe lọ tọn lẹ po he yé dò nọ wàdevizọn, po baṣẹ lo po, po sinsẹ́nzọ́n etọn lẹpo po.

³² Podọ Eleazali visunnu Aalọn tọn lọ yẹwhenọ lọ na yín ogán ogán Levinu lẹ tọn lẹ lọ tọn, bo sọ tindo nugopinpọ́n yé he to ayipa aṣẹ fìwiwe lọ tọn lọ go tọn.

³³ Melali tọn wẹ whédo Mahlinu lẹ lọ tọn, po whédo Maṣinu lẹ lọ tọn po: ehelẹ wẹ whédo Melali tọn lẹ lọ.

³⁴ Podo enẹlẹ he yè yísọhana sọn yé mẹ, kẹdẹdi osọha oyín lẹ lọ tọn, sọn osùn dopo mẹho podọ humọ, yín fọtọ́n ṣidopo po fọ̀de po.

³⁵ Podọ ogán lọ sọn owhé otọ́ lẹ lọ tọn gbè sọn whédo Melali tọn lẹ lọ mẹ wẹ Zùlièli visunnú Abihaili ton lọ; yé na pénslahọ̀ do awà gohọ̀túntún lọ tọn go hlan agewaji dali

³⁶ Podọ azọ́nhò aṣẹ Visunnu Melali tọn lẹ lọ tọn na yín òwhlẹ gohọ̀túntún lọ tọn lẹ, po ópatin etọn lẹ po, po odòtin etọn lẹ po, po oslò etọn lẹ po, po núzinzán etọn lepo po, po sinsẹ́nzón etọn lẹpo po;

³⁷ po odòtin àkan mahó lọ tọn le po lẹ́do pé, po oslò yetọn lẹ po, po osé yetọn lẹ po, po kansislo yetọn le po

³⁸ Podọ enẹlẹ he pénslahọ̀ do gohọ̀túntún lọ nukọn hlan whèzẹtẹn dali, do ogohọ̀ opli tọn lọ nukọn hlan whèzize lọ dali, na yín Moṣe, po Aalọn po po visunnu etọn lẹ po he to ayipa aṣẹ fiwiwe lọ ton lo go yèdọ ase ovi Islaeli tọn lẹ lọ tọn; podọ ojónọ lọ he wá sẹ́pọ na yín hùhù.

³⁹ Ehe yè yísọhana sọn Levinu-lẹ lọ mẹ lepo, he Moṣe po Aalọn po yísọhana to gbèdide OKLUNỌ lọ tọn ji, gbọn whédo yetọn le dali, sunnusi lọ lẹpo sọn osùn dopo mẹho podo humọ, yín fọtọ́n konukunawe.

⁴⁰ OKLUNỌ lọ sọ dọ hlan Moṣe dọ, Yísọhana sunnusi oplọ́nji lọ lẹpo sọn ovi Islaeli tọn lẹ lọ mẹ sọn osùn dopo mẹho podọ humọ bo sọ yí osọha oyín yetọn lẹ tọn.

⁴¹ Hiẹ bo nasọ yí Levinu lẹ lọ na mi (Yẹn wẹ OKLUNỌ lọ) to otẹn oplọ́nji lọ lepo tọn mẹ to óvi Islaeli tọn lẹ lọ ṣẹnṣẹn; po kanlinyìnyìn Levinu lẹ lọ tọn lọ po to oten oplọ́nji lọ lẹpo tọn to kanlinyìnyìn ovi Islaeli tọn lẹ lọ tọn ṣẹnṣẹn.

⁴² Moṣe bo sọ yísọhana, dile OKLUNỌ lọ degbèna ẹn do, oplọ́nji lẹpo to ovi Islaeli ton lẹ lọ ṣẹnṣẹn.

⁴³ Podọ oplonjisunnusi lọ lẹpo kẹdẹdi osọha oyín le lọ tọn sọn osùn dopo mẹho podọ humọ, enẹlẹ he mẹ yè yísọhana yé sọn yín fọtọ́ni konukunawe po fọ̀dekandegbànnukunatọ̀n po.

⁴⁴ OKLUNỌ lọ sọ dọhó hlan Moṣe, dọmọ,

⁴⁵ Yí Levinu lẹ lọ to otẹn oplọ́nji lọ lẹpo tọn mẹ to ovi Islaeli tọn lẹ lọ ṣẹnṣẹn, podo kanlinyìnyìn Levinu lẹ lọ tọn to otẹn kanlinyìnyìn yetọn lẹ tọn mẹ: Levinu lẹ bo nasọ yín ṣie; Yẹn wẹ OKLUNỌ lọ.

⁴⁶ Podọ enelẹ he tin nado yín fifligò lẹ fọ̀dekandegbànnukunatọ̀n sọn oplọ́nji ovi Islaeli tọn lẹ lọ mẹ, he yín linlán to osọha Levinu lẹ lọ tọn ji,

⁴⁷ hiẹ na yí ṣekẹli atón-atón gbọn ota lọ dali; kẹdẹdi sẹkẹli fiwiwe lọ tọn lọ wẹ hiẹ na yí yé (gela òko wẹ ṣekẹli lọ):

⁴⁸ hiẹ bo na yí akuẹ he yè yí do fli osọha yé he lán lọ ton na hlan Aalọn podọ hlan visunnu etọn le

⁴⁹ Moṣe bo sọ yí mẹflikuẹ lọ son yé he lán to yé he yè fli gbọn Levinu lẹ lọ dali si:

⁵⁰ sọn oplónji ovi Islaeli tọn lẹ lọ tọn si wẹ é yí akuẹ lọ te; ṣẹkẹli fọtọ́n dopo po fọ̀dekennẹnatón po, kẹdẹdi ṣekẹli fiwiwe lọ tọn lọ

⁵¹ Moṣe bo yí akuẹ yé he yè fli lẹ tọn lọ na hlan Aalọn podọ hlan visunnu etọn lẹ kẹdẹdi ohó OKLUNỌ lọ tọn, dile OKLUNỌ lọ degbèna Moṣe do.