Osọha lẹ 27 - BIBLU WIWE LỌ 1923

¹ WHENẸNU wẹ viyọnnu Zelofehadi tọn lẹ lọ dòn sẹpọ́, visunnu Hefeli tọn lọ, visunnu Gileadi tọn lọ, visunnu Makili tọn lọ, visunnu Manasse tọn lọ, sọn whédo Manasse tọn lẹ mẹ visunnu Josẹfu tọn lọ: ehelẹ sọ wẹ oyín viyọnnu etọn lẹ lọ tọn lẹ; Mala, Noa, po Hagla po, po Milka po, po Tilza po.

² Yé bo ṣite to Moṣe nukọn, podọ to Eleazali yẹwhenọ lọ nukọn, podọ to ogán lẹ lọ nukọn po agún lọ lẹpo po, to ohọ̀n ogohò opli tọn lọ kòn, dọmọ,

³ Otọ́ mítọn kú to zùngbo lọ mẹ, podọ ewọ ma tin to ogbẹ́ yé he bẹ́ yéde plidopọ do OKLUNỌ lọ ji tọn lọ mẹ gba to ogbẹ́ Kola tọn lọ mẹ: ṣigba é kú to ylando etọn lọsu mẹ; ewọ ma sọ tindo visunnu de gba.

⁴ Etẹwutu wẹ oyín otọ́ mítọn tọn lọ na do yín didè ṣe sọn whédo etọn ṣẹnṣẹn, na ewọ ma tindo visunnu de wutu? Na nutindo de hlan mí to mẹmẹsunnu otọ́ mítọn tọn lẹ lọ ṣẹnṣẹn.

⁵ Moṣe sọ hẹn whẹ́ho yetọn wá OKLUNỌ lọ nukọn

⁶ OKLUNỌ lọ sọ dọhó hlan Moṣe, dọmọ,

⁷ Viyọnnu Zelofehadi tọn lẹ lọ dọhó nugbo: hiẹ nugbonugbo na na nútindo ogú de tọn de yé to mẹmẹsunnu otọ́ yetọn tọn lẹ ṣẹnṣẹn; hiẹ nasọ hẹn ogú otọ́ yetọn tọn lọ nado juyì jẹ yé de.

⁸ Hiẹ nasọ dọhó hlan ovi Islaeli tọn lẹ lọ, dọmọ, Eyín sunnu de kú, bo ma tindo visunnu de gba, whenẹnu mìwlẹ na hẹn ogú etọn nado juyì jẹ viyọnnu etọn de.

⁹ Podọ eyín é ma sọ tindo viyọnnu de gba, whenẹnu mì na yí ogú etọn hlan mẹmẹsunnu etọn lẹ.

¹⁰ Podọ eyín é ma tindo mẹmẹsunnu de, whenẹnu mì na yí ogú etọn na hlan mẹmẹsunnu otọ́ etọn tọn lọ.

¹¹ Podọ eyín otọ́ etọn ma tindo mẹmẹsunnu de, whenẹnu mì na yí ogú etọn na hlan hẹnnumẹ etọn he tin sẹpọ́ hlan e de sọn whédo etọn mẹ, ewọ bo nasọ tindo e: é nasọ tin hlan ovi Islaeli tọn lẹ lọ aṣẹdai whẹ̀dida tọn de, dile OKLUNỌ lọ degbèna Moṣe do.

¹² OKLUNỌ lọ sọ dọ hlan Moṣe dọmọ, Hẹ oji yì osé Abalimi tọn he mẹ, bo pọ́n aigba he yẹn na hlan ovi Islaeli tọn lẹ lọ.

¹³ Podọ whenuena hiẹ ko mọ ẹn, hiẹ ga nasọ yín bibépli hlan omẹ towe le, dile yè bẹ́ Aalọn nọvisunnu towe pli do.

¹⁴ Na mìwlẹ ṣiatẹ do ohó ṣie go to zùngbo Zini tọn lọ mẹ wutu to wiwọ agùn lọ tọn mẹ, nado klan mi do wiwe to osìn lẹ lọ kòn to nukun yetọn lọ nukọn. (Ehelẹ wẹ osìn Meliba Kadesi tọn lẹ lọ tọn to zùngbo Zini tọn lọ mẹ.)

¹⁵ Moṣe sọ dọhó hlan OKLUNỌ lọ, dọmọ,

¹⁶ Gbọ OKLUNỌ lọ, Jiwheyẹwhe gbigbọ agbasalan lẹpo tọn lẹ lọ tọn, ni dè sunnu de do agùn lọ nu,

¹⁷ he sọgan jẹgbonu yì to yé nukọn, kavi sọgan wá hòmẹ to yé nukọn, podọ he sọgan plan yé jẹgbonu, podọ he sọgan hẹn yé wá hòmẹ; na agùn OKLUNỌ lọ tọn lọ tin di lẹngbọ he ma tindo lẹngbọhọtọ de blo.

¹⁸ OKLUNỌ lọ sọ dọ hlan Moṣe dọmọ, Yí Jọsua visunnu Nuni tọn lọ, dawe de mẹhe mẹ gbigbọ lọ te, bo zé alọ towe do e ji;

¹⁹ bo zé e do Eleazali yẹwhenọ lọ nukọn, podọ to agùn lọ lẹpo nukọn; bo sọ na aṣẹ de e to nukun yetọn mẹ.

²⁰ Hiẹ nasọ yí sọn yẹyi towe mẹ do e ji, na agùn ovi Islaeli tọn lẹ lọ tọn lẹpo nido sètónu.

²¹ Ewọ nasọ ṣite to Eleazali yẹwhenọ lọ nukọn, mẹhe na biọ na ẹn gbọn whẹ̀dida Ulimi lọ tọn lọ dali to OKLUNỌ lọ nukọn; ohó etọn ji wẹ yé na nọ jẹgbonu yì, podọ to ohó etọn ji wẹ yé na nọ wá họ̀mẹ, ewọ, po ovi Islaeli tọn lẹpo po gọ́na ẹn, yèdọ agùn lọ lẹpo.

²² Moṣe sọ wà dile OKLUNỌ lọ degbèna ẹn do: é sọ yí Jọṣua, bo zé e do Eleazali yẹwhenọ lọ nukọn, podọ to agùn lọ lẹpo nukọn:

²³ é sọ zé alọ etọn lẹ do e ji, bo sọ na asẹ de e, dile OKLUNỌ lọ dọhó do gbọn alọ Moṣe tọn lọ dali.