Osọha lẹ 18 - BIBLU WIWE LỌ 1923

¹ OKLUNỌ lọ sọ dọ hlan Aalọn dọmọ, Hiẹ po visunnu towe lẹ po po owhe otọ́ towe lẹ tọn po gọ́na we na zé oylanwà fiwiwe lọ tọn hẹn: podọ hiẹ po visunnu towe lẹ po gọ́na we na zé oylanwà yẹwhenọzón mìtọn tọn lọ hẹn.

² Podọ mẹmẹsunnu towe lẹ ga, whẹndo Levi tọn lọ, whendo otọ towe tọn lọ wẹ hiẹ na hẹnwá sẹpọ́ de we, na yé nido yin kinkọ̀ndopọ hlan we, bo sọ nọ wàdevizọ́n hlan we: ṣigba hiẹ po visunnu towe lẹ po gọ́na we na tin to ogohò kunnuhó lọ tọn nukọn.

³ Ye na payi asẹ towe go, podọ asẹ Ogohò lọ tọn lẹpo: yé ma na sẹpọ́ wá jẹ núzinzán fiwiwe lọ tọn lẹ podọ je agbà lọ kòn jãnwẹ, na yé do kinblo yéwlẹ, po mìwlẹ po.

⁴ Yé nasọ yin kinkòndopọ hlan we, bo sọ nọ payi asẹ ogohọ̀ opli tọn lọ tọn go, na sinsẹ́nzọn Ogohò lọ tọn lẹpo: ojóno de ma na wá sẹpọ́ mì de gba.

⁵ Míwlẹ na nọ payi asẹ fìwiwe lọ tọn go, po asẹ agbà lọ tọn po: na homẹgble ma nasọ do tin finẹ to ovi Islaeli tọn lẹ lọ ji ba gba.

⁶ Podọ Yẹn, dayi e go, Yẹn ko dè mẹmẹsunnu mìtọn lẹ Levinu lẹ lọ sọn ṣẹnṣẹn ovi Islaeli tọn lẹ lọ: nunina de wẹ yé hlan mì, nina hlan OKLUNỌ lọ, nado wà sinsènzọn ogohọ̀ opli tọn lọ tọn.

⁷ Podọ hiẹ po visunnu towe lẹ po gọ́na we na nọ payi yẹwhenọzọ́n mìtọn go na onú agbà lọ ton lẹpo, podo na ehe avọ̀ajlalanọ lọ hòme; mìwlẹ nasọ nọ sèn: Yẹn na yẹwhenọzón lọ mì di sinsẹ̀nzọ́n nunina tọn de: podọ ojónọ lọ he wá sẹpọ́ na yín hùhú.

⁸ OKLUNỌ lọ sọ dọhó hlan Aalọn, dọmọ, Podọ yẹn, dayi e go, Yẹn ko na asẹ avọ́nunina zédlanga ṣie tọn lẹ we, yèdọ onú hihiọ ovi Islaeli tọn lẹ tọn lẹpo, hiẹ wẹ yẹn yí yé na na mimá de, podọ hlan visunnu towe lẹ di onújọ de kakadoi.

⁹ Ehe wẹ na yín towe sọn onú wiwe talala lẹ lọ mẹ, hihladai sọn miyọn lọ me: avọ́nunina yetọn lẹpo, yèdọ avọ́nunina jinulili yetọn lẹpo, po avọ́nunina ylando tọn yetọn lẹpo po, po avọ́nunina whègbledo yetọn tọn lẹpo po, he yé na hlan mi na yín wiwe talala na we podọ na visunnu towe lẹ

¹⁰ Di onú wiwe talala lọ wẹ hiẹ na do dù sọn e mẹ: sunnusi lẹpo wẹ na dù sọn e mẹ; é na yín wiwe hlan we.

¹¹ Podọ ehe wẹ towe; avọ́nunina zédlanga nunina yetọn tọn lọ, yèdọ avọ́nunina zéhia ovi Islaeli tọn lẹ lọ tọn lẹpo: Yẹn ko yí yé na we, podọ hlan visunnu towe lẹ podọ hlan viyọnnu towe lẹ gọ́na wẹ, di onújọ de kakadoi: omẹ he yín wiwe to owhé towe gbè na nọ dù sọn e mẹ.

¹² Dagbedagbe amì lọ tọn lẹpo, podọ dagbedagbe vẹnsinsén-tọn lẹpo, po gbadó lọ tọn po, sinséntintan yé tọn he yé na hlan OKLUNỌ lọ, hiẹ wẹ yẹn ko na yé hlan.

¹³ Bibiatintan sinsẹ́n he tin to aigba yetọn ji lẹpo tọn, he yé hẹnwá OKLUNỌ lọ de, na yín towe; omẹ he yín wiwe to owhé towe gbè lẹpo na dù sọn e mẹ.

¹⁴ Onú klandovo to Islaeli mẹ lẹpo na yín towe.

¹⁵ Onú he hùn adò lẹpo, sọn olàn he yé yína hlan OKLUNỌ lọlẹpo mẹ, gbẹtọ po kanlin po tọn, na yín towe: ṣigba oplọnji gbẹtọ tọn wẹ hiẹ na fli dandan, po oplọnji kanlin mawé lẹ tọn po wẹ hiẹ na fli.

¹⁶ Enẹlẹ he tin nado yín fifli sọn yé mẹ sọn osùn dopo mẹho mẹ wẹ hiẹ na fli, kẹdẹdi ahidona towe, na akuẹ ṣekẹli atón tọn lọ, kẹdẹdi ṣekẹli fìwiwe lọ tọn (dopolọ wẹ gela òko).

¹⁷ Ṣigba oplọnji oyin de tọn, kavi oplọnji lẹngbọ de tọn, kavi oplọnji gbọgbọe de tọn, hiẹ ma na fli gba; wiwe wẹ yé: hiẹ na mì ohùn yetọn do agbà lọ ji, bo nasọ nọ mẹ ojó yetọn na avọ́nunina mimẹ de yè basi gbọn miyọn dali, na owán vivi de hlan OKLUNỌ lọ.

¹⁸ Olàn yé tọn bo na yín towe, di akón zéhia lọ podọ di asá adusi lọ, é na yín towe.

¹⁹ Avọ́nunina zédlanga onú wiwe tọn lẹ lẹpo he ovi Islaeli tọn lẹ lọ yína hlan OKLUNỌ lọ, wẹ yẹn ko na we, po visunnu towe lẹ po po viyọnnu towe lẹ po gọ́na we, di onújọ de kakadoi: alènu ojẹ̀ tọn de wẹ kakadoi to OKLUNỌ lọ nukọn hlan we podọ hlan okún towe gọ́na we

²⁰ OKLUNỌ lọ sọ dọ hlan Aalọn dọmọ, Hiẹ ma na tindo ogú de to aigba yetọn mẹ gba, mọ hiẹ ma na tindo mimá depope to yé ṣẹnṣẹn gba: Yẹn wẹ mimá towe po ogú towe po to ovi Islaeli tọn lẹ lọ ṣẹnṣẹn.

²¹ Podọ hlan ovi Levi tọn lẹ lo, dayi e go, yẹn ko yí madao lẹpo lọ to Islaeli mẹ nana ogú de to ahósu mẹ na sinsẹ̀nzọ́n yetọn he yé do sẹn, yèdọ sinsẹ̀nzọ́n ogohò opli tọn lọ tọn.

²² Podọ sọndinvie ovi Islaeli tọn lẹ lọ ma na wá sẹpọ́ ogohò opli tọn lọ gba, yé nikã zé ylando hẹn, bo kú.

²³ Ṣigba Levinu lẹ na nọ wà sinsẹ̀nzọ́n ogohọ̀ opli tọn lọ tọn, yé bo nasọ nọ zé oylanwà yetọn hẹn: é na yín aṣẹdai de kakadoi gbọn whẹndo mìtọn lẹ mẹ, podọ yé ma na tindo ogú de to ovi Islaeli tọn le lọ ṣẹnṣẹn gba.

²⁴ Na madao ovi Islaeli tọn lẹ lọ tọn, he yé yína di avọ́nunina zédlanga de hlan OKLUNỌ lọ, yẹn ko na hlan Levinu lẹ lọ na ogú de: enẹwutu yẹn ko dọ hlán yé dọ. Yé ma na tindo ogú de to ovi Islaeli tọn lẹ lọ ṣẹnṣẹn gba.

²⁵ OKLUNỌ lọ sọ dọhó hlan Moṣe, dọmọ,

²⁶ Humọ hiẹ na dọhó hlan Levinu lẹ lọ, bo dọ hlan yé dọmọ, Whenuena mì yí madao sọn ovi Islaeli tọn lẹ si he yẹn ko na mì sọn yé mẹ na ogú mìtọn, whenẹnu mì na yí avọ́nunina zédlanga dẹ na sọn e mẹ na OKLUNỌ lọ, madao madao lọ tọn de.

²⁷ Avọ́nunina zédlanga mìtọn na yín linlẹn hlan mì, di é yín gbadó vẹngbà lọ tọn, podọ di ogigọ́ ovẹnzinnú lọ tọn.

²⁸ Le wẹ mìwlẹ ga na yí avọ́nunina zédlanga de na hlan OKLUNỌ lọ sọn madao mìtọn lẹpo mẹ, he mìwlẹ mọyí sọn ovi Islaeli tọn lẹ de; podọ enẹwutu mì na nọ na avọ́nunina zédlanga OKLUNỌ lọ tọn hlan Aalọn yẹwhenọ lọ.

²⁹ Mì ná nọ yí avọ́nunina zédlanga OKLUNỌ lọ tọn na sọn nunina mìtọn lẹpo mẹ, sọn dagbedagbe etọn lọ lepo mẹ, yèdọ ehe hihiọ etọn lọ sọn e mẹ.

³⁰ Enẹwutu hiẹ na dọ hlan yé dọmọ, Whenuena mìlẹ zédlanga sọn dagbedagbe etọn mẹ, whenẹnu é na yín linlẹn hlan Levinu lẹ lọ di ojideji ovẹngbà lọ tọn, podọ di ojideji ovẹ̃nzinnú: lọ tọn.

³¹ Podọ mìwlẹ na nọ dù i to otẹn popo mẹ, mì po whégbè tọ mìtọn lẹ po: na ale mìtọn wẹ to ahósu mẹ na sinsẹ̀nzọ́n mìtọn to ogohò opli tọn lọ mẹ.

³² Mìwlẹ ma nasọ zé ylando de hẹn na e tọn wutu gba, whenuena mì ko zédlanga sọn e mẹ dagbedagbe etọn lọ: podọ mìlẹ ma na flu onú wiwe ovi Islaeli tọn lẹ lọ tọn gba, mọ mì ma sọ to na kú gba.