Osọha lẹ 13 - BIBLU WIWE LỌ 1923

¹ OKLUNỌ lọ sọ dọhó hlan Moṣe, dọmọ,

² Hìẹ ni do sunnusi lẹ hlan na yé nido bẹ̀ aigba Kanani tọn lọ pọ́n, he yẹn na hlan ovi Islaeli tọn lẹ lọ: omẹ dopo sọn whẹndo otọ yetọn lẹ tọn dopodopo mẹ wẹ mì na dohlan, omẹ dopodopo ogan de to yé ṣẹnṣẹn.

³ Moṣe bo do yé hlan sọn zùngbo Palani tọn mẹ kẹdẹdi gbèdide OKLUNỌ lọ tọn: popo yé tọn sunnusi mẹhe yín nukọntọ ovi Islaeli tọn lẹ lọ tọn lẹ.

⁴ Podọ ehelẹ wẹ oyín yetọn lẹ: sọn whẹndo Lẹubeni tọn lọ mẹ Samua visunnu Zakuli tọn lọ.

⁵ Sọn whẹndo Simeoni tọn lọ mẹ, Safati visunnu Holi tọn lọ.

⁶ Son whẹndo Juda tọn lọ me, Kalẹbi visunnu Jẹfunne tọn lọ.

⁷ Sọn whẹndo issakali tọn lọ mẹ, Igali visunnu Josẹfu tọn lọ.

⁸ Sọn whẹndo Eflaimi tọn lọ mẹ, Hosea visunnu Nuni tọn lọ.

⁹ Sọn whẹndo Bẹnjamini tọn lọ mẹ, Palti visunnu Lafu tọn lọ.

¹⁰ Sọn whẹndo Zẹbuluni tọn lọ mẹ, Gadieli visunnu Sọdi tọn lọ

¹¹ Sọn whẹndo Josẹfu tọn lọ mẹ, ene wẹ nadọ dọ, sọn whẹndo Manasse tọn lo mẹ, Gaddi visunnu Susi tọn lọ.

¹² Son whẹndo Dani tọn lọ mẹ, Amiẹli visunnu Gemali tọn lọ.

¹³ Sọn whẹndo Aṣeli tọm, lọ mẹ, Sẹtuli visunnu Mikaeli tọn lọ.

¹⁴ Sọn whẹndo Naftali tọn lọ mẹ, Nabi visunnu Vọfsì tọn lọ.

¹⁵ Sọn whẹndo Gadi tọn lọ mẹ, Geueli visunnu Maki tọn lọ,

¹⁶ Ehelẹ wẹ oyín omẹ he Moṣe dohlan nado bẹ aigba lọ pọn lẹ lọ tọn Moṣe sọ ylọ Hosea visunnu Nuni tọn lọ dọ Jọsua.

¹⁷ Moṣe sọ do yé hlan nado bẹ̀ aigba Kanani tọn lọ pọ́n, bo dọ hlan ye dọmọ, Mì hẹ́ji gbọn aliho he to hùwaji mẹ, bo yì aga biọ osé lẹ lọ mẹ:

¹⁸ bo sọ pọ́n aigba lọ, núhe é yín; eyín po gbẹtọ he nọnọ̀ e mẹ finẹ lẹ po, yé yín huhlọnnọ kavi madogánnọ, eyín yé yín vude kavi susu;

¹⁹ podọ etẹwe aigba he ji yé te lọ yín, eyín é yín dagbe kavi gbigble; podọ tòdaho hè mẹ yé nọnọ̀ lẹ lọ etẹwẹ yé yín, eyín osla lẹ mẹ wẹ, kavi figángán lẹ mẹ;

²⁰ podọ nawẹ aigba lọ te, eyín é yín ojinọ kavi kúkú, eyín atin tin to e mẹ kavi lala. Mì ni bo yín tudotọ dagbe tọn, bo sọ hẹn sọn sinsẹ́n aigba lọ tọn mẹ wá. Dinvie ojlẹ lọ yín ojlẹ sinséntintan ovẹ̃n lẹ lọ tọn.

²¹ Mọwẹ yé yì aga bo bẹ́ aigba lọ pọ́n sọn zùngbo Zini tọn mẹ jẹ Lehobi, jẹ bibiọ Hamati tọn mẹ.

²² Yé sọ yì aga to huwaji lọ mẹ, bo wá jẹ Hebloni; po Ahimani po, Ṣeṣai, po Talmai po, visunnu Anaki tọn lẹ lọ tin fìnẹ. (Dinvie yè do Hebloni owhè ṣinawe jẹnukọnna Zoani to Egipti mẹ.)

²³ Yé sọ wá jẹ agbàdo Ẹskoli tọn lọ mẹ, bo sán atinla de sọn finẹ po ohín ovẹ̃nsinsẹ́n lẹ tọn dopo po, yé sọ zé e hẹn to opò de ji to omẹ awe ṣẹnṣẹn; yé hẹn sọn pomeglanate lẹ lọ mẹ wá ga, podọ sọn ovòtin lẹ lọ mẹ.

²⁴ Yè nọ ylọ ofi nẹ dọ agbàdo Ẹskoli tọn, na ohín he ovi Islaeli tọn lẹ lọ sán sọn fìnẹ tọn wutu.

²⁵ Yé bo sọ lẹ́gọ̀ sọn bíbẹ́pón aigba lọ tọn mẹ to opòdo azán kande tọn.

²⁶ Yé bo sọ yì bo wá Moṣe de, po Aalọn po de, podọ to agùn ovi Islaeli tọn lẹ lọ tọn lẹpo de, jẹ zùngbo Palani tọn lọ mẹ, to Kadẹsi; bo hẹn ohó gò wá jẹ yé de, podọ jẹ agùn lọ lẹpo de, bo do sinsẹ́n aigba lọ tọn lọ hia yé.

²⁷ Yé sọ dọ nẹ, bo dọmọ, Mí wá jẹ aigba lọ ji fie hiẹ do mí hlan, podọ nugbonugbo é yi oyìnmó po owín po do to sisà; ehe bo sọ wẹ sinsẹ́n e tọn lọ.

²⁸ Ṣigba gbẹtọ he nọnó aigba lọ mẹ lẹ lọ yín huhlọnnọ, podọ tòdaho lẹ lọ odòkọnọ wẹ, bo sọ klo talala: podọ humọ mí mọ ovi Anaki tọn lẹ lọ to finẹ.

²⁹ Amalẹki nọnọ̀ aigba huwaji tọn lọ mẹ: podọ Hitinu lọ, po Jẹbusinu lọ po, po Amolinu lọ po, nọnọ̀ osé lẹ lọ mẹ: podọ Kananinu lọ nọnọ̀ ohù lọ dali, podọ to agbègbèji awà Jọdani tọn lọ dali.

³⁰ Kalẹbi bo sọ hògbèdonùna gbẹtọ lẹ lọ to Moṣe nukọn, bo dọmọ, Mì gbọ mí ni hẹji yì hadopo, bo tindo e; na mí tin dagbedagbe sọgan nado glo e.

³¹ Ṣigba omẹ he yì po e po lẹ lọ dọmọ, Mí ma tin sọgan nado hẹji yì gbẹtọ lẹ lọ ji gba; na yé yín huhlọnnọ hú mí.

³² Yé bo sọ hẹn ogbèdido ylankan aigba he yé ko bèpọn lọ tọn de wá jẹ ovi Islaeli tọn lẹ lọ de, dọmọ, Aigba lọ, ehe mẹ mí ko yí nado bèpón ẹn, yín aigba de he nọ dù tòmẹnu etọn lẹ lọ; podọ gbẹtọ he mí mọ to e mẹ lẹpo yín omẹ he klo bo tónalun.

³³ Podọ mí sọ mọ Nẹfilimi lọ fìnẹ, visunnu Anaki tọn lẹ lọ, he sọn Nẹflimi mẹ wá: mìwlẹ bo sọ tin to nukun mí lọsu tọn mẹ di agbònọpatin lẹ, podọ mọwẹ mí bo sọ te to nukun yetọn mẹ.