OHÀN SỌLỌMỌNI TỌN 7 - BIBLU WIWE LỌ 1923

¹ NAWẸ afọ towe yín whanpenọ to afọpa mẹ dole, hiẹ ahọvi! Lògomẹ towe taidi Asọdonu alọnuzọ́n anawàtọ nuyọnẹntọ de tọn.

² Ahón towe taidi kọfo He ma nọmatindo ahàn, Adọmẹ towe taidi okiti olì tọn He yè yí lĩ lédo.

³ Anó towe awelẹ taidi owhín pẹvipẹvi awe He basi adódopomẹ tọn.

⁴ Okọ̀ towe taidi atọhó ajannaku-dú tọn: Nukun towe taidi osìn hihla to Hẹṣbọni, to dòkọnu Batlabbimi tọn: Awọntin towe di atọhò Lẹbanọni tọn He pannukọn Damasku dali.

⁵ Ota he tin okọ̀ towe nu taidi Kalmẹli, Oda he tin ota na we di pulpili; Yè yí oda mablamabla towe do hẹn ahọlu go.

⁶ Nawẹ hiẹ yín whanpẹnọ podọ osánnọ sọ, Hiẹ mẹyiwanna ṣie to vivi owanyi tọn mẹ

⁷ Ote towe he taidi odétìn tọn, Anọ́ towe di ohín ovẹ̃n tọn.

⁸ Yẹn dọ, yẹn na hẹ́ odétin ji yì, Yẹn na hẹn alọ etọn go: Humọ dinvie anọ́ towe na taidi ohín ovẹ̃n tọn, Podọ owán awòntin towe mẹ tọn di appili;

⁹ Onù towe di vẹ̃nhàn he yọ́n hugán, He jẹte dẹ̃dẹ na meyiwanna ṣie, He to nuflo yé he damlọn lẹ tọn hẹn dọhó.

¹⁰ Mẹyiwanna ṣie tọn wẹ yẹn, Ojlo etọn sọ tin to ogo e.

¹¹ Wá, mẹyiwanna ṣie, gbọ mi ni yì danji; Gbọ mí ni nõ tòpẹvi nẹlẹ́ mẹ.

¹² Gbọ mí ni fọ́n yì vẹ̃ngle mẹ to afọ́nnufù; Gbọ mí ni pọ́n eyín vòvó ovẹ̃ntin tọn ko kẹ̀, Podọ eyín atin glanadi tọn ko gbakẹ̀n: Finẹ wẹ yẹn na yí owanyi ṣie na we te.

¹³ Mandlaki sinsẹ́n lẹ na owán omẹ, Hòngbo mítọn ji wẹ sinsẹn hunkọ hunkọ he jlomẹ te, Yọ́yọ́ po hóhó po he yẹn ko sọ sẹ̀do na we, hiẹ mẹyiwanna ṣie.