OHÀN SỌLỌMỌNI TỌN 5 - BIBLU WIWE LỌ 1923

¹ Yẹn jẹ opá ṣiẹ mẹ, nọviyọnnu ṣie, yọnnu-yọ́yọ́, Yẹn ko bẹ́ ozúya ṣie po nuyònwán ṣie po pli: Yẹn ko dú wínjá ṣie po owín ṣie po; Yẹn ko nù vẹn ṣie po yìnnò po: Mì dùnú, mì họ́ntọn emì; Nù, yèdọ mì ni nù sù, mì mẹyiwanna lẹ.

² Yẹn damlọn, ṣigba ayiha ṣie fọ́n, Ogbè mẹyiwanna ṣie tọn to ohọ̀n húhú, dọmọ; Hùnhòn na mi, nọviyọnnu ṣie, mẹyiwanna ṣie, owhle ṣie, apàmagonanọ ṣie: Na otù ṣie gò na ahún, Podọ bibla oda ṣie tọn na kùnkùn ozánmẹ tọn.

³ Yẹn ko dè agawu ṣie; na yẹn na zé e do do? Yẹn ko klọ̀ afọ ṣie, na yẹn na hẹn ẹn zùn mawé do?

⁴ Mẹyiwanna ṣie dè alọ etọn gbọn nuvo ohọ̀n tọn mẹ, Hòmẹ ṣie sọ hùn do e go.

⁵ Yẹn fòn nado hùnhòn na mẹyiwanna ṣie, Ozúya sọ to kùnkùn to alọ mẹ na mi, Po ozúya owán vivinọ po sọn alọviyẹyé ṣie go, To alọhẹn osavi tonji.

⁶ Yẹn hùnhòn na mẹyiwanna ṣie; Ṣigba mẹyiwanna ṣie ko jagọ̀ yì godo, é ko yì: Ayiha míyan mi whenuena é dọhó, Yẹn din in, ṣigba yẹn ma mọ ẹn, Yẹn ylọ ẹ, ṣigba é ma sìọ mi.

⁷ Nuhọ̀tọ he to zọnlinzin lẹdo otò lẹ mọ mi, Yé linú mi, bo sọ húnú mi, Nuhọ̀tọ lẹ yí tùnudo ṣie to asi e.

⁸ Yẹn degbèna mì, mì viyọnnu Jelusalẹm tọn emì, eyín mì mọ mẹyiwanna ṣie, Etẹ mì na dọ nẹ̃? Dọ yẹn to azọ̀n owanyi tọn jẹ.

⁹ Eté mẹyiwanna towe yín hú mẹyiwanna dẽlẹ, Hiẹ whanpẹnọ hugán to yọnnusi lẹ mẹ? Etẹ mẹyiwanna towe yín hú mẹyiwanna dèlẹ, Bọ hiẹ do to dẹ̀hòdo mí do mọ?

¹⁰ Mẹyiwanna ṣie wé, bo sọ bia, E tindo yẹyi hú omẹ susu.

¹¹ Ota etọn taidi sika he yòn hugán, Bibla oda etọn tọn taidi azàn, bo sọ diyù taidi ohòn de.

¹² Nukun etọn taidi owhle to otọ̀ tó, He yè yí yìnnò do lẹawu na, bo sọ tin to jijọho mẹ.

¹³ Alaka etọn taidi owhẹ̀n nuwhẹnkún tọn, di owán vivinọ, Nuflo etọn di vòvó li, é to ozúya owán vivinọ kùn dai.

¹⁴ Alọ etọn taidi sika-lọkẹ he yè yí bẹlili do tò lédo, Agbasa etọn di ajannaku-dú sisé he yè yí safili do bú.

¹⁵ Asapada etọn di dòtin malbili tọn, he yè zé do nuvo sika dagbedagbe tọn mẹ; Nukunmẹ etọn taidi Lẹbanọni, húhú etọn di atin Kedali tọn.

¹⁶ Onù etọn vivi gbahu: yèdọ é jlomẹ pó. Ehe wẹ mẹyiwanna ṣie, ehe sọ wẹ họntọn siẹ, Mì viyọnnu Jelusalẹm tọn emì.