OHÀN SỌLỌMỌNI TỌN 4 - BIBLU WIWE LỌ 1923

¹ PỌN, hiẹ whanpẹnọ, mẹyiwanna ṣie; pọ́n, whanpẹnọ wẹ hiẹ; Hiẹ tindo nukun owhle tọn to nukunmẹṣinyọnnutòwe glọ. Oda towe taidi bẹ́dopọ gbọgbọẹ tọn, He mlọnai to osé Gileadi tọn ji.

² Adú towe taidi bẹ́dopọ lẹngbọ tọn he yè pa ofún na, He jẹte sọn otẹn awulẹ tọn mẹ ja; Dopodopo yetọn tindo aweawe, Depope ma jọwẹ̀nsinọ to yé mẹ.

³ Nuflo towe taidi sekan vẹ̃, Ogbè towe sọ vivi: Alaka towe taidi kikẹ̀ glanadi dopo tọn to Nukunmẹṣinyọnnu towe glọ.

⁴ Okò towe taidi atọhọ Davidi tọn he yè gbá na núsọdogo, Ehe ji gaglo fọtọ́n pla do, Popo lẹpo sàgba huhlọntọ lọ tọn.

⁵ Anọ́ towe awẹlẹ taidi ówhín pẹvi asi àwe he basi adódòpomẹ tọn, He tó dùdù to vòvó li ṣẹnṣẹn.

⁶ Kaka okle na do vò, bọ oyè na do họ́n yì, Yẹn na yì osé daho ozúya tọn ji, Podọ okọ́ta pẹvipọvi núwhẹnkún tọn ji.

⁷ Hiẹ yín whanpẹnọ pó, mẹyiwanna ṣie: Apà depope ma tin to ogo we.

⁸ Mí yì sọn Lẹbanọni mẹ, yọnnu yọ́yọ́ ṣie, Mí ni yì sọn Lẹbanọni: Pọ́n sọn osé Amana tọn ji, Sọn osé Ṣẹnili po Hẹlmọni tọn po ji, Sọn odò kinnikinni tọn mẹ, Sọn osó opọ̀ lẹ tọn ji.

⁹ Hiẹ ko yí ayiha ṣie to asi e, nọviyọnnu ṣie, yọnnu-yọ́yọ́! Hiẹ ko yí dopo tò nukun towe lẹ mẹ, podọ dopo to pinpọ́n nukun towe tọn mẹ, Podọ dopo to gòdè okọ́ towe tọn mẹ do yí ayiha ṣie to asi e.

¹⁰ Na owanyi towe yín whanpẹnọ sọ, nọviyọnnu ṣie, yọnnu-yọ́yọ́ ṣie Na owanyi towe pọnte hú vẹ̃nhàn sọ Owán nusisá towe tọn sọ hú nuwhẹnkún lẹpo tọn.

¹¹ Nuflo towe, yọnnu-yọ́yọ́ ṣie, to kùnkùn di owínjá: Owín po yìnnò po tin to odẹ́ towe glọ; Owán avọ̀ towe tọn sọ taidi owán Lẹbanọni tọn.

¹² Opá hihla de wẹ nọviyọnnu ṣie, yọnnu-yọ́yọ́: Asisanu he yè súsú de, whínnu yè súnùsúna de.

¹³ Onú didó towe lẹ opá glanadi tọn wẹ yé, yé pọ sinsẹ́n he jlomẹ po; Kipplẹsi po maldi po.

¹⁴ Naldi po Sadoni po; Kalamusi, kinamọni po atin nuwhẹnkún tọn lẹ po; Ozúya po alo po, po tado nuyọnwan lẹpo po tọn.

¹⁵ Asisanu to opá odòtọ osìn ogbẹ́ tọn mẹ, He to sisa sọn Lẹbanọni.

¹⁶ Fú, jẹhọn agewaji tọn; bo wá, hiẹ ohùwaji; Yin do opá ṣie ji, na owán ohò etọn mẹ tọn ni do sà jẹgbonu: Gbọ mẹyiwanna ṣie ni wá opá etọn mẹ, Bo dù sinsẹ́n dagbedagbe etọn.