OHÀN SỌLỌMỌNI TỌN 2 - BIBLU WIWE LỌ 1923

¹ YẸN tindo võvo Saloni tọn, Po vòvó lì agbadòmẹ lẹ tọn po.

² Le vòvó lí de te to ṣẹnṣẹn owuntọn, Mowẹ mẹyiwanna ṣie te to viyọnnu lẹ ṣẹnṣẹn.

³ Le atin he nọ sén te to atin zungbo mẹ tọn lẹ ṣẹnṣẹn, Mọwẹ mẹyiwanna ṣie te to visunnu lẹ ṣẹnṣẹn. Yẹn yí ayajijẹ daho do sinaì to oyẹ́ etọn glọ, Sinsén etọn sọ tín vivi mẹ jẹ odọpọ́n ṣie.

⁴ E hẹn mi wá ohọ̀ vẹ̃nhàn tọn mẹ, Owanyi wẹ awhànsia etọn to oji e.

⁵ Yí akla vivi do hẹn mi dote, yi sinsẹ́n atin tọn do mìọnhomẹna mi, Na yẹn to azọ̀n owanyi tọn jẹ.

⁶ Amìyọnlọ etọn tin to ota ṣie glọ, Adusilọ etọn sọ dọ̀n mi do ogo.

⁷ Yẹn yí owhín asi po agbanlin asi ozùnmẹ tọn po do dègbèna mì, Mì viyọnnu Jelusalẹm tọn emì, Dọ mì doadán mẹyiwanna ṣie blo, mì sọ fọ́n ẹn blo, Kaka ewọ lọsu na do jlo.

⁸ Ogbè mẹyiwanna ṣie tọn! pọ́n é ja, E to linlọn to osé lẹ ji, é to linlọn to okọta lẹ ji,

⁹ Mẹyiwanna ṣie taidi owhín asi kavi di ovi agbanlin tọn: Pọ́n, é nọte to adó mítọn godo, E pọ́n gbonu hlan sọn vẹsẹnu, E to ede dohia gbọn vẹsẹnu.

¹⁰ Mẹyiwanna ṣie dọhó, bo sọ dọ hlan mi dọ, Fọ́n, mẹyiwanna ṣie, whànpẹnọ ṣie dopo, tón na mí ni yì.

¹¹ Pọ́n, avivọ whenu ko yì, Jikun ko gbò, bo sọ yì;

¹² Vòvó amà tọn lẹ ko sọ awuhia to aigba; Ohàn jiji whenu ohó lẹ tọn wá, Yè sọ sè ogbè owhle lẹ tọn to aigba mítọn ji.

¹³ Ovotin sẹ́n sinsẹ́n yọ́yọ́, Vẹ̃ntin gbọn vòvó etọn mẹ Na owán dagbedagbe omẹ. Fọ́n mẹyiwanna ṣie, whànpẹnọ ṣie dopo, bo tón na mí ni yì.

¹⁴ Owhle ṣie, he tin to gblagbla osé tọn mẹ, To oglọ zánnu tọn, Gbọ yẹn ni mọ nukunmẹ towe, gbọ yẹn ni sè ogbè towe; Na vivi wẹ ogbè towe; nukunmẹ towe sọ yónwhanpẹ.

¹⁵ Wle wọtupoẹ lẹ na mí, wọtupọẹ pẹvipẹvi he to vẹ̃n hẹngble lẹ: Na vẹ̃n mítọn ko dosé wutu.

¹⁶ Mẹyiwanna ṣie, ṣie wẹ, etọn sọ wẹ É to dùdù to li lẹ ṣẹnṣẹn.

¹⁷ Kaka ai na do họ́n, kaka oyẹ̀ na do họ̀n yì, Mẹyiwanna ṣie, lẹgọ̀, na hiẹ ni sọ taidi owhín asi Kavi ovi agbanlin tọn to osé Bileh tọn lẹ ji.