OHÀN SỌLỌMỌNI TỌN 1 - BIBLU WIWE LỌ 1923

¹ OHÀN ohàn lẹ tọn he yín Sọlọmọni tọn.

² Gbọ ni yí nùdonugo onù etọn tọn pó onù ṣie, Na owanyi towe pónte hu vẹ̃nhàn.

³ Na owán nusisá dagbe towe tọn wutu, Oyín towe taidi nusisá he yè túntún jẹgbonu, Enẹwutu wẹ awhli lẹ yiwanna we.

⁴ Dòn mi; mí na họnwezun wá dewe; Ahọlu ko hẹn mi wá abò etọn mẹ: Milẹ na jaya, homẹ mítọn na sọ hùn do ogo we, Milẹ na flin hó owanyi towe tọn dọ hú vẹ̃nhàn: Yé yiwanna we jlọjlọ.

⁵ Yẹn diyũ, ṣigba whànpẹnọ, Mì viyọnnu Jelusalẹm tọn lẹ E, Di oflò Kadali tọn lẹ, Di avọ̀ dido Sọlọmoni tọn lẹ.

⁶ A pọ́n mi, na yẹn diyù wutu blo, Na owhè dẹkòpón mi wutu; Ovi onọ ṣie tọn lẹ homẹgble do ogo e; Yé yí mi do basi hihótọ vẹ̃ngle tọn; Ṣigba vẹ̃ngle ṣie lọsu go wẹ yẹn ma pọ́n.

⁷ Dọ na mi, hiẹ mẹhe ayiha ṣie yiwanna, Fie hiẹ to lẹngbọ hó te; Fie hiẹ nọ hẹn ogbọpó Towe gbọjẹ te to okle;

⁸ Eyín hie ma yọnẹn, hiẹ whànpẹnọ daho to yọnnu lẹ mẹ, Tọ́n yì gbọn omọ́ ogbọpó tọn ji, Bo sọ yìn ovi gbọgbọẹ lọn lẹ to oflò lẹngbọhtọ lẹ tọn dali.

⁹ Hóntọn ṣie È, yẹn ko yí we jlẹ Do osé ṣie go to kẹkẹ Falo tọn mẹ.

¹⁰ Àlaka towe yónwhanpẹ to bẹ́pli asọdonu lẹ tọn mẹ, jọi Okò towe to ojé sika tọn mẹ.

¹¹ Mílẹ na basi bépli asọdonu sika tọn na we, Po ohia fataka tọn po.

¹² Whenuena ahọlu tin to núdù tafo etọn ji, Amì ṣie dè owán etọn jẹgbonu.

¹³ Odi ozúya tọn wẹ mẹyiwanna ṣie yín na mi; Ewọ na nọnó ṣẹnṣẹn akọ́n ṣie tọn.

¹⁴ Mẹyiwanna ṣie taidi odi amakikọ́ atin kiplessi tọn To vẹ̃ngle Engẹdi tọn mẹ.

¹⁵ Pọ́n, owanyi ṣie, hiẹ whanpẹnọ; pọ́n, hiẹ whanpẹnọ: Hiẹ tindo nukun owhle tọn.

¹⁶ Pọ́n mẹyiwanna ṣie, hiẹ whanpẹnọ, nugbo, a jlo mi: Dagbedagbe sọ wẹ adọzàn mítọn ga.

¹⁷ Atin Kedali tọn wẹ lidemẹ atin ohò mítọn tọn, Núglatin mítọn wẹ atin fili tọn.