NẸHEMIA 9 - BIBLU WIWE LỌ 1923

¹ DINVIE to azán kònukunẹnẹtọ osùn he tọn mẹ wẹ yè yí nùbibla, po odẹ́vò po, po kọ́gudu po to yé ji, do bẹ́ ovi Islaeli tọn lẹ pli.

² Okún Islaeli tọn lẹ sọ klán yéde dòvo sọn ojonọ lẹ mẹ, bo ṣite bo sọ to ogbè ylando yetọn lẹ tọn yi, po ylanwà otọ́ yetọn lẹ tọn po.

³ Yé sọ fọ́n ṣite to otẹn yetọn mẹ, bo hia to owé osẹ́n OKLUNỌ Jiwheyẹwhe yetọn tọn mẹ adà ẹnẹtọ okle tọn de; podọ adà ẹnẹtọ dẽvo yé yígbèna, bo litaina OKLUNỌ Jiwheyẹwhe yetọn.

⁴ Yé fọ́n ṣite to aila Levinu lẹ, Jeṣua, po Bani po, Kadiniẹli, Ṣebania, Buni, Ṣelebia, Bani, po Kenani po tọn lẹ ji, bo yí ogbe lélé de do dawhá hlan OKLUNỌ Jiwheyẹwhe yetọn.

⁵ Whenẹnu wẹ Levinu lẹ, Jeṣua, po Kadiniẹli po, Bani, Hasabneia, Ṣelebia, Hodia, Sebatìia, po Petahia po, dọmọ, Mì fọ́n tite bo dona OKLUNỌ Jiwheyẹwhe mítọn sọn madopodo jẹ madopodo: podọ donanọ oyìn gigonọ towe yín, he yè zedaga hugan odona po pipà lẹpo po.

⁶ Hiẹ wẹ OKLUNỌ, yèdọ hie sokẹde; hiẹ wẹ basi olọn, òlọn olọn lẹ tọn po awhànpa yetọn lẹpo po, aigba po onú he tin to e ji lẹpo po, ohù lẹ po ehe tin to yé mẹ lẹpo po, hiẹ sọ to yé mẹpo hla dai; awhànpa olọn tọn sọ to taliana we

⁷ Hie wẹ OKLUNỌ Jiwheyẹwhe lọ, mẹhe dè Ablam, bo sọ hẹn ẹn tón sọn Ulli Kaldianu lẹ tọn me, bo na ẹn oyín Ablaham tọn;

⁸ bo sọ mọ ayiha nugbonọ etọn to nukọn towe, bo sọ basi alẹ̀nù de po e po nado yí aigba Kananinu lẹ, Hitinu le, Amọlinu lẹ, po Pelizinu lẹ po, po Jebusinu lẹ po, po Gilgasinu lẹ tọn po nẹ̃, yedo nado yí i na okún etọn, bo ko sọ yí ohó towe lẹ basi; na dódónọ wẹ hiẹ.

⁹ Podọ hiẹ sọ mọ nukunbibia otọ́ mítọn lẹ tọn to Egipti mẹ, bo sọ sè awhá yetọn to Ohù Vẹ̃ lọ dali;

¹⁰ bo do ohia lẹ hia po nujawu lẹ po to Falo ji, podọ to mẹmẹsi etọn lẹpo go, podọ to gbẹtọ aigba eton tọn lẹpo go; na hiẹ yọnen do yé yí sakla do zán hẹ yé; bo sọ tindo oyin de na we, dile é te to azán he gbè.

¹¹ Podọ hiẹ sọ klán ohù to yé nukọn, sọmọ bọ yé gbọn gblagbla ohù lọ tọn mẹ yì to aigba húhú ji, podọ modonamẹtọ yetọn lẹ wẹ hiẹ zedlan osédo lẹ mẹ, di Zannu de do osìn huhlọnnọ le me.

¹² Huganmọ hiẹ plan yé yì to odòtin aslọ tọn de mẹ to okle; podọ to odòtin miyọn tọn de mẹ to ozán mẹ, nado na hinhọn yé to aliho he mẹ yé do gbọn yí.

¹³ Hiẹ jẹte wá osé Sinai ji ga, bo sọ dọhó po yé po sọn olọn mẹ, bo sọ na whẹ̀dida jijlọ lẹ yé po osẹ́n nugbo lẹ po, osẹ́ndoai dagbe lẹ po gbèdide lẹ po:

¹⁴ bo sọ hẹn gbọjẹzán wiwe zùn yínyọnẹn hlan yé, bo degbèna yé gbèdide lẹ po osẹ́ndoai lẹ po, po osẹ́n de po, gbọn alọ Moṣe mẹmẹsi towe tọn mẹ:

¹⁵ bo sọ na akla yé sọn olọn mẹ na ohùvẹ́ yetọn, bo sọ hẹn osìn tọ́n wá na yé sọn osé mẹ na nùgbla yetọn, bo sọ degbèna yé na do yì emẹ nado tindo aigba lọ he hiẹ ko zé alọ towe daga nado na yé.

¹⁶ Ṣigba yé po otọ mítọn lẹ po yí sakla do zán, bo sọ hẹn okọ̀ yetọn sinyẹn, bo ma sọ tùntóai hlan gbèdide towe lẹ gba,

¹⁷ bo gbẹ́ nado sètónu, kavi yín ayipanúgotọ nujawu towe lẹ tọn he hiẹ wà to yé ṣẹnṣẹn; ṣigba hẹn okọ̀ yetọn sinyẹn, podọ to atẹṣiṣi yetọn mẹ dè awhàngán de nado lẹ́gọ̀ do mẹglọnọ yetọn mẹ: ṣigba Jiwheyẹwhe awuwlenọ de wẹ hiẹ nado jona, dagbenọ bo sọ gọ́ na awuvẹ́mẹ, whleawu nado sadi, podọ susunọ to lẹblanu mẹ, bo ma sọ gbẹ́ yé dai gba.

¹⁸ Nugbo, whenuena yé ko basi oyìnvú kinkọ̀n de na yéde, bo dọmọ, Ehe wẹ Jiwheyẹwhe towe he hẹn we hẹji tọ́n wá sọn Egipti mẹ, bo ko sọ wà homẹgblenu daho lẹ,

¹⁹ gãnṣo hiẹ to lẹblanu yẹndawe towe lẹ mẹ ma gbé yé dai to zùngbo lọ mẹ gba: dotin aslo tọn lọ ma fọ́nyì sọn yé ji to okle, nado plan yé yí to aliho lọ mẹ; kavi dòtin miyọn tọn lọ to ozán mẹ, nado do hinhọ́n hia yé, podọ aliho ehemẹ yé do gbọn yì.

²⁰ Hiẹ yí gbigbọ dagbe towe jó ga nado naplọn yé, bo ma sọ dè mana towe sọn onù yetọn gba, bo sọ yí osìn na yé na nùgbla yetọn.

²¹ Nugbo, owhè kande wẹ hiẹ do yìn yé to zùngbo mẹ, yé ma sọ bà núde pò; avọ̀ yetọn lẹ ma dohó, podọ afọ yetọn lẹ ma sọ jí.

²² Huganmọ hiẹ yí ahọludu lẹ po akọta lẹ po na yé, he hiẹ do mágú kẹdẹdi mimá yetọn lẹ: mọwẹ yé tindo aigba Sihọni tọn lọ, yèdọ aigba ahọlu Hẹṣbọni tọn tọn lọ, po aigba Ogi ahọlu Basanni tọn tọn lọ po.

²³ Ovi yetọn lẹ ga wẹ hiẹ hẹnsudeji di sunwhlẹvu olọn tọn lẹ, bo sọ hẹn yé wá do aigba lọ ji, gbọn ehe tọn dali hiẹ dọ hlan otọ́ yetọn lẹ, na yé na do yì emẹ nado tindo e.

²⁴ Mowẹ ovi lẹ yì emẹ bo tindo aigba lọ, hiẹ sọ hówhiwhẹ tòmẹnu aigba lọ tọn lẹ to yé nukọn, Kananinu lẹ lọ, bo sọ jó yé do alọ yetọn lẹ mẹ, po ahọlu yetọn lẹ po, po akọta aigba lọ tọn lẹ po, na yé nido wà do yé dile yé jlo do.

²⁵ Yé sọ yí tòdaho dokọnọ lẹ, po aigba ojonọ de po, bo sọ tindo ohọ̀ lẹ gigọ na onú dagbe lẹpo, odla kùnkùn lẹ, ovẹ́ngle lẹ, po olivieligle lẹ po, po atin sinsẹ́nnọ lẹ po to ogégé mẹ: mọwẹ yé dù, bo sọ yín gigónọ, bo sọ lẹzùn ojonọ́, bo nahomẹhùn yéde to dagbewà towe daho mẹ.

²⁶ Gãnṣo yé yín tólivẹtọ, bo sọ ṣiatẹ hẹ we, bo fọ́ osẹ́n towe dlan nẹgbé yetọn godo, bo sọ hù yẹwhegán towe he sakunnu do yé ji lẹ nado gọ̀ yé do de we, yé sọ wà homẹgblenú dahodaho.

²⁷ Enẹwutu wẹ hiẹ jó yé do alọ meglatọ yetọn lẹ tọn mẹ; mehe bianukunna yé: podọ to ojlẹ tukla yetọn tọn mẹ, whenuena yé dawhá hlan we, hiẹ sè sọn olọn mẹ; podọ kẹdẹdi lẹblanu yẹndawe towe lẹ hiẹ na whlẹngantọ lẹ yé, mẹhe whlẹn yé sọn alọ mẹglatọ yetọn lẹ tọn mẹ.

²⁸ Ṣigba godo yé tindo ogbọjẹ yé sọ wà oylan to nukọn towe: enẹwutu wẹ hiẹ jó yé dai do alọ kẹ̀ntọ yetọn lẹ tọn mẹ, sọmọ bọ yéwlẹ tindo ahọludu to yé ji: gànṣo whenuena yé lẹ́gọ̀, bo dawhá hlan we, hiẹ sè sọn olọn mẹ; whla susu wẹ hiẹ whlẹn yé kẹdẹdi lẹblanu towe lẹ;

²⁹ bo sọ sakunnu do yé ji, na hiẹ nido hẹn yé wá osẹ́n towe kọ̀n: gãnṣo yé yi sakla do zán, bo ma tùntóai hlan gbèdide towe lẹ gba, ṣigba bo wàylando do whẹ̀dida towe lẹ go, (ehe eyin omẹ de wà, é na to ogbẹ̀ to yé mẹ,) bo dọ̀n abọ́ lọ, bo sọ hẹn okọ yetọn sinyẹn, bo ma sọ sè.

³⁰ Gãnṣo owhè susu wẹ hiẹ sinyẹnlin to yé de, bo sọ sakunnu do yé ji gbọn gbigbọ towe dali gbọn yẹwhegán towe lẹ mẹ: gãnṣo yé ma na otọ́: enẹwutu wẹ hiẹ jó yé do alọ akọta aigba lọ lẹ tọn lẹ tọn mẹ.

³¹ Gãnṣo to lẹblanu yendawe towe lẹ mẹ hiẹ ma basi opòdo yé tọn gigọ́ de gba, kavi gbẹ́ yé dai gba, na Jiwheyẹwhe dagbenọ lẹblanunọ de wẹ hiẹ.

³² Enẹwutu dinvie, Jiwheyẹwhe mítọn, daho lọ, huhlọnnọ lọ, Jiwheyẹwhe dobu lọ, mẹhe nọ yìn alẹ̀nù po lẹblanu po, a dike tuklajẹ lẹpo sọawuhia pẹvi to nukọn towe blo, he ko wá mi ji, to ahọlu mítọn lẹ go, to ahọvi mítọn lẹ go, podọ to yẹwhenọ mítọn lọ go, podọ to yẹwhegán mítọn lẹ go, podọ to otọ́ mítọn lẹ go, podọ to omẹ towe lẹpo go, sọn ojlẹ ahọlu Asilia tọn lẹ tọn mẹ gbọn jẹ azán he gbè.

³³ Ṣogãn hlẹyín nugbonọ to popo he yè hẹn wá mí ji lẹ mẹ; na hiẹ yí nugbo do zán, ṣigba mìwlẹ ko yí kanyinylan do wà:

³⁴ mọ ahọlu mítọn lẹ, ahọvi mítọn lẹ, yẹwhenọ mítọn lẹ, kavi otọ́ mítọn lẹ, ma yìn osẹn towe gba, kavi tuntóai hlan gbèdide towe lẹ po asẹdai towe lẹ po, he hiẹ do sakunnu do yé ji.

³⁵ Na yé ma sẹ̀n we to ahọludu yetọn mẹ gba, podọ to dagbewà towe daho mẹ he hiẹ na yé, podọ to aigba daho ojonọ̀ he hiẹ na to ye nukọn, mọ yé ma sọ ló sọn azọ́n ylankan yetọn lẹ mẹ gba.

³⁶ Dayi e go, mẹmẹsi wẹ míwlẹ to egbé, podọ na aigba lọ tọn he hiẹ na hlan otọ́ mítọn lẹ nado nọ dù sinsẹ̀n etọn po dagbe etọn po, dayi e go, mẹmẹsi wẹ mí to e mẹ.

³⁷ E sọ to jideji pọ́gégé jó hlan ahọlu lẹ lọ mẹhe hiẹ dè do mí ji na ylando mítọn lọ tọn wutu: yé tindo huhlọn agbasa mítọn lẹ ji ga podọ to whékanlin mítọn lẹ ji to homẹhùn yetọn mẹ, mìwlẹ sọ tin to nukunbia daho mẹ.

³⁸ Gãnṣo na ehe lẹpo mí to alẹ̀nù magble de basi, bo sọ wlan ẹn; ahọvi mítọn lẹ, Levinu mítọn lẹ, po yẹwhenọ mítọn lẹ po, dọtufó do e kọ̀n.