NẸHEMIA 8 - BIBLU WIWE LỌ 1923

¹ GBẸTỌ lẹpo sọ bẹ́ yéde plidopọ di omẹ dopo do otẹn gbigblo he tin to osìn họngbo lọ nukọn; yé sọ dọhó hlan Ẹzla wékantọ lọ nado hẹn owé osén Moṣe tọn lọ tọn wá, he OKLUNỌ ko degbèna hlan Islaeli.

² Ẹzla yẹwhenọ lọ sọ hẹn osẹ́n lọ wá agùn lọ nukọn, sunnu po yọnnu po, po ehe sọgan yí wuntùntùn do sè lẹpo po, to azán tintan osùn ṣinawetọ lọ tọn ji.

³ E sọ hia to e mẹ finẹ to otẹn gbigblo lọ nukọn he tin to osìn họ̀ngbo lọ nukọn sọn afọnnu fliflimẹ kakajẹ okleda, to nukun sunnu lẹ po yọnnu lẹ po tọn mẹ, po enẹlẹ he sọgan tùnwun po tọn; otọ́ gbẹtọ lẹpo tọn sọ yín sọwhètọ hlan owé osẹ́n lọ tọn.

⁴ Ẹzla wékantọ lọ sọ ṣite to nuyìaga atin tọn de ji, he yé ko basi na núwiwà lọ; Matitia sọ site gọ́na ẹn, po Sema po, po Anaia po, po Ulia po, po Hilkia po, po Maaseia po, podọ to alọ adusi etọn ji; podọ to alọ amiyọn etọn ji, Pẹdaia, po Misaẹli po, po Malkija po, po Hasumi po, po Haṣbadana po, Zekalia, po Mẹṣulami po.

⁵ Ẹzla sọ hùn owé lọ to nukun gbẹtọ lẹpo tọn mẹ; (na ewọ tin to aga gbẹtọ lẹpo tọn;) whenuena ewọ sọ hùn in, gbẹtọ lẹpo fọ́n ṣite:

⁶ Ẹzla sọ dona OKLUNỌ, Jiwheyẹwhe kiklo lọ. Gbẹtọ lẹpo sọ gblọn, po zizó daga alọ yetọn lẹ tọn po, dọmọ, Niṣẹ, Niṣẹ: yé sọ dẹ́ ota yetọn lẹ, bo sọ litaina OKLUNỌ po nukunmẹ yetọn lẹ po hlan aigba.

⁷ Jeṣua ga, po Bani po, po Ṣelebia po, Jamini, Akubi, Sabetai, Hodia, Maaseia, Kẹlita, Azalia, Jozabadi, Hanani, Pelaia, po Levinu lẹ po sọ hẹn gbẹtọ lẹ nado tùnwun osén lọ: gbẹtọ ewlẹ sọ site to otẹn yetọn mẹ.

⁸ Yé sọ hia to owé lọ mẹ, to osén Jiwheyẹwhe tọn lọ mẹ, hezeheze; yé sọ na tadena lọ, sọmọ bọ yé tùnwun hihia lọ.

⁹ Nẹhemia, he yín Tilẹata, po Ẹzla yẹwhenọ wékantọ lọ po, po Levinu lẹ po he to gbẹtọ lẹ plọn, dọ hlan gbẹtọ lẹpo dọmọ, Azán he wiwe wẹ hlan OKLUNỌ Jiwheyẹwhe mítọn; mi blawu, kavi viavi blo. Na gbẹtọ lẹpo wẹ to avivi, whenuena yé sè ohó osén lọ tọn lẹ.

¹⁰ Whenẹnu wẹ é dọ hlan yé dọmọ, Mì yì, dù ojó lọ, bo sọ nù vivi lọ, bo sọ do mimá lẹ hlan ewọ he yè ma wleawu núde tọn na: na azán he wiwe wẹ hlan OKLUNỌ mítọn: mì sọ yín adinọ blo; na ayajẹ OKLUNỌ tọn wẹ huhlọn mítọn.

¹¹ Mowẹ Levinu lẹ hẹn gbẹtọ lẹpo nabọẹ, dọmọ, Mì hẹn abọẹ mítọn go, na wiwe wẹ azán lọ; mì sọ yín adinọ blo.

¹² Gbẹtọ lẹpo sọ yì nado dù, podọ nado nù, podọ nado do mimá lẹ hlan, odọ nado basi ajògidi daho, na yé o tùnwun ohó he yè lá hlan yé lẹ wutu.

¹³ To azán awetọ gbè wẹ yè bé nukọntọ owhé otọ́ lẹ tọn tọn lẹ sọn gbẹtọ lẹpo mẹ plidopọ, yẹwhenọ lẹ, po Levinu lẹ po, do Ẹzla wékantọ lọ de, yèdọ nado na sowhiwhe hlan ohó osẹ́n lọ tọn lẹ.

¹⁴ Yé sọ mọ winwlan to osẹ́n lọ mẹ, le dọ OKLUNỌ ko degbè gbọn Moṣe dali, na ovi Islaeli tọn lẹ na do nọ nọ̀ avàja lẹ mẹ to hùnwhẹ̀ osùn ṣinawetọ tọn lọ mẹ:

¹⁵ Podọ na yé na do dèmisẽlu bo sọ lá to tòdaho yetọn lẹpo mẹ, podọ to Jelusalẹm mẹ, dọmọ, Mì tón yì jẹ osé lọ ji, bo bẹ́ alà olivieli tọn lẹ, po alà olivieli wuju tọn lẹ po, po alà miltle tọn lẹ po, po odépá lẹ po, po alà atin titli lẹ tọn lẹ po, wá nado basi avàjà lẹ, dile yè wlan do.

¹⁶ Mowẹ gbẹtọ lẹ tọ́n yì, bo bọ́ yé wá, bo basi avajà lẹ na yéde, omẹ dopodopo to aga ohọ̀ etọn tọn ji, podọ to awánu yetọn le mẹ, podọ to akànmaho ohọ̀ Jiwheyẹwhe tọn tọn lẹ mẹ, podọ to otẹn gbigblo họ̀ngbo osìn tọn mẹ, podọ to otẹn gbigblo họ̀ngbo Eflaimi tọn tọn lọ mẹ.

¹⁷ Agùn yé tọn he yè hẹn tọ́n sọn mẹglọnọ mẹ wá lẹpo basi avàjà lẹ, bo sọ nọ nọ̀ avàjà lẹ mẹ: na sọn azán Jeṣua visunnu Nuni tọn tọn gbọn jẹ azán nẹ gbè wẹ ovi Islaeli tọn lẹ ma ko to mọ wà gba. Ayajẹ daho sọ tin to finẹ.

¹⁸ Egbesọegbesọ ga, sọn azán tintan gbè jẹ azán godotọn gbè, é nọ to hihia to owé osẹ́n Jiwheyẹwhe tọn lọ tọn mẹ. Yé sọ wà hùnwhẹ lọ azàn ṣinawe; to azán sinatọ̀ntọ gbè opli ayidego de sọ tin, kẹdẹdi ogbèdai lọ.