NẸHEMIA 2 - BIBLU WIWE LỌ 1923

¹ E sọ wá jọ to osùn Nisani mẹ, to owhè òkotọ Altakẹlikesi ahọlu lọ tọn mẹ, whenuena ovẹ̃n tin to nukọn nẹ̃, wẹ yẹn zé ovẹ̃n lọ daga, bo na ẹn hlan ahọlu lọ. Dinvie yẹn ma ko yín nukunmẹylọntọ to nukọn etọn dai gbède,

² Ahọlu lọ sọ dọ hlan mi dọmọ, Etẹwutu wẹ nukunmẹ towe yín yìnylan, mimọ hiẹ ma yín awutunọ? ehe ma yín onú dèvo de adavo awubla ayiha tọn. Whenẹnu wẹ yẹn yín avosatọ badabada.

³ Yẹn sọ dọ hlan ahọlu dọmọ, Gbọ ahọlu ni togbẹ̀ doidoi: etẹwutu wẹ nukunmẹ ṣie ma na do yín yìnylan, whenuena tòdaho lọ, otẹn oyọ̀whé otọ́ ṣie lẹ tọn lẹ tọn mlọnai jẹvó, bọ yè sọ yí miyọn do fiọ họ̀ngbo etọn lẹ?

⁴ Whenẹnu wẹ ahọlu lọ dọ hlan mi dọmọ, Eté wẹ hiẹ basi okanbiọ na? Mowẹ yẹn hodẹ́ hlan Jiwheyẹwhe olọn tọn lọ.

⁵ Yẹn sọ dọ hlan ahọlu dọmọ, Eyín é hùnhomẹ ahọlu lọ, podọ eyín mẹmẹsi towe ko mọ nukundagbe to nukun towe mẹ, bọ hiẹ na do do mi hlan jẹ Juda, jẹ tòdaho oyọ̀whé otọ́ ṣie lẹ tọn lẹ mẹ, na yẹn nido dó e.

⁶ Ahọlu lọ sọ dọ hlan mi dọmọ, (ahọsi lọ ga sinai to e de,) Na dẹ́n sọ na wẹ gbéjizọnlin towe na yín? podọ whetẹnu wẹ hiẹ na lẹ́gọ̀? Mọwẹ é hùnhomẹ ahọlu lọ nado do mi hlan; yẹn sọ do ojlẹ de nẹ̃.

⁷ Humọ yen sọ dọ hlan ahọlu lọ dọmọ, Eyín é hùnhomẹ ahọlu, gbọ yè ni na ohówé lẹ mi hlan otògán lẹ to otò gododọ̃n, na yé nido gbọ yẹn nido jù yì kaka yẹn do wá jẹ Juda;

⁸ podọ ohówé de hlan Asafi hihọtọ zùnkan ahọlu lọ tọn tọn, na é nido na whlẹlidemẹ mi nado basi atingbobli lẹ na hòngbo whéhla lọ tọn lẹ he yín ohò lọ tọn, podọ na adó tòdaho lọ tọn, podọ na ohò he mẹ yẹn na biọ lọ. Ahọlu sọ na hlan mi kẹdẹdi alọ dagbe Jiwheyẹwhe ṣie tọn to oji e.

⁹ Whenẹnu wẹ yẹn wá jẹ otògán lẹ lọ de to otọ́ gododọ̃n, bo yí ohówé ahọlu lọ tọn lẹ na yé. Dinvie ahọlu lọ ko do awhàngán awhànfuntọ lọ tọn lẹ po osónọ lẹ po hlan gọ́na mi.

¹⁰ Whenuena Sanbalati Holoninu lọ, po Tobia mẹmẹsi, Ámmọmnu lọ po, sè linlin e tọn, é doadihomẹna yé gbahugbahu, na dọ yè hẹn omẹ de wá finẹ nado din jijọho ovi Islaeli tọn lẹ tọn.

¹¹ Mowẹ yẹn wá jẹ Jelusalẹm, bo sọ tin finẹ azán atón.

¹² Yẹn sọ tite to ozán lọ mẹ, yẹn po omẹ vude dẽlẹ po gọ́na mi; mọ yẹn ma sọ dọ na omẹ depope núhe Jiwheyẹwhe ṣie yí do ayiha ṣie mẹ nado wà na Jelusalẹm: mọ okanlin depope ma tin to dẽ, adavo okanlin he ji yẹn hó lọ.

¹³ Yẹn sọ tọ́n yì to ozán lọ mẹ gbọn họ̀ngbo lọ gbàdomẹ, yèdọ hlan odòtọ odànawanọ lọ tọn kọ̀n, podọ jẹ họ́ngbo agbóji tọn lọ kọ́n, bọ yẹnpón adó Jelusalẹm tọn lọ lọ, he yè ko gbà liai, yè ko sọ yí miyọn do fiọ họ́ngbo etọn lẹ.

¹⁴ Whenẹnu wẹ yẹn to yìyì jẹ asisa họ́ngboji podọ jẹ otándò ahọlu tọn lọ kọ̀n: ṣigba otẹn de ma tin na okanlin he tin to oglọ ṣie nado gbọnyì.

¹⁵ Whenẹnu wẹ yẹn hẹji yì to ozán lọ mẹ gbọn tópẹṣẹ lọ dali, bo sọ yinpón adó lọ; yẹn sọ gọ̀do godo, bo gbọn agbadò họ́ngboji lọ biọwhégbè, bo sọ légó mọ.

¹⁶ Ogán lẹ ma yón fie yẹn yì, kavi núhe yẹn ko wà gba: mọ yẹn ma tlẹ ko dọ ẹ hlan Ju lẹ lọ gba, kavi hlan yẹwhenọ lẹ, kavi hlan mẹgbògbo lẹ, kavi hlan ogán lẹ, kavi hlan pipòtọ he wàzọ́n lọ lẹ.

¹⁷ Whenẹnu wẹ yẹn dọ hlan yé dọmọ, Mìwlẹ mọ homẹgblenu ylanylan he mẹ mìwlẹ te, le Jelusalẹm mlọnai jẹvọ́ do, bọ yè yí miyọn do fiọ hòngbo etọn lẹ: mì wá bo gbọ mí ni dó adó Jelusalẹm tọn yìaga, na mí sọ yín ovlẹ de ba blo.

¹⁸ Yẹn sọ dọ alọ Jiwheyẹwhe ṣie tọn he yín dagbe to oji na ye, podọ sọn ohó ahọlu tọn lẹ mẹ ga he é ko dọ hlan mi. Yé sọ dọmọ, Mì gbọ mi ni fọ́n tite bo to didó. Mowẹ yé nahuhlọn alọ yetọn lẹ na azọ́n dagbe lọ.

¹⁹ Ṣigba whenuena Sanbalati Holoninu lọ, po Tobia mẹmẹsi Ammọninu lọ po, po Gesẹmi Alabianu lọ po, sè e, yé sàn mí kò, bo sọ vlẹ mi, bo dọmọ, Eté wẹ onú he mìwlẹ to wiwà he? mìwlẹ na ṣiatẹ hẹ ahọlu lọ wẹ?

²⁰ Whenẹnu wẹ yẹn gblọnna yé, bo dọ hlan yé dọmọ, Jiwheyẹwhe olọn tọn, ewọ na donukunda gbehia mí; enẹwutu mí mẹmẹsi etọn lẹ na tite bo to didó: ṣigba mìwlẹ ma tindo mimá de, kavi ojlọjẹ, kavi nuflinnú, to Jelusalẹm mẹ gba.