NẸHEMIA 13 - BIBLU WIWE LỌ 1923

¹ TO azán nẹ gbè wẹ yé hia to owé Moṣe tọn lọ mẹ to sisè gbẹtọ lẹ tọn mẹ; emẹfinẹ yè mọ yè wlan te, na Ammọninu de po Moabinu de po ma na do biọ agùn Jiwheyẹwhe tọn mẹ yì gbèdegbède;

² na yé ma yí akla po osìn po do pó ovi Islaeli tọn lẹ wutu, ṣigba dapà Balaami do yé ji, nado hòdẹ́do yé: ṣogàn Jiwheyẹwhe mítọn diọ dẹ́hòdo lọ do dona de mẹ.

³ E sọ wá jọ, whenuena yé ko sè osẹ́n lọ, wẹ yé klán agùndaho flusọ lọ lẹpo sọn Islaeli mẹ.

⁴ Dinvie jẹnukọnna ehe, Eliasibi yẹwhenọ lọ, mẹhe yè ko dè do abò ohọ̀ Jiwheyẹwhe mítọn tọn lọ tọn ji, yínyín dọ̀ndopọ hlan Tobia

⁵ ko wleawu abò daho de tọn nẹ, tò hóhówhenu fie ye ko nọ zé avọ́ nunina jinulili tọn lẹ lọ do, nuyọnwán lọ, po nuzinzán lọ lẹ po, po madao gbadó tọn lẹ po, ovẹ̃n lọ, po amì lọ po, he yè na gbọn gbèdide dali hlan Levinu lẹ, po hànjitọ lẹ lọ po, po hònjinọtọ lẹ lọ po; po avọ́ nunina Zédlanga lẹ po na yẹwhenọ lẹ.

⁶ Ṣigba to ojlẹ he lẹpo mẹ yẹn ma tin to Jelusalẹm gba: na to owhè gbànnukunawetọ Altakẹlkesi ahọlu Babilọni tọn lọ tọn mẹ wẹ yẹn yì ahọlu de, podọ to azán sọha dẽlẹ godo biọ ojódo sọn ahọlu de:

⁷ yẹn sọ wá jẹ Jelusalẹm, bo sọ tùnwun oylan he Eliasibi ko wà na Tobia tọn, to awuwlena abò lẹ de nọ̀ mẹ to akànmaho ohọ̀ Jiwheyẹwhe tọn tọn mẹ.

⁸ E sọ doadihomẹna mi badabada: enẹwutu wẹ yẹn do bẹ́ agbàn whédo Tobia tọn lẹpo tón sọn abò lọ mẹ.

⁹ Whenẹnu wẹ yẹn degbè, bọ yé sọ klọ́ abò lẹ wé: finẹ wẹ yẹn sọ vó nuzinzán ohọ́ Jiwheyẹwhe tọn tọn lẹ bẹ́wá, po avọ́ nunina jinulili lẹ po po nuyọnwán lọ po.

¹⁰ Yẹn sọ mọhlan dọ yè ma ko na mimá Levinu lẹ tọn yé gba; sọmọ bọ yè hẹn Levinu lẹ po hànjitọ lẹ lọ po he wà azọ́n lọ lẹ, hónyì omẹ dopodopo jẹ ogle etọn kón.

¹¹ Whenẹnu wẹ yẹn wọ́hẹ ogán lẹ lọ,

⁰⁰ dọmọ, Etẹwutu wẹ yè gbẹ́ ohọ̀ Jiwheyẹwhe tọn lọ dai? Yẹn sọ bẹ́ yé plidopọ, bẹ do yé otẹn yetọn mẹ.

¹² Whenẹnu wẹ Juda lẹpo hẹn madao gbadó lọ tọn po ovẹ̃n lọ po po amì lọ po wá do adọkunnu lẹ lọ mẹ.

¹³ Yẹn sọ basi adọkunnugán lẹ do adọkunnu lẹ ji Ṣẹlẹmia yẹwhenọ lọ, po Zadọki wékantọ lọ po, podọ sọn Levinu lẹ mẹ, Pedaia: podọ awetọ sẹpọ́ yé wẹ Hanani visunnu Zakuli tọn, visunnu Matania tọn: na yè hia yé nugbonọ, azọ́nwà yetọn sọ wẹ nado nọ mánú hlan mẹmẹsunnu yetọn lẹ.

¹⁴ Jiwheyẹwhe ṣie È, flin mi, gbọn ehe tọn dali, bo ma sọ súnsún owàlọ dagbe ṣie lẹ sé blo he yẹn ko wà na ohọ̀ Jiwheyẹwhe ṣie tọn, podọ na ayipanugo etọn lẹ.

¹⁵ To azán nẹlẹ̃ mẹ wẹ yẹn mọ mẹdẽlẹ to Juda mẹ to avọ́nlinú lẹ zín to gbọjẹzán gbè, bo to hinhẹn amakó lẹ wá whégbè, bo sọ yí do to agbàndona kẹtẹkẹtẹ lẹ; di ovẹ̃n ga, ovẹ̃nsinsẹ́n lẹ, po ovọ̀sinsẹ́n lẹ po, po hùnkọ agbàn lẹ tọn lẹpo po, he yé to hinhẹn wá Jelusalẹm mẹ to gbọjẹzán gbè: yẹn sọ sakunnu do yé ji to azán lọ gbè ehemẹ yé to núdùdù lẹ sà te.

¹⁶ Omẹ Tile tọn lẹ nọ nò finẹmẹ ga, he nọ hẹn owhèvi wá whegbè, po hunkọ ajọnú tọn lẹpo po, bo nọ to sisà to gbọjẹzán gbè hlan ovi Juda tọn lẹ, podọ to Jelusalẹm mẹ.

¹⁷ Whenẹnu wẹ yẹn sọ wọ́hẹ mẹgbõgbo Juda tọn lẹ, bo sọ dọ hlan yé dọmọ, Eté wẹ onú ylankan ehe mì to wiwà he, bo to gbọjẹzán hẹngble?

¹⁸ Otọ́ mítọn lẹ ma ko wà le, Jiwheyẹwhe mítọn ma ko sọ hẹn oylan he lẹpo wá mí ji, po tòdado he po ji? gãnṣo mì sọ hẹn homẹgble huganmọ ja Islaeli ji gbọn gbọjẹzán hinhẹngble dali.

¹⁹ E sọ wá jọ wẹ, whenuena hóngboji Jelusalẹm tọn lẹ ṣẹ̀ nado tin zinvíu jẹnukọnna gbọjẹzán, Yẹn degbè na ohón lẹ na do yín súsú, bo degbè na yé ma na do yín hùnhùn kakajẹ gbọjẹzán lọ godo: mẹdẽlẹ sọn mẹmẹsi ṣie lẹ mẹ wẹ yẹn sọ dè do họ̀ngbo lẹ ji, na agbàn de ma na do yín hinhẹn wá biọ whégbè finẹ to gbọjẹzán gbè.

²⁰ Mowẹ ajótọ lẹ po sisàtọ hunkọ ajọ́nú tọn lẹpo tọn po lẹ jẹavà do Jelusalẹm gbonu whladopo kavi whlawe.

²¹ Whenẹnu wẹ yẹn sakunnu do yé ji, bo dọ hlan yé dọmọ, Etẹwutu wẹ mì do jẹ̀avà to adó go lẹ́do? eyín mìwlẹ sọ wà mọ ba, Yẹn na do alọ lẹ mì go. Sọn ojlẹ nẹ mẹ gbọ̃n wẹ yé ma ko sọ wá to gbọjẹzán gbè ba.

²² Yẹn sọ degbèna Levinu lẹ na yé na do lẹ́ yéde wé, podọ na yé na do nọ wá bo sọ nọ payi họngbo lẹ go, nado lẹ́ gbọjezán lọ wé. Jiwheyẹwhe ṣie E, flin hlan mi, ehe ga, bo sọ hla mi dai kẹdẹdi kiklo lẹblanu towe tọn lọ.

²³ To azán nẹlẹ̃ mẹ ga wẹ yẹn mọ Ju lọ lẹ he ko wlealọhẹ yọnnu Aṣdọdi tọn lẹ, Ammọni tọn, po Moabi tọn po:

²⁴ ovi yetọn lẹ sọ nọ dọhó odá to ohógbè Aṣdọdi tọn mẹ, bo ma sọ sọgan dọhó to ogbè Ju tọn mẹ gba, aigba kẹdẹdi ogbè gbẹtọ lẹ dopodopo tọn.

²⁵ Yẹn sọ wóhẹ yé, bo hodédo yé, bo hò mẹdẽlẹ sọn yé mẹ, bo sùn odà yetọn lẹ sé, bo hẹn yé whle gbọn Jiwheyẹwhe dali, dọmọ, Mìwlẹ ma na jó viyọnnu mítọn lẹ hlan visunnu yetọn lẹ gba, kavi yí viyọnnu yetọn lẹ na visunnu mítọn lẹ, kavi na mìde gba.

²⁶ Bé Sọlọmọni ahọlu Islaeli tọn ma wàylando gbọn onú heló dali? gãnṣo to akọta susu ṣẹnṣẹn ahọlu ewọ nkọ de ma tin finẹ, ewọ sọ yín mẹyiwanna son Jiwheyẹwhe etọn de, Jiwheyẹwhe sọ yí i do basi ahọlu to Islaeli lẹpo ji: ṣogàn yèdọ ewọ wẹ yọnnu ojonọ lẹ hẹn nado wàylando

²⁷ Bé mìwlẹ na tuntóai hlan mì nado to oylan daho he lẹpo wà, nado to ylanwà do Jiwheyẹwhe mítọn go to alọwlehẹ yọnnu ojonọ lẹ mẹ?

²⁸ Podọ dopo sọn visunnu Jọiada tọn lẹ mẹ, visunnu Eliasibi yẹwhenọ daho lọ tọn lọ, yín yọ́nwhẹn hlan Sanbalati Holoninu lọ: enẹwutu wẹ yẹn yàn ẹn sọn dẽ.

²⁹ Jiwheyẹwhe ṣie È, flin yé, na yé ko flu yẹwhenọduta lọ, po alẹ̀nù yẹwhenọduta lọ tọn po, po Levinu lẹ tọn po wutu.

³⁰ Le wẹ yẹn klọ́ yé wé do sọn ojonọ lẹpo mẹ, bo sọ dè hihó lẹ na yẹwhenọ lẹ podọ na Levinu lẹ, omẹ dopodopo to azọ́n etọn mẹ;

³¹ podọ na onake nina, to ojlẹ didè lẹ ji, podọ na sinséntintan lẹ. Jiwheyẹwhe ṣie È, flin mi, na dagbe.