NẸHEMIA 1 - BIBLU WIWE LỌ 1923

¹ OHÓ Nehemia visunnu Hakalia tọn lọ lẹ. Dinvie é wá jọ to osùn Kislẹvi mẹ, to owhè okotọ mẹ, le yẹn tin to Susani ohọ̀nmẹ lọ mẹ,

² wẹ Hanani, dopo sọn mẹmẹsunnu lẹ mẹ, wá, ewọ po dawe dẽlẹ po sọn Juda; yen sọ kanbiọ yé gbọn Ju he ko hòngán lẹ lọ tọn dali, he yè pòdai sọn mẹglọnọ lẹ lọ mẹ, podọ gbọn Jelusalẹm tọn dali.

³ Yé sọ dọ hlan mi dọmọ, Pipòtọ he yè pòdai sọn mẹglọnọ mẹ finẹ lẹ to ogbeta lọ mẹ tin to nukunbia daho po ovlẹ po mẹ: yè ko họ́ adó Jelusalẹm tọn liai ga, yè sọ yí miyọn do mẹ̀ họ̀ngbo etọn lẹ.

⁴ E sọ wá jọ, whenuena yẹn sè ohó helè, wẹ yẹn sinai bo viavi, bo sọ blawu azán sọhade; yẹn blanù bo sọ hodẹ̀ to Jiwheyẹwhe olon tọn nukọn,

⁵ Bo dọmọ, OKLUNỌ E, Jiwheyẹwhe olọn tọn, Jiwheyẹwhe daho he dobu lọ, he nọ payi alẹ̀nù po lẹblanu po go to yé he yiwanna ẹn bo sọ nọ payi gbèdide etọn lẹ go, yẹn vẹ̀ we;

⁶ gbọ otó towe dinvie ni yín tùntùnai, po nukun towe lẹ po hùnhùn, na hiẹ nido tuntóai hlan odẹ̀ mẹmẹsi towe tọn, he yẹn to hihò to nukọn towe to ojlẹ he mẹ, to okle po ozán po, na ovi Islaeli mẹmẹsi towe tọn lẹ, whenuena yẹn to gbèyína ylando ovi Islaeli tọn lẹ tọn lọ, he mí ko do wàylando do we: nugbo, yẹn po owhé otọ́ ṣie tọn po ko wàylando

⁷ Mìwlẹ ko yí gbigble susu do zán hẹ we, bo ma ko payi gbèdide lọ lẹ go gba, kavi osẹ́ndoai le, kavi whẹ̀dida lẹ, he hiẹ degbèna Moṣe mẹmẹsi towe.

⁸ Yẹn vẹ̀ we, flin ohó he hiẹ degbèna Moṣe mẹmẹsi towe, dọmọ, Eyín mìwlẹ wàylando, yẹn na vúnvún mì pé akọta lẹ ṣẹnṣẹn:

⁹ ṣigba eyín mì sọ diọkọ hlan dè, bo sọ payi gbèdide ṣie lẹ go, bo sọ basi yé, eyín zéyìngbé mítọn lẹ tlẹ yín to opòdopatapata adà olọn lọ tọn ji, gãnṣo yẹn na ṣinyan yé sọn finẹ, bo na sọ hẹn yé wá jẹ otẹn lọ mẹ he yẹn ko dè nado hẹn oyín ṣie nado nọ nọ̀ finẹ

¹⁰ Dinvie ehelẹ wẹ mẹmẹsi towe lẹ po gbẹtọ towe lẹ po, mẹhe hiẹ ko fli gbọn huhlọn towe daho dali, podọ gbọn alọ huhlọnnọ towe dali.

¹¹ OKLUNỌ E, yẹn vẹ̀ we, gbọ otó towe ni yín tùntùnai hlan odẹ̀ mẹmẹsi towe tọn lọ, podọ hlan odẹ̀ mẹmẹsi towe lẹ tọn, mẹhe hùnhomẹ nado dibusi oyín towe: hẹn mẹmẹsi towe duale, to azán he gbè, yẹn vẹ̀ we, bo na lẹblanu hlan ẹn to nukun dawe he tọn mẹ. (Dinvie kọfohẹntọ wẹ yẹn to ahọlu lọ de.)