MATIU 4 - BIBLU WIWE LỌ 1923

¹ WHENENU wẹ yè plan Jesu gbọn Gbigbọ mẹ yì zùngbo mẹ nado whle e pọn gbọn lẹgba de,

² Whenuena é blanù okle kande ozán kande, enegodo huvẹ́ to hùhù i.

³ Whlepọ́ntọ lọ sọ wa, bo dọ hlan ẹn, dọ, Eyín hiẹ yín Ovi Jiwheyẹwhe tọn, degbena zannu helẹ ni lẹzùn akla.

⁴ Ṣigba e gblọn bo dọmọ, Yè ko wlanwe etọn dọ, Gbẹtọ ma to ogbẹ̀ gbọn akla dopokẹdẹ sinmẹ gba, adavo gbọn ohó he tọ́n sọn onù Jiwheyẹwhe tọn mẹ lẹpo dali.

⁵ Whenẹnu wẹ lẹgba sọ zé e yìaga yì oto wiwe nẹ mẹ, bo sọ ze e do adadanu ohọta templi tọn lọ ji,

⁶ bo so dọ hlan ẹn, dọmọ, Eyín hiẹ yín Ovi Jiwheyẹwhetọn, lón jẹte na dewe: na yè wlanwé etọn dọ, E na naṣẹ angẹli eton lẹ na hie wutu: To alọ yetọn mẹ yé na zé we daga, Hiẹ vlavo niká klẹn afọ towe do zannu go.

⁷ Jesu sọ dọ hlan ẹn, dọmọ, Yè sọ vọ́ ẹ wlan dọ, Hiẹ ma na whle Oklunọ Jiwheyẹwhe towẹ pọ́n.

⁸ Lẹgba sọ vọ́ ẹ zé yi osó he yìaga de ji, bo sọ do aholu yigba aihọn tọn lẹpo, po gigo yeton po hia ẹ;

⁹ é bo sọ dọ hlan ẹn, dọmọ, Onu helẹ pó wẹ yẹn na na we, eyín hiẹ na jẹklo bo litai na mi.

¹⁰ Whenẹnu wẹ Jesu dọ hlan ẹn, dọmo, Tọn sọn ofì, Satani: na yè wlanwé eton dọ, Hiẹ na litaina Oklunọ Jiwheyẹwhe towe, ewọ dopokẹdẹ wẹ hiẹ na no sẹ̀n.

¹¹ Whenẹnu wẹ lẹgba jo e dai; bo, do ayi e go, angeli lẹ sọ wa bo to devizónwà hlan ẹn.

¹² Whenuena é sè dọ yè zé Johanu do ogàn mẹ, è tọnyì Galili;

¹³ é tọ́n sọn Nazaleti, bo wa nọ Kapẹlnaumi ehe tu to ohùtó to Zebuluni po Naítali pò pawhé.

¹⁴ Na ehe yè ko dọ gbọn onu yẹwhegán Isaia tọn mẹ nido di dọ,

¹⁵ Aigba Zebuluni tọn, po aigba Naltali tọn po, To ohu lọ jlẹji, to Jodani godo, Galili kosi lẹ tọn

¹⁶ Omẹ he sinai to zinvlu mẹ Ko mọ hinhọ́n daho, Hlan ye he sinai to aigba po oyẹ̀ oku tọn po dali, Wẹ hinhọ́n họn na.

¹⁷ Sọn whenẹnu wẹ Jesu ko sè yẹwheho dọ, dọmọ, Mì lẹnvọjọ: na ahọludu olọn tọn sẹpọ́.

¹⁸ E to zọnlinzin to ohù Galili tọn tó, bo mọ nọvisunnu awe, Simoni he yè nọ ylọ Pita, po Andlé nọvisunnu etọn po, yé to odọ̀ dlẹn do ohù mẹ: na whehutọ we yé.

¹⁹ E sọ dọ hlan yé, domọ, Mi họdo mi, yẹn nasọ yí mì do basi whehùtọ gbẹtọ lẹ tọn.

²⁰ Yé sọ jo odọ̀ yetọn lẹ dai to tẹndoponeme, bo to hihodo e.

²¹ Le e to yìyì sọn finẹ, é mọ nọvisunnu awe devọ Jakobu, ovi Zebedé tọn, po Johanu nọvisunnu etọn po to vatlẹ mẹ po Zebẹde otọ́ yetọn po, to odọ̀ yetọn tò; é sọ ylọ yé.

²² Afọdoponẹji ye sọ jo vatlẹ lọ po otọ́ yetọn po dai, bo sọ to hihodo e.

²³ Jesu sọ zinzọnlin lẹdo Galili lẹpo pé, é to omẹ plọn to sìnagogu yetọn lẹ mẹ, bo to yẹwheho wẹndagbe ahọludu tọn dọ, é to azọ̀n hunkọhunkọ po madogán hunkọhunkọ po hẹngbọ to gbẹtọ lẹ ṣẹnṣẹn.

²⁴ Linlin eton sọ di lẹ́do Silia lẹpo; yé sọ hẹn azọ̀ntọ lẹpo he do azọ̀n madizọ̀n lẹ wá e de, mẹhe awú do fiẹ lẹ, mẹhe do lẹgba lẹ, podọ yé mẹhe huntadu lẹ, po mẹhe to awúkuzọnjẹ lẹ po; é sọ hẹnazọ̀ngbọna yé.

²⁵ Agùndaho susu so hodo e sọn Galili, sọn Dekapolé, sọn Jẹlusalem, sọn Judé, podọ sọn Jọdani godo.