MATIU 2 - BIBLU WIWE LỌ 1923

¹ WHENUENA yè ji Jesu to Betlẹhẹm Judé tọn, to ahọlu Helodi whenu, do ayi e go, núyọ́nẹntọ delẹ sọn whèzìzẹ dali wá Jẹlusalem,

² to didọ, dọ̀n, Fie wẹ mẹhe yè ji bọ é yín Ahọlu Ju lẹ tọn te ? na míwlẹ mọ sunwhlẹvu etọn to whèzizẹ dali, mí sọ wá taliai nẹ gbé.

³ Whenuena ahọlu Helodi sè onú helẹ, awú etọn ma jai po Jelusalẹm lẹpo po hẹ ẹ.

⁴ Whenuena é bẹ́ ogan yẹwhenọ lẹ tọn po wekantọ lẹpo po plidopọ, é kanbiọ yé fie wẹ yè na ji Klisti te.

⁵ Yé sọ dọ hlan ẹn, dọ, To Betlẹhẹm Judé tọn mẹ wẹ: mọwẹ yè wlanwe etọn gbọn yẹwhegán mẹ,

⁶ Hie Betlehem, aigba Judé tọn, A ma yin vutinuntinun to ahọvi Jude tọn lẹ ṣẹnṣẹn gbọn alọ depope mẹ: Na sọn oho towe mẹ wẹ Otògán, He na yín lẹngbọhọtọ omẹ ṣie Islaeli lẹ tọn, na tọ́n sọn.

⁷ Whenẹnu wẹ Helodi, whenuena é ylọ núyọnẹntọ lẹ do nuglọ, é kanbiọ ye dèdẹ ojlẹ he mẹ sunwhlẹvu lọ sọawúhia te .

⁸ E sọ do yé hlan Betlẹhẹm, bo dọmọ, Mì yì bo din ovi lọ talala; whenuena mí mọ ẹn, mì hẹn owẹ́n gòwá na mi, na yẹn ni wá litai nẹ̀ ga.

⁹ Whenuena yé sè ahọlu tọn, yé tọ́nyì; pọ́n, sunwhlẹvu he yé mọ to whèzizẹ dali sọ jẹnukọn na yé, kaka é wá nọte to aga fie ovi lọ te.

¹⁰ Whenuena yé mọ sunwhlẹvu lọ yé yí ayajẹ dahodaho do jaya.

¹¹ Yé biọ owhégbè, bo mọ ovi lọ po Malia onọ etọn po; yé jẹklo bo litai nẹ: whe-nuena yé tún adọkunnú yetọn, yè na núnina ẹn, sika, núwhẹnwán, po zuya po.

¹² Le yè kó na yé sọn Jiwheyẹwhe de to odlọ me yé ma sọ lẹgò yì Helodi de gba, yé gbọn ali devo yi oto yetọn mẹ.

¹³ Whenuena yé ko tónyì, do ayi e go, angeli Oklunọ tọn sọawúhia Josefu to odlọ mẹ, dọmọ, fọn bo zé ovi lọ po onọ etọn po, bo họ̀nyì Egipti, na hiẹ ni sọ nọ fìne kaka yẹn na do dọhó hlan we; na Helodi na din ovi lọ nado hù i súdo.

¹⁴ E sọ fọ́n, bo yí ovi lọ po onọ etọn po to ozán mẹ, bo sọ tọ́nyì Egipti:

¹⁵ é sọ tin to finẹ kaka jẹ okú Helodi tọn whenu: na ehe yè ko dọ sọn Oklunọ de gbọn onù yẹwhegán tọn menido di, dọmọ, Egipti wẹ yẹn ko ylọ ovi ṣie tọ́n sọn.

¹⁶ Whenẹnu wẹ Helodi, whenuena é mọ dọ é zùn omẹ kiklọ gbọn núyọnẹntọ lẹ dali, é gblehomẹ talala, bo sọ do omẹ hlan bo hù yọpọvú he tin to Betlẹhẹm lẹpo, podoto agbègbè eton lepo mẹ, son ovi owhè awe mẹ tọn jẹ odò, kẹdẹdi ojlẹ he é yí sọwhiwhé do plọ́n sọn núyọnẹntọ lẹ lọ de.

¹⁷ Whenẹnu wẹ ehe yè ko dọ gbọn onùyẹwhegan Jẹlẹmia tọn mẹ di, dọ,

¹⁸ To Lama wẹ yè sè ogbè de te, Avi po awúbla daho po, Laheli to avi ovi etọn lẹ tọn vi, E ma jlo na sevẹ̀, na yé ma tin wutu.

¹⁹ Ṣigba whenuena Helodi kú, do ayi e go, angẹli Okluno tọn sọawúhia to odlọ mẹ hlan Josefu to Egipti,

²⁰ dọmọ, Fọn, bo yí ovi lọ po onọ etọn po, bo yí aigba Islaeli ton ji: na yé mẹhe to ogbẹ̀ ovi lọ tọn din ko kú.

²¹ E sọ fọ́n bo yi ovi lọ po onọ etọn po, bo wá aigba Islaeli tọn ji.

²² Ṣigba whenuena é sè dọ Alkẹlausi duahọlu to Judé to otẹn Helodi otọ́ etọn tọn mẹ, é dibú nado yì finẹ: le yè kọ nẹ̀ sọn Jiwheyẹwhe de to odlọ mẹ, é tọ́nyì Galili pawhé:

²³ é wá, bo sọ sinai to otò he yè nọ ylọ dọ Nazalẹti mẹ: na ehe yè ko dọ gbọn onù yẹwhegán lẹ tọn mẹ nido di, dọ, Yè na ylọ ẹ Nazalẹnù.