LOMUNU LẸ 9 - BIBLU WIWE LỌ 1923

¹ NUGBO dọ wẹ yẹn te to Klisti mẹ, yẹn ma to lalodo gba, ayiha ṣie to kunnu ṣie de to Gbigbọ Wiwe mẹ,

² dọ yẹn tindo nukunbibia po awúbla po to ayiha ṣie mẹ to whepoponu.

³ Na yẹn sọgan jlo dọ yẹn lọsu ni yín anatema sọn Klisti de na mẹmẹsunnu ṣie lẹ, hẹnnumẹ ṣie lẹ dile agbasalan tọn te:

⁴ mẹhe yín Islaeli tọn lẹ; mẹhetọn sọdodovi, po gigo po, alẹ̀nu lẹ pọ nina osén omẹ po, sinsẹ́n Jiwheyẹwhe tọn po opagbe lẹ po yín;

⁵ mẹhetọn otọ́ lẹ yín: podọ sọn mẹhe de Klisti gbọn agbasalan dali wá, mẹhe tin to onú popo ji, Jiwheyẹwhe donanọ kakadoi. Niṣẹ.

⁶ E ma yín dọ ohó Jiwheyẹwhe tọn ma tindo huhlọn lala wẹ gba. Na yé omẹ pó he yín Islaeli tọn ma yín Islaeli gba:

⁷ mọ é ma yín dọ yé yín okún Ablaham tọn wutu, wẹ yé omẹ pó do yín ovi gba: ṣigba, To Isaki mẹ wẹ yè ná ylọ okún towe te.

⁸ Enẹ wẹ, E ma yín he yín ovi agbasalan tọn lẹ, wẹ ovi Jiwheyẹwhe tọn gba: ṣigba oviopagbe tọn lẹ wẹ yè hia na okún de.

⁹ Na ehe wẹ ohó opagbe tọn, To ójlọ he mẹ yẹn na wá, Sala na tindo visunnu de.

¹⁰ E ma sọ yín ehe kẹdẹ; ṣigba whenuena Lebẹka mọhò gbọn omẹ de dali gbọn Isaki otọ́ mítọn dali;

¹¹ (na ovi he yè ma tlẹ ko ji lẹ, he ma ko wà dagbe kavi oylan, na lẹndote Jiwheyẹwhe tọn di mẹdidè tọn nido nọte, é ma yín azọ́n tọn gba, adavo omẹ he ylọmẹ tọn;)

¹² yè dọ hlan ẹn, dọmọ, Mẹho na sèn yọ̀pọ.

¹³ Dile yè wlan ẹn dọ, Jakobu wẹ yẹn yiwanna, ṣigba Esau wẹ yẹn gbẹwanna.

¹⁴ Etẹ ka wẹ mí na dọ lò? Mawàdódó tin to Jiwheyẹwhe de wẹ? E yín mọ blo.

¹⁵ Na ewọ dọ hlan Moṣe, dọmọ, Yẹn na wàlẹblanuna mẹhe yẹn na wàlẹblanuna, yẹn nasọ tindo awubla na mẹhe yẹn na tindo awubla na.

¹⁶ Enẹwutu é ma yín ewọ he tò jijlo tọn, kavi ewọ he to wezundo tọn, ṣigba Jiwheyẹwhe he do lẹblanu hia tọn wẹ.

¹⁷ Na Owó wiwe dọ hlan Falo, dọmọ, Yèdọ na lẹndote dopo he lọ wutu wẹ yẹn zé we tite, na yẹn nido do huhlọn ṣie hia to hiẹ mẹ, podọ na oyín ṣie nido yín lilá gbọn aihọn lẹpo mẹ.

¹⁸ Enẹwutu wẹ é wàlẹblanuna mẹhe é na wàlẹblanuna, podọ mẹhe é jlo é hẹn ayiha sinyẹn na.

¹⁹ Hiẹ na dọ hlan mi lò, dọ, Etẹwutu wẹ é gbẹsọ to aklọndin? Na menu wẹ diọnukunsọ ojlo etọn?

²⁰ Lala, hiẹ gbẹtọ, mẹnu wẹ hiẹ he to gbèdana Jiwheyẹwhe? Onú he yè do na dọ hlan ewọ he do e, dọ, Etẹwutu wẹ hiẹ basi mi do le?

²¹ Ozéndotọ ma tindo huhlọn to okò ji, sọn mimlin dopolọ mẹ nado basi núzinzán dopo hlan yẹyi, podọ devo hlan madoyẹyi:

²² be eyín Jiwheyẹwhe jlo nado do homẹgble etọn hia, podọ nado hẹn huhlọn etọn zùn yinyọnẹn, bọ é miọnhomẹ do núzinzán homẹgble tọn go he yè do hlan hẹngble:

²³ podọ na ewọ nido hẹn adọkun gigo etọn tọn zùn yinyonẹn to núzinzán lẹblanu tọn lẹ ji, he é wleawuna dote hlan gigo,

²⁴ yèdọ mí, mẹhe é ylọ lẹ, é ma yín sọn Ju lẹ mẹ kẹdẹ, ṣigba sọn Kosi lẹ mẹ ga?

²⁵ Dile é dọ ga to Hosea mẹ, dọ, Yẹn na ylọ yé omẹ he ma yín omẹ ṣiẹ lẹ dọ omẹ ṣie; Podọ ewọ mẹyiwanna, he ma yín mẹyiwanna.

²⁶ E nasọ wá jọ, dọ to ofi he yè dọ hlan yé te, dọmọ, Mìwlẹ ma yín omẹ ṣie gba; Finẹ wẹ yè na ylọ yé ovi Jiwheyẹwhe ogbènọ tọn te.

²⁷ Isaia dawhá gbọn Islaeli tọn dali, dọmọ, Eyín sọha ovi Islaeli tọn lẹ tlẹ yín sùsù di otòkén ohù tọn, yè na whlẹn adade gán.

²⁸ Na ewọ na dotana azón lọ, bo na sọ sán ẹn dogli to dódó mẹ; na azón gli wẹ Oklunọ na basi to aigba ji wutu.

²⁹ Podọ dile Isaia dọ do jẹnukọn, dọmọ, Eyín Oklunọ awhanpa tọn ma ko pò okún de dai na mi, Mí na ko dile Sọdọmi te, yè na ko sọ basi mí hlan di Gọmọla.

³⁰ Etẹ ka wẹ mí na dọ lò? Dọ alọ Kosi he ma zingbọn ali dódó tọn ji le tọn ko pla dódó yèdọ dódó he yín yise tọn.

³¹ Sjgba alọ Islaeli he zingbọn ali osén dódó tọn ji ma ko pla osẹn dódó tọn gba.

³² Etẹwutu? Na yé ma din in gbọn yise dali wutu, ṣigba dile é yín gbọn azón osén tọn lẹ dali. Yé dahli to zannu ahlidida tọn ji;

³³ dile yè wlan ẹn do, Dayi e go, yẹn zé zannu ahlidida tọn po osé afọklẹn tọn de po dote to Ziọni mẹ, Ewọ he yí í se, winyan ma na hù i.