LOMUNU LẸ 8 - BIBLU WIWE LỌ 1923

¹ ENẸWUTU whẹgbledo de ma tin dinvie hlan yé he tin to Klisti Jesu mẹ lẹ, he ma to zọnlinzin di agbasalan tọn, adavo di Gbigbọ tọn.

² Na osén sọn Gbigbọ ogbe tọn mẹ to Klisti Jesu me ko hẹn mi vo to osén ylando po okú po ton si.

³ Na ehe osén ma sọgan wà, na ehe mẹ è yín madogánnọ te gbon agbasalan dali, Jiwheyẹwhe to dido Ovi etọn titi hlan to ohia agbasalan he gó na ylando, podọ na ylando, ko gblewhẹdo ylando to agbasalan mẹ:

⁴ na yè nido ẹn ogbèdai osén tọn sọ to mí mẹ, mẹhe ma zinzọnlin di agbasalan tọn, adavo di Gbigbọ tọn.

⁵ Na yé he tin gbọn agbasalan dali lẹ nọ pọ́n onú he yín agbasalan tọn lẹ go; ṣigba omẹ he tin gbọn Gbigbọ dali lẹ nọ pọ́n onu he yin Gbigbọ tọn lẹ go.

⁶ Na nado yin agbasalan nugopóntọ wẹ okú; ṣigba nado yín Gbigbọ nugopóntọ wẹ ogbẹ̀ po jijọho po.

⁷ Na agbasalan go pinpọ́n wẹ okẹn do Jiwheyẹwhe go: na é ma yín mẹmẹglọ hlan osén Jiwheyẹwhe tọn kavi é ma tlẹ sọgan yín mọ lala.

⁸ Be whenẹnu yé he tin to agbasalan mẹ lẹ ma sọgan mọ nukundagbe Jiwheyẹwhe tọn gba

⁹ Ṣigba mìwlẹ ma tin to agbasalan mẹ gba, adavo to Gbigbọ mẹ, eyín é yín mọ dọ Gbigbọ Jiwheyẹwhe tọn nọnọ̀ mì mẹ. Eyin omẹ de ma tindo Gbigbọ Klisti tọn, ewọ ma yín ode to omẹ etọn lẹ mẹ.

¹⁰ Podọ eyín Klisti tin to mì mẹ, agbasa yín osiọ na ylando tọn wutu; ṣigba Gbigbọ yín ogbè na dódó tọn wutu.

¹¹ Ṣigba eyín Gbigbọ omẹ he zé Jesu tite sọn osiọ lẹ mẹ tọn nọnọ̀ mì mẹ, ewọ omẹ he zé Klisti tite sọn osiọ lẹ mẹ na gbọn Gbigbọ etọn he nọnọ̀ mì mẹ dali diọ agbasa kúkú mìtọn do ogbẹ́.

¹² Enẹwutu, mẹmẹsunnu emi ahótọnọ wẹmí, é ma yín hlan agbasalan, nado nọgbó di agbasalan tọn gba.

¹³ Na eyín mí nọgbè di agbasalan tọn, mì na kú: ṣigba eyín mì gbọn Gbigbọ dali hẹn owalọ agbasa tọn lẹ kú, mì na nọgbẹ̀.

¹⁴ Na omẹ sọha he yè hlẹali gbọn Gbigbọ Jiwheyẹwhe tọn dali, yé wẹ ovi Jiwheyẹwhe tọn.

¹⁵ Na mìwlẹ ma yí gbigbọ mẹglọnọ tọn na sọ do to budi gba; ṣigba gbigbọ sọdodovi tọn wẹ mì yí, ehetọn dali mí to awhádo ylọ, Abba, Oto.

¹⁶ Gbigbọ lọsu sọ to kunnude hẹ gbigbọ mítọn, dọ ovi Jiwheyẹwhe tọn wẹ mí;

¹⁷ be eyín mí yín ovi, whenẹnu whédutọ; whédutọ Jiwheyẹwhe tọn, podọ whédutọ dopọ hẹ Klisti; eyín é yín mọ dọ mí jiya hẹ ẹ, na yè nido pagigona mí dopọ hẹ ẹ ga.

¹⁸ Na yẹn hia dọ oya whenu dinvie tọn ma jẹ nado yí jlẹdo gigo he yè na sọhia to mí mẹ go gba

¹⁹ Na nuku-ndo nudida tọn nọtepọn osọhia ovi Jiwheyẹwhe tọn lẹ tọn.

²⁰ Na yè hen nudida yín mẹmẹglọ hlan ovó, é ma yin po ojlo po gba, ṣigba gbọn linlẹn omẹ he yí dopolọ do mẹglọ to tódido mẹ tọn dali.

²¹ Na yè na whlẹn nudida lọsu sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ.

²² Na mí yọnẹn dọ nudida lẹpo péte wẹ to winwẹn bo sọ to ajipanu to awufiẹsa mẹ hẹ mí kakajẹ dinvie.

²³ E ma sọ yín yéwlẹ kẹdẹ, aigba mìlọsu ga, he tindo sinsẹ́n tintan Gbigbọ tọn lẹ, yèdọ mìlọsu to winwẹn to ohò mítọn mẹ, bo to tenọpón sọdodovi, enẹ wẹ dọ, ofligò agbasa mítọn tọn.

²⁴ Na gbọn tódido dali wẹ yè whlẹn mí; ṣigba tódido he yè mọ ma yín tódido gba: na onú he gbẹtọ mọ, etẹwẹ é sọ to tódo ba?

²⁵ Ṣigba eyín mi to tódo ehe yè ma mọ, be mí yí homẹmiọn do nọtepọ́n ẹn.

²⁶ Mọdoponẹ wẹ Gbigbọ lọ ga to alọgọna madogán mítọn: na mí ma yón núhe mí na hodè na dile é jẹ na mí do; ṣigba Gbigbọ lọsu yí winwẹn he yè ma sọgan dọpọ́n do to vẹ̀vẹ̀ na mí.

²⁷ Podọ omẹ he to ayiha mẹ dinpọ́n yọ́n núhe ayiha Gbigbọ tọn yín, na é to vẹ̀vẹ̀ na mẹwiwe lẹ kẹdẹdi ojlo Jiwheyẹwhe tọn wutu.

²⁸ Podọ mi yọnẹn dọ onú lẹpo wẹ to azọ́nwà dopọ na dagbe hlan yé he yiwanna Jiwheyẹwhe, yèdọ hlan yé he yín mẹyiylọ lẹ kẹdẹdi lẹndote etọn.

²⁹ Na mẹhe é yọnẹnjẹnukọn, ewọ wẹ é ko dè nado yín mẹkọndopọ hlan apajlẹ Ovi etọn tọn, na ewọ nido yín plọnji to mẹmẹsunnu sùsù ṣẹnṣẹn.

³⁰ Podọ mẹhe é dè, yé wẹ ewọ ylọ ga; podọ mẹhe é ylọ, yé wẹ é sùwhẹna ga: mẹhe é sọ sùwhẹna, yé wẹ é pagigona ga.

³¹ Etẹ ka wẹ mí na dọ do onúhelẹ go lò? Eyín Jiwheyẹwhe tin na mí, mẹnu wẹ tin agọ̀ do mí go?

³² Ewọ he ma hla Ovi etọn titi do ogbẹ̀, ṣigba bo jo e na mí omẹ pó wutu, na é ma na na onú popo mí vọnu hẹ ẹ ga do?

³³ Mẹnu wẹ na sẹ onú de dokò na mẹsinyansinyan Jiwheyẹwhe tọn lẹ? Jiwheyẹwhe wẹ sùwhẹ.

³⁴ Mẹnu wẹ ewọ he to whẹgbledomẹ? Klisti wẹ omẹ he kú, nugbo, yè ni kukú dọ, he yè sọ zetite, mẹhe tin yèdọ to adusilọ Jiwheyẹwhe tọn mẹ, mẹhe to vẹ̀vẹ̀ na mí ga.

³⁵ Mẹnu wẹ na klán mí sọn owanyi Klisti tọn mẹ? tukla na, kavi nukunbibia, kavi homẹkẹn, kavi huvẹ, kavi omẹjẹ, kavi owu, kavi ohi?

³⁶ Dile yè wlan dọ, Na towe tọn wutu yè to mí hù to azán popo gbè; Yè to mí hia di lẹngbọ na hùhù.

³⁷ Ṣigba to onú helẹ pó mẹ mí hú awhàngbàtọ gbọn ewọ he yiwanna mí dali.

³⁸ Na yè hẹn mi yọnẹn dọ, okú, kavi ogbẹ̀, kavi angẹli lẹ, kavi ogán lẹ, kavi huhlọn lẹ, kavi onú whenu he tọn lẹ, kavi onú he ja lẹ.

³⁹ Kavi aga, kavi odò, kavi nudida devo de ma na tin sọgan nado klán mí sọn owanyi Jiwheyẹwhe tọn he tin to Klisti Jesu Oklunọ mítọn mẹ gba.