LOMUNU LẸ 3 - BIBLU WIWE LỌ 1923

¹ ENEWUTU ogbọjẹ tẹwe Ju tindo? kavi eté wẹ ede owhẹgbo tọn?

² Susu to ofi popo: tintan popo tọn, yé wẹ yè yí ohó Jiwheyẹwhe tọn do naplọn

³ Na núhe eyín ome dele tin matin yisẹ? mayise yetọn na hen nugbowà Jiwheyẹwhe tọn zunvó we?

⁴ E yín mọ blo: mọwẹ, mì gbọ yè ni yí Jiwheyẹwhe do nugbonọ, ṣigba gbẹtọ lẹpo lalonọ de; dile yé Wlan en dọ, Na yè nido sùwhẹna hiẹ to ohó towe lẹ mẹ, Bo sọ do glonú whenuena hiẹ wá biọ whẹ̀dida mẹ.

⁵ Ṣigba eyín mawàdódó mìton to dódó Jiwheyẹwhe tọn pa, etẹwẹ mí na dọ? Jiwheyẹwhe he yí homegble do to didlapọn yín mawàdódónọ wẹ? (Yẹn dọhó di gbẹtọ tọn)

⁶ E yín mọ blo: na whenẹnu nawẹ Jiwheyẹwhe na dawhè aihọn tọn do?

⁷ Na eyín nugbo Jiwheyẹwhe tọn zùn susu gbọn lalo ṣie me hlan gigo etọn; etẹwutu wẹ yè gbésọ to whèdana mi ga di ylandonọ de?

⁸ Be etẹwutu wẹ, (dile yè to ohó ylanylan yí do to mí sle, podọ dile omẹ delẹ to didọ nugbinnugbin do, dọ mìwlẹ to didọmọ;) Mì gbọ mí ni wàylan, na dagbe nido wá? yé omẹ he whegbledo yetọn whén.

⁹ Etẹ wẹ lò? Be mìwlẹ pónte hú yé? Lala, é ma yín mọ gba: na míwlẹ ko dindòna Ju lẹ po Kosi lẹ po, bo mọ dọ yé omẹ pó we tin to ylando glọ;

¹⁰ dile yè wlan ẹn dọ, Dódónọ depope ma tin, lala, dopo ma tin:

¹¹ Omẹ de ma tin he tunwun, Ome de ma tin he to Jiwheyẹwhe din

¹² Yé omẹ pó wẹ ko lé japadopo, yé ome pó wẹ lẹzùn madoalenọ patapata; Omẹ de ma tin he to dagbe wà, lala, dopo ma tin.

¹³ Olido he tin nùvò de wẹ ovégo yetọn; edó-yetọn wẹ yé ko yí do zán oklo; Adi lopa tọn tin to nuflo yetọn lẹ glọ:

¹⁴ Onù mehetọn gọ na jeho do po vivé po:

¹⁵ Afo yetọn yá nado kòn ohùn dai:

¹⁶ Hẹngble pọ nukunbia po tin to aliho yetọn lẹ ji:

¹⁷ Yé ma sọ yón aliho jijọho tọn:

¹⁸ Osi Jiwheyẹwhe tọn de ma tin to nukun yetọn lẹ nukọn.

¹⁹ Mìwlẹ yọnẹn dọ onú depope he osén dọ, é dọ hlan omẹ he tin to osén glọ lẹ: na yè nido hẹn onù lẹpo bọ̀do, podọ na aihon lẹpo nido yín hinhẹnwá whẹ̀dida Jiwheyẹwhe tọn glọ.

²⁰ Na gbọn azón osén tọn lẹ dali, omẹ de ma na tin bọ yè na hia na dódónọ to nukọn etọn gba wutu na osén dali wẹ oyọnẹn ylando tọn tẹ.

²¹ Ṣigba dinvie yè hẹn dódó Jiwheyẹwhe tọn matin osén sọawúhia, he yè to kunnudena gbọn osén po yẹwhegán lẹ po dali;

²² yèdọ dódó Jiwheyẹwhe tọn he gbọn yise Jesu Klisti tọn dali hlan omẹ popo podọ to omẹ he yise lẹpo ji: na ode ma tin to ovò:

²³ na omẹ pó wẹ wàylan, bo sọ whète do gigo Jiwheyẹwhe tọn go;

²⁴ omẹ yè to whẹsuna vọnu gbọn ojọmiọn etọn dali, gbọn ofligò he tin to Klisti Jesu mẹ:

²⁵ mẹhe Jiwheyẹwhe zé donukọn nado yín oyẹsunú gbọn yise mẹ, to ohùn etọn mẹ, nado la dódó etọn na jijo ylando hóhó yè wà lẹ do tọn wutu to linsinsinyẹn Jiwheyẹwhe tọn mẹ;

²⁶ na didohia lọ, yen dọ, dódó eton tọn, to ojlẹ he mẹ; na ewo nido yín dódónọ podọ whẹsùtọ omẹ hẹ yí Jesu se tọn.

²⁷ Fie wẹ aliho awagundido tọn te? Yè ko bẹ ẹ sẹ́. Gbọn osén tẹ dali? azón lẹ tọn la? Lala: ṣigba gbọn osén yise tọn de dali.

²⁸ Enẹwutu mìwlẹ hia dọ yè sùwhẹna omẹ gbọn yise dali to matin owalọ osẹn tọn lẹ mẹ

²⁹ Kavi Jiwheyẹwhe Ju lẹ tọn kẹdẹ wẹ Jiwheyẹwhe? be ewọ ma yin Kosi lẹ tọn ga? Mowẹ, Kosi lẹ tọn wẹ ga:

³⁰ e yín mọ wẹ e te dọ dopo wẹ Jiwheyẹwhe, podọ ewọ na sùwhẹna owhẹgbo sọn yise mẹ, podọ owhẹmagbo gbọn yise lọ mẹ.

³¹ Be mí to osén hẹn zùn ovó gbọn yise mẹ wẹ? E yin mọ blo: ṣigba mìwlẹ to osén hẹn lódo.