LOMUNU LẸ 10 - BIBLU WIWE LỌ 1923

¹ MẸMẸSUNNU emi, ojlo ayiha ṣie tọn po odẹ̀ po blan Jiwheyẹwhe de na yé wẹ, dọ yè nido whlẹn yé gán.

² Na yẹn dekunnuna yé dọ yé tindo vivẹnu Jiwheyẹwhe tọn, ṣigba é ma gbọn ali oyọnẹn tọn gba.

³ Na yínyín madọnanọ dódó Jiwheyẹwhe tọn, bo sọ to dindin nado hẹn dódó yetọn titi lódo, yé ma jo yéde hlan dódó Jiwheyẹwhe tọn gba.

⁴ Na Klisti wẹ opòdo osón tọn hlan dódó jẹ mẹdepope he yise de.

⁵ Na Moṣe jlé dódó he yín osén tọn dọ, Omẹ he wà onú nẹlẹ na nọgbẹ̀ gbọn yé dali.

⁶ Ṣigba dódó he yín yise tọn dọhó dole, dọ, A dọ to ayiha towe mẹ, dọ, Mẹnu wẹ na hẹaga yì olọn mẹ blo? (enẹ wẹ, nado hẹn Klisti jẹte sọn aga wá:)

⁷ kavi, Mẹnu wẹ na jẹte yì odò mẹ? (enẹ wẹ, nado vó Klisti hẹn wá aga sọn osiọ lẹ mẹ.)

⁸ Ṣigba etẹwẹ é dọ? Ohó lọ tin to de we, yèdọ to onù towe mẹ, podọ to ayiha towe mẹ: enẹ wẹ, ohó yise tọn, he mí to yẹwheho etọn dọ;

⁹ dọ eyín hiẹ na yí onù towe do yigbè Jesu Oklunọ tọn, bo nasọ yise to ayiha towe mẹ dọ Jiwheyẹwhe zé e tite sọn osiọ lẹ mẹ, yè na whlẹn we gán.

¹⁰ Na ayiha wẹ gbẹtọ do yise hlan dódó; onù wẹ yè do basi ogbèyí hlan whlẹngan.

¹¹ Na Owé wiwe dọmọ, Mẹdepope he yí i se winyan ma na hù i.

¹² Na dehlanvò de ma tin to Ju po Gleki po ṣẹnṣẹn gba: na Oklunọ dopolọ to popo ji wẹ wàdọkun hlan omẹ he ylọ oyín etọn lẹpo.

¹³ Na yè na whlẹn mẹdepope he na ylọ oyín Oklunọ tọn gán.

¹⁴ Nawẹ yé na ylọ oyín mẹhe yé ma yise tọn do? podọ nawẹ yé na yí mẹhe yé ma ko sehó etọn gbède se do? podọ nawẹ yé na sè do matin yẹwhehodọtọ?

¹⁵ Nawẹ vó na dọyẹwheho do, adavo yé yín didohlan? dile yè wlan ẹn dọ, Nawẹ afọ yé he dọyẹwheho wẹndagbe jijọho tọn, bo sọ hẹn owẹn dagbe onú dagbe lẹ tọn wá yónwhanpẹ sọ!

¹⁶ Ṣigba yé omẹ pó ma yí wẹndagbe se gba. Na Isaia dọmọ, Oklunọ, mẹnu wẹ yí ọwẹn mítọn Se?

¹⁷ Be whenẹnu yise wá sọn sisè mẹ, podọ sisè gbọn ohó Klisti tọn dali.

¹⁸ Ṣigba yẹn dọmọ, Be yé ma sè? Nugbonugbo, Ogbè yetọn tón yì aigba lẹpo ji, Podọ ohó yetọn lẹ hlan opodo aihọn tọn lẹ.

¹⁹ Ṣigba yẹn dọmọ, Be Islaeli ma yọnẹn? Moṣe whéwhé dọ, dọmọ, Yẹn na gbọn omẹ he ma yín gbẹtọ lẹ dali hẹn adido mì hlan awuwhàn, Podọ gbọn akọta wunvinọ dali wẹ yẹn na hẹn adido mì.

²⁰ Ṣigba Isaia tlẹ dotu, bo dọmọ, Yè mọ mi to yé he ma din mi lẹ de; Yè sọ do mi hia hlan yé he ma kàn mi biọ lẹ.

²¹ Ṣigba hlan Islaeli wẹ é dọmọ, To azán popo gbè wẹ yẹn ko dlẹn alọ ṣie lẹ jẹgbonu hlan gbẹtọ tólivẹtọ mẹglatọ lẹ de.