KỌLỌSINU 3 - BIBLU WIWE LỌ 1923

¹ BE eyín mì fọ́n dogbẹ̀ bẹ Klisti ga, mì nọ din onú be tin to aga le, fie Klisti sinai te to adusilọ Jiwheyẹwhe tọn mẹ.

² Mì nọ zé ojlo ayiha mìtọn tọn daga do onú he tin to olọn mẹ lẹ go, é ma yin onu he tin to aihọn mẹ go gba.

³ Na mì ko kú, bọ yè sọ yí ogbè mìtọn whlá do Klisti de to Jiwheyẹwhe mẹ.

⁴ Whenuena Klisti, mẹhe yín ogbè mítọn, na yí ede hia, whenẹnu wẹ mìwlẹ ga na yí mìde hia gọ́ nẹ̃ to gigo mẹ.

⁵ Enẹwutu mì nọ hẹn awutugonu mìton he tin to aihọn me lẹ kú, gàlilọ, mawé, wantúntún, ojlo ylankan, po nukunkẹn po, he yín bosiọsinsón:

⁶ na onú he tọn wutu homegble Jiwheyẹwhe tọn ja ota ovi tólivetọ lẹ tọn ji;

⁷ ehe mẹ mìwlẹ ga ko to zọnlinzin de to ojle de mẹ dai, to whenuena mì tin to ogbè to yé mẹ.

⁸ Ṣigba dinvie mì klọn ehele pó dai ga, homegble, adi, homekẹn, nutlọ, po ohógblo po sọn onù mìton mẹ:

⁹ mì dolalona mìnọzo blo, sapọn dọ mì ko klón gbẹtọ hóhó nẹ dai po azón etọn pọ;

¹⁰ bo ko zé dawe yọ́yọ́ nẹ dogo, ehe yè diọ zùn yóyo jẹ oyọnẹn mẹ kẹdẹdi apajlẹ mẹhe da ẹtọn:

¹¹ fie Gleki kavi Ju, owhẹgbo kavi owhẹmagbo, akọmasegbe, Skitiatọ, mẹmẹglọ kavi mẹmẹdekannu ma tin te; ṣigba Klisti wẹ popo, podọ to popo mẹ.

¹² Enewutu, di mẹsinsinyan Jiwheyẹwhe tọn, mẹwiwe, mẹyiwanna, mì zé lẹblanu homẹ tọn, odagbewà, hùwhẹ, wàlọmimiọn, po linsinsinyẹn po dogo;

¹³ mì sọ nọ sinyẹnlin hẹ mìnọzo, mì nọ jona mìnọzo, eyín mede tindo wiwo do mẹde go; yèdọ dile Klisti Jona mì do, mọ ga wẹ mì ni nọ basi do.

¹⁴ Otado onú hele pó tọn, mì zé owanyi dogo, ehe yín poninọ gbèsisọ tọn.

¹⁵ Mì sọ gbọ jijọho Jiwheyẹwhe tọn ni dugán to ayiha mìtọn mẹ, ehe mẹ yè ylọ mì do ga to agbasa dopo me: mì ni sọ nọ dopé.

¹⁶ Mì gbọ ohó Klisti tọn ni nọ nò mì me susugege to nuyọnẹn popo me; mì nọ plón, bo sọ nọ kọhóna mìnọzo to ohàn wiwe mẹ, to ohàn pipa tọn mẹ, podọ to ohàn gbigbọnọ mẹ, mì nọ yí ojọmiọn do jihan to ayiha mìtọn mẹ hlan Oklunọ.

¹⁷ Nudepope he mì to bibasi to ohó mẹ, kavi to wiwà mẹ, mìnọ basi popo to oyín Jesu Okluno tọn me, bo nọ na opé hlan Jiwheyẹwhe Otọ́ gbọn ewọ mẹ.

¹⁸ Mì asi le, mì yín mẹmẹglọ hlan asú mìtọn lẹ, dile é jẹ do to Oklunọ me.

¹⁹ Mì asú lẹ, mì yiwanna asi mìtọn lẹ, mì sọ fiẹ do yé go blo.

²⁰ Mì ovi lẹ, mì nọ setónuna mẹjitọ mìtọn lẹ to onú popo mẹ, na ehe yónwhanpẹ talala to Oklunọ de.

²¹ Mì otọ́ lẹ, mì hẹn homẹgblena ovi mìtọn lẹ blo, na yé nikã gblehomẹ.

²² Mì afànumẹ lẹ, mì setónuna mẹmẹnu mìtọn lẹ hlan agbasalan to onú popo mẹ: é ma yín yè mọ mẹnukunta do sèn, diwahianọ lẹ gba; ṣigba gbọn ayiha dopo mẹ to osi Jiwheyẹwhe tọn mẹ:

²³ nudepope he mì to wiwà, mì nọ yí ayiha dodó do wà ẹ, kẹdẹdi hlan Oklunọ, é ma yín hlan gbẹtọ gba.

²⁴ Na mì ni yọnẹn dọ Oklunọ de wẹ mìwlẹ na mọ ale ogú tọn yí te: na mì yín mẹmẹglọ hlan Klisti Oklunọ wutu.

²⁵ Ṣigba mẹhe wà onú gigble, é nasọ mọ yí na gbigble he é wà: mẹhòpọ́n gbẹtọ tọn de ma tin.