KỌLỌSINU 2 - BIBLU WIWE LỌ 1923

¹ NÁ yẹn to jijlo dọ mì ni yòn le avùn he yẹn hò na mì lọ klo sọ, na Laodikeatọ lẹ, podọ na yé omẹ sọha he ma ko mọ nukun ṣie ta gbọn agbasalan tọn mẹ gbède;

² na yè nido hẹnhomẹmiọn ayiha yetọn lẹ, kinkòn yé dopọ to owanyi mẹ, podọ hlan adọkun gigọ́ dódo wuntùntùn tọn, na yé nido yón nudabla Jiwheyẹwhe tọn, yèdọ Klisti.

³ Mẹhe mẹ yè yí adọkunnu nuyọnẹn tọn po zinzin lẹpo po tọn whlá do.

⁴ Ehe wẹ yẹn to didọ, na mẹdepope ma na do yí ohó lalo do klọ mì.

⁵ Na eyín yẹn ma tlẹ tin to mì de to agbasa mẹ, ṣigba yẹn tin to mì de to gbigbọ mẹ, yẹn sọ to ayajẹ, bo sọ to zọnlin jijlọ mìtọn pọ̀n, podọ oteninọ yise mìtọn tọn to Klisti mẹ.

⁶ Enẹwutu le mì yí Klisti Jesu Oklunọ do, mọwẹ mì ni nọ to zọnlinzin to ewọ mẹ do:

⁷ na yè ni yí afọ mìtọn hẹnai, na yè ni sọ dó mì daga to e mẹ, bo hẹn mì lódo to yise mẹ, yèdọ dile yè plọn mì do, na mì ni sọ to susudeji to dopo lọ mẹ po pẹ́dido po.

⁸ Mì nọ payi do mìde na mẹde ma na do yí yinyọnẹn po oklọ tata po do bé mì, gbọn otànhóhó gbẹtọ tọn dali, gbọn ojọgbè aihọn tọn mẹ, ehe ma dile Klisti tọn te.

⁹ Na ewọ mẹ we gigọ́ ozọnji Jiwheyẹwhe tọn lẹpo nọnọ̀ to agbasa mẹ.

¹⁰ E ko sọ basi mì sọgbè to ewọ mẹ, mẹhe basi ota ogán lẹ, po huhlọntọ lẹpo po tọn:

¹¹ mẹhe mẹ yè to owhẹgbo he yè ma yí alọ do basi gbò na mì, gbon ehe mẹ mìwlẹ ga ko klòn agbasa agbasalan tọn lọ tọn dai gbọn owhẹgbo Klisti tọn mẹ:

¹² bọ yè sọ di mì dopọ hẹ ẹ to baptem mẹ, ehe mẹ yè fọ́n mì do ogbè po e po te ga gbọn yise mẹ to azón wiwà Jiwheyẹwhe tọn mẹ mẹhe fọ́n ẹn tite do ogbè sọn osiọ lẹ mẹ:

¹³ podọ mìwlẹ, mẹhe ko kú to ylando mìtọn lẹ mẹ po owhẹmagbo agbasalan mìtọn tọn po mẹ, wẹ yè sọ diọzun ogbẹnọ dopọ hẹ ẹ ga, bo sọ jo ylankan mìtọn lẹpo na mì;

¹⁴ bo sọ súnsún yíyíalọdowlan oséndai tọn sò he tin to okèn hẹ míehe jẹagò do mí, é dè e sọn aliho bo whè e do satin go;

¹⁵ bo sọ klòn gándudu lẹ po huhlọn lẹ po sọn ede go, é basi odohia yé tọn de gbangba, bo sọ to aglinjẹ tò yé ji to e mẹ.

¹⁶ Enewutu mì dike mẹde sọ dawhèna mì to núdùdù mẹ blo, kavi onú nùnù mẹ, kavi gbọn azán hunwhe de tọn dali, kavi osùn yọ́yọ́ de, kavi gbojẹzán de dali:

¹⁷ ehe yín oyè onú be ja lẹ tọn de; ṣigba Klisti tọn wẹ agbasa.

¹⁸ Mì dike mede fìn ale mìtọn sọn mì si blo, gbọn hùwhẹ be sọn ojlo ede lọsu tọn mẹ de dali, po taliaina angeli lẹ tọn po, bo nò onú he ewọ ko mọ le me, bo sọ nọ to kikla gbọn nuyọnẹn agbasalan etọn tọn mẹ,

¹⁹ bo ma sọ hen Ota lọ go gligli, sọn ehe me agbasa lepo gbọn agomẹàgomẹ gbọn kanmẹ-kanmẹ nọ mọ dùdù yí te, bọ yè sọ sín ye mepo dopọ, be to susudeji gbọn deji Jiwheyẹwhe tọn me.

²⁰ Enẹwutu eyín mìwlẹ kúhẹ Klisti sọn ojodo aihọn tọn le me, etewutu, di mehe tin to ogbè to aihọn mẹ, wẹ mì do yín memeglọ hlan oséndai lẹ,

²¹ (ẹ hen e go blo; a dópón blo; a zinpon blo;

²² onu he lepo na dòn po zínzan po;) kedẹdi osen po oplọ́n gbẹtọ tọn po?

²³ Onu he tindo ohia yìnyọnẹn tọn de nugbo, to ojlo taliaì po hùwhẹ po mẹ, po mapò agbasa yìnte po; he ma yin yẹyi de to nupekò agbasalan tọn ji.