JỌṢUA 9 - BIBLU WIWE LỌ 1923

¹ E sọ wá jọ, whenuena ahọlu he tin to Jọdani godo lẹpo, to otò okọta tọn mẹ, podọ to dòdòklidò mẹ, podọ to hùtò ohù daho tọn lẹpo to nukọn Lebanọni tọn, Hitinu lẹ, po Amolinu lẹ po, Kananinu lẹ, Pẹlizinu lẹ, Hivinu lẹ, po Jẹbusinu lẹ po, sè e;

² wẹ yé bẹ́ yéde plidopọ, nado yí gbènọpọ do hoavùn hẹ Jọṣua podọ hẹ Islaeli.

³ Ṣigba whenuena tòmẹnu Gebioni tọn mẹ sè nùhe Jọṣua ko wa hlan Jẹliko po Ai po,

⁴ Yéwlẹ ga yí vòblanamẹ do wànú, yé yì bo basi di mẹdagun lẹ wẹ yé yín, bo yí oku hóhó lẹ do kẹtẹkẹtẹ yetọn lẹ ji, po ayú-gò ovẹ̃n tọn lẹ po, he dohó bo sọ tlẹn bọ yè dé;

⁵ po afọpa hóhó vàsú lẹ po do afọ yetọn, po awu hóhó lẹ po do ògo; akla núdùgbàn yetọn tọn lẹpo wẹ hú bo sọ lẹzùn owhà dodo.

⁶ Yé sọ yì Jọṣua de to osla mẹ to Gilgali, bo dọ hlan ẹn, podọ hlan omẹ Islaeli tọn lẹ dọ, Òtò dindẹn mẹ wẹ míwlẹ sọn: enẹwutu dinviẹ basi alènu de hẹ mí.

⁷ Ómẹ Islaeli tọn lẹ sọ dọ hlan Hivinu lẹ dọ, Èya ṣẹnṣẹn mí tọn wẹ mì nọnọ̀; nawẹ mí na basi alẹ̀nu de hẹ mì do?

⁸ Yé sọ dọ hlan Jọṣua dọ, Mẹmẹsi towe wẹ mìwlẹ. Joṣua sọ dọ hlan yé dọ, Mẹnu wẹ mìwlẹ? podọ fie wẹ mì sọn wá?

⁹ Yé sọ dọ hlan ẹn dọ, Otò dindẹn talala de mẹ wẹ mẹmẹsi towe lẹ sọn wá na oyín OKLUNỌ Jiwheyẹwhe towe tọn wutu: na mìwlẹ ko sè linlin e tọn, po onú he é wà to Egipti mẹ lẹpo po,

¹⁰ po ehe é wà lẹpo po hlan ahọlu awe Amọlìnu lẹ tọn lẹ, he tin to Jọdani godo dọn, hlan Sihọni ahọlu Hẹṣbọni tọn, podọ hlan Ogi ahọlu Baṣani tọn, he ko tin to Astalọti.

¹¹ Bọ mẹho mìtọn lẹ po tòmenu otò mìtọn tọn lẹpo po dọhó hlan mí, dọmọ, Mì yí núdùgbàn do alọ mìtọn mẹ na gbéjizọnlin lọ, bo yì nado pé yé, bo dọ hlan yé dọ, Memẹsi mìtọn wẹ míwlẹ: dinvie mì ni basi alẹ̀nu de hẹ mí.

¹² Akla mìtọn miyọnawu wẹ mì yí na núdùgbàn mìtọn sọn owhé mìtọn lẹ gbè to azán he gbè mi tọ́n wá nado yì mì de; ṣigba dinvie, dayi e go, é yín húhú, é sọ tin lẹzùn owhà dodo:

¹³ podọ ayúgo helẹ, he mí gọ́, yín yọ̀yọ̀; bo, dayi e go, Yé yín tintlẹn podọ awu mìtọn helẹ po afọpa mìtọn lẹ po tin lezùn hóhó gbọn tedidi glanglan gbéjizọnlin lọ tọn tọn dali.

¹⁴ Omẹ ewlẹ sọ yí sọn núdùgbàn yetọn mẹ, bo ma sọ kàn hónamẹ biọ tò onù OKLUNỌ tọn mẹ gba.

¹⁵ Jọṣua sọ basi jijọho hẹ yé, bo sọ basi alènu de hẹ yé, nado gbọ yé ni nọgbè: ahọvi agùn tọn lẹ sọ whle hlan yé.

¹⁶ E sọ wá jọ to opòdo azán atọ̀n tọn ehegodo yé ko basi alẹnu de hẹ yé, wẹ yé sè dọ ṣẹnṣẹn yé tọn wẹ yé nọnọ̀

¹⁷ Ovi Islaeli tọn lẹ sọ jẹgbéjizọnlin ji, bo wá tòdaho yetọn lẹ mẹ to azán atọ̀ntọ gbè. Dinvie tòdaho yetọn lẹ wẹ Gebiọni, po Kefila po, po Beeloti po, po Kiliati-jealimi po.

¹⁸ Ovi Islaeli tọn lẹ ma sọ hù yé gba, na ahọvi agùn tọn lẹ ko whle hlan yé gbọn OKLUNỌ dali wutu, Jiwheyẹwhe Islaeli tọn. Agùn lẹpo sọ to hunhlun do ahọvi lẹ ji.

¹⁹ Ṣigba ahọvi lẹpo dọ hlan agùn lẹpo dọ, Mí ko whle hlan yé gbọn OKLUNỌ dali, Jiwheyẹwhe Islaeli tọn: dinvie enẹwutu mí ma sọgan doalọ yé go gba

²⁰ Ehe wẹ mí na wà hlan yé, bo gbọ yé ni nọgbè: homẹgble nikã tin to mí ji, na whiwhle he mí ko whle hlan yé tọn wutu.

²¹ Ahọvi lẹ sọ dọ hlan yé dọ, Mì gbọ yé ni nọgbè: mọwẹ yé lẹzùn didatọ naké tọn lẹ podọ dindòntọ osìn tọn lẹ hlan agùn lẹpo; dile ahọvi lẹ ko dọhó hlan ye do.

²² Jọsua sọ ylọ yé, ewọ sọ dọhó hlan yé, dọmọ, Etẹwutu wẹ mì blu mí, dọmọ, Mí tin dẹn talala do mì: whenuena é yín mí ṣẹnṣẹn wẹ mì nọnọ̀?

²³ Enẹwutu dinvie mìwlẹ yín dèhodonọ, nado yín mẹglọnọtọ ma na gbla mì go, didatọ naké tọn lẹ podọ dindọ̀ntọ osìn tọn lẹ na owhé Jiwheyẹwhe ṣie tọn.

²⁴ Yé sọ gblọnna Jọsua, bo dọmọ, Na yè dọ na mẹmẹsi towe lẹ nugbonugbo wutu wẹ, na le dọ OKLUNỌ Jiwheyẹwhe towe degbèna Moṣe mẹmẹsi etọn nado na aigba lẹpo mì, podọ nado hù tòmẹnu aigba lọ tọn lẹpo sẹ̀ sọn mì nukọn; enẹwutu wẹ mí yín avosatọ susu na ògbẹ̀ mitọn lẹ na mì tọn wutu, bo ko do wà onú he.

²⁵ Dinvie, dayi e go, alọ towe mẹ wẹ mi te: dile é sọawuhia dagbedagbe bo sọ jlọjẹ hlan we do nado wà hlan mí, wà.

²⁶ Mọwẹ é sọ wà hlan yé, bo whlẹn yé sọn alọ ovi Islaeli tọn lẹ tọn mẹ bọ yé ma do hù yé gba

²⁷ Jọṣua sọ yí yé do basi didatọ naké tọn lẹ po dindòntọ osìn tọn lẹ po to gbenẹgbe na agùn lọ podọ na agbà OKLUNỌ tọn kakajẹ egbé, to otẹn he é na dè mẹ.