JỌṢUA 8 - BIBLU WIWE LỌ 1923

¹ OKLUNỌ sọ dọ hlan Jọsua dọ, A dibu blo, mọ a sọ yín avosatọ blo: yí sunnu awhàn tọn lẹ po hi pò, bo fọ́n, hẹji yì Ai: pọ́n, yẹn ko na do alọ towe mẹ ahọlu Ai tọn, po omẹ etọn lẹ po, po todaho etọn po, po aigba etọn po:

² Hiẹ na sọ wà hlan Ai po ahọlu etọn po dile hiẹ wà hlan Jẹliko po ahọlu etọn po do: ogblannu etọn lẹ kẹdẹ, po kanlinyìnyìn etọn lẹ po, wẹ mì na yí na ogblan de hlan mìde: dè omẹ do owumẹ na todaho lọ to godo etọn.

³ Mọwẹ Jọsua fon, po omẹ awhán tọn lẹpo po, nado heji yì Ai: Jọsua sọ dè omẹ fọtọ́n ogbàn, sunnu adántọ huhlọn tọn lẹ, bo do yé hlan to ozán mẹ

⁴ E sọ degbèna yé, dọmọ, Dayi e go, Mì na mlọnai to owu mẹ do tòdaho lọ ji, to tòdaho lọ godo: mì yì dẹn glanglan do tòdaho lọ blo, ṣigba mì omẹ: pó ni yín awuwletọ:

⁵ podọ yẹn, po omẹ he tin to dẹ̃ lẹpo po na sẹpọ́ tòdaho lọ: é na sọ wá jọ, whenuena yé tọ́n wá míwlẹ ji, di tintan tọn, bọ míwlẹ to hinhọnyì to yé nukọn;

⁶ bọ yéwlẹ na tọ́n hodo mí, kaka mí ko do dọ̀n yé sọn tòdaho lọ mẹ; na yé na dọmọ, Yé họ̀nyì to mí nukọn di tintan tọn; mọwẹ míwlẹ na họ̀nyì to yé nukọn do:

⁷ míwlẹ na sọ fọ́nṣite sọn owu mẹ, bo yí nutindo tòdaho lọ tọn: na OKLUNỌ Jiwheyẹwhe mìtọn na yí i do alọ mìtọn mẹ

⁸ E na sọ yín, whenuena mìvle ko zónzín tòdaho lọ ji, wẹ mì na simiyọn todaho lọ ji; kedẹdile ohó OKLUNỌ tọn te wẹ mì na wà do: pọ́n, yẹn ko degbèna mì.

⁹ Jọsua sọ do yé hlan: yé sọ yì owu mẹ, bo nò Bẹteli po Ai po ṣẹnṣẹn, to whèyìhọ Ai tọn dali: ṣigba Jọṣua nò gbẹtọ lẹ ṣẹnṣẹn to ozán nẹ mẹ.

¹⁰ Jọsua sọ yawu fọ́n tó afọnnu, bo pli gbẹtọ lẹ, bó hẹji yì, ewọ po mẹho Islaeli tọn lẹ po to gbẹtọ lẹ nukọn hlan Ai.

¹¹ Gbẹtọ lẹpo, yèdọ sunnu awhàn tọn he tin to e de lẹ, hẹji yí, bo sẹ̀yi, bo wá tòdaho lọ nukọn, bo whesla do agewàji ada Ai tọn mẹ: dinvie agbàdo de tin to ewọ po Ai po ṣẹnṣẹn.

¹² E sọ yí nayì sunnu fọtọ́n atọn bo do yé owu mẹ to Bẹteli po Ai po ṣẹnṣẹn, to ada whèyìhọ tòdaho lọ tọn mẹ.

¹³ Mọwẹ yé do gbẹtọ lẹ, yèdọ awhànpa he tin to agewàji tòdaho lọ tọn lẹpo, po aimlọntọ yetọn lẹ po to ovàmẹ he tin to whèyìhọ todaho lọ tọn ji: Jọsua sọ yì ṣẹnṣẹn agbàdo lọ tọn to ozán nẹ mẹ.

¹⁴ E sọ wá jọ, whenuena ahọlu Ai tọn mọ ẹn, dọ yé yawu bo fọ́n tite, wẹ omẹ tòdaho lọ tọn lẹ tọ́n yì awhàn do Islaeli ji, ewọ po omẹ etọn lẹpo po, to ojlẹ didè lọ mẹ, to Alaba nukọn: ṣigba é ma yonẹn dọ wutọnamẹ de tin to oji nẹ to todaho lọ godo gba

¹⁵ Jọṣua po Islaeli lepo po basi di yè gbà yé to yé nukọn, bo họ̀n gbọn aliho zùngbomẹ tọn dali jei.

¹⁶ Yè sọ ylọ gbẹto he tin to tòdaho lọ mẹ lẹpo plidopọ nado domọna yé: yé domọna Jọṣua, yè sọ dọ̀n yé sọn tòdaho lọ mẹ.

¹⁷ Sunnusi dopo ma pò to Ai kavi Bẹteli, he ma jẹmọna Islaeli: yé sọ jo todaho lọ do nuvo, bo domọna Islaeli.

¹⁸ OKLUNỌ sọ dọ hlan Jọṣua dọ, Dlẹn owhán he tin to alọ towe mẹ hlan Ai dali; na yẹn na na ẹn do alọ towe mẹ Jọsua sọ dlẹn owhán he tin to alọ etọn mẹ lọ hlan tòdaho lọ dali.

¹⁹ Owuvàtọ lẹ sọ fọ́n plaun sọn otẹn etọn mẹ, le é dlẹn alọ etọn jẹgbonu ede wẹ yé béwezun, bo biọ tòdaho lọ mẹ, bo yí i; yé sọ yawu bo simiyọn tòdaho lọ ji.

²⁰ Whenuena omẹ Ai tọn lẹ pọ́n godo yetọn, yé mọ, bo, dayi e go, azọ̀flizọ tòdaho lọ tọn hẹji yì olọn, yé ma sọ tindo huhlọn de nado họ̀nyì aliho he ji kavi aliho nẹ ji: omẹ he sọ họ̀nyì zùngbomẹ lẹ lé gọ̀ do mọdonamẹtọ lẹ go.

²¹ Whenuena Jọṣua po Islaeli lẹpo po mọ dọ owuvàtọ lẹ ko yí tòdaho lọ, podọ azọ̀flizọ tòdaho lọ tọn hẹji, whenẹnu yé sọ lẹ́, bo hù omẹ Ai tọn lẹ.

²² Omẹ devo lẹ sọ tọ́n sọn tòdaho lọ mẹ wá yé ji; mọwẹ yé tin to ṣẹnṣẹn Islaeli tọn, omẹ delẹ to ada he jì, omẹ delẹ to ada nẹ ji; yé sọ hò yé, sọmọ bọ yé ma dike ode yé tọn pò kavi họ̀ngan.

²³ Yé sọ wle ahọlu Ai tọn gbẹ́te, bo hẹn ẹn wá Jọṣua de.

²⁴ E sọ wá jọ, whenuena Islaeli ko dotana hùhù tòmẹnu Ai tọn lẹpo to danji, to zùngbomẹ fiemẹ yé domọna yé te, bọ yé mẹpó jai gbọn onù ohi tọn dali, kaka yè do và ye, wẹ Islaeli lẹpo gọ̀ do Ai bo yí onù ohi tòn do hò yé.

²⁵ Omẹ he jai to azán nẹ gbè lẹpo, sọn sunnu po yọnnu po mẹ, yin fọtọ́n wiawe, yèdọ omẹ Ai tọn lẹpo.

²⁶ Na Jọṣua ma dọ̀n alọ etọn do godo, ehe é yí do dlẹn owhán lọ do gbonu, kaka é do hù tòmẹnu Ai tọn lẹpo sùdo gbidigbidi.

²⁷ Kanlinyìnyìn po ogblannu todaho nẹ tọn kẹdẹ wẹ Islaeli yí na ogblan hlan yéde, kẹdẹdi ohó OKLUNỌ tọn he é degbèna Jọṣua.

²⁸ Mọwẹ Jọṣua mẹ́ Ai, bo hẹn ẹn zùn okiti de kakadoi, yèdọ adóto de, kakajẹ egbe.

²⁹ E sọ yí ahọlu Ai tọn pla do atin de go kakajẹ whèjaidamẹ: to odò yìyì owhè tọn jlẹmẹ Jọṣua degbè, yé sọ zé oṣiọ etọn jẹte sọn atin go, bo dlan ẹn do bibiọ hòngbo tòdaho lọ tọn tọn mẹ, bo pli do finẹji okiti daho zannu lẹ tọn de, kakajẹ egbe.

³⁰ Whenẹnu wẹ Jọsua tùn agbà de hlan OKLUNỌ, Jiwheyẹwhe Islaeli tọn, to osé Ebali mẹ,

³¹ Dile Moṣe mẹmẹsi OKLUNỌ tọn degbèna ovi Islaeli tọn lẹ do, dile yè wlan do to owé osẹ́n Moṣe tọn tọn mẹ, agbà de sọn zannu mapamapa lẹ mẹ, ehe omẹ de ma ko zé ogàn depope do oji na: yé sọ sanvọ to e ji avọ́ nunina mimẹ́ lẹ hlan OKLUNỌ, bo sọ na avọ́ nunina jijọho tọn lẹ

³² E sọ wlan hiadoai osẹ́n Moṣe tọn tọn de do zannu lẹ ji to finẹ, ehe é wlan, to nukọn ovi Islaeli tọn lẹ tọn mẹ.

³³ Isláeli lẹpo, po mẹho yetọn lẹ po po ogán lẹ po, po whẹ̀datọ yetọn lẹ po ṣite to ada alki tọn he ji podọ to ada nẹ ji to yẹwhenọ Levinu lẹ nukọn, he hẹn alki alẹ́nu OKLUNỌ tọn tọn lọ, jonọmẹ po whevi po: dadawe yé tọn to osé Gelizimi nukọn, dadawe yé tọn to osé Ebali tọn nukọn; dile Moṣe mẹmẹsi OKLUNỌ tọn ko degbè do, na yé nido dona omẹ Islaeli tọn lọ jẹnukọn.

³⁴ Enẹgodo é hia ohó osén tọn lẹ lẹpo, odona lọ po dẹ́hodo lọ po, kẹdẹdi ehe yè wlan do owé osẹ́n tọn mẹ lẹpo.

³⁵ Ohó de ma tin sọn ehe Moṣe degbèna lẹpo mẹ, he Jọsua ma hia to agùnplidopọ Islaeli tọn lẹpo nukọn, yọnnusi lẹ, po yọpọvu lẹ po, po jonọmẹ lẹ po he yín zọ̀nhẹtọ to yé ṣẹnṣẹn lẹ.