JỌṢUA 7 - BIBLU WIWE LỌ 1923

¹ ṢIGBA ovi Islaeli tọn lẹ wà ylankan de to onú dodèpa lọ mẹ: na Akani, visunnu Kalmi tọn, vìsunnu Zabdi tọn, visunnu Zela tọn, sọn whẹndo Juda tọn mẹ, yí sọn onú dodèpa lọ mẹ: yè sọ hẹn adi OKLUNỌ tọn jimiyọn do ovi Islaeli tọn lọ Ji.

² Jọṣua sọ do omẹ sọn Jẹliko hlan Ai, ehe tin to Bẹbaveni wàji, to whẹzẹntẹn Bẹteli tọn dali, bo dọhó hlan yé, dọmọ, Mì hẹji yì bo bẹ̀pọ̀n aigba lọ. Omẹ ewlẹ sọ yìaga bo bẹ̀pọ̀n Ai.

³ Yé sọ lẹ́gọ̀wá Jọsua de, bo dọ hlan ẹn dọ, A dike gbẹtọ lẹpo hẹji yì blo; ṣigba gbọ gbẹtọ fọtọ́n awe kavi atọ̀n ni hẹji yì bo hò Ai; a hẹn gbẹtọ lẹpo nado wàzọ̀n finẹ blo; na omẹ vúde wẹ yé.

⁴ Mowẹ sunnu nayì fọtọ́n atọ̀n hẹji yì finẹ sọn gbẹtọ lẹ mẹ: yé sọ hònyì to omẹ Ai tọn lẹ nukọn.

⁵ Omẹ Ai tọn lẹ sọ hù sunnu nayì gbãntọ́nnukundopo sọn yé mẹ: yé sọ domọna yé sọn họ̀ngbo nukọn yèdọ jẹ Ṣibalimi, bo hù yé whenuena yé to tejẹ jei: ayiha gbẹtọ ewlẹ tọn lẹ sọ yè, bo lẹzùn di osìn.

⁶ Jọsua sọ tlẹn avè etọn lẹ, bọ hè jai to nukunmẹ etọn ji to alki OKLUNỌ tọn nukọn kakajẹ whèjai, ewọ po mẹho Islaeli tọn lẹpo; yé sọ yí kọgudu do ota yetọn lẹ ji.

⁷ Jọsua bọ dọmọ, Ṣó, OKLUNỌ È Jiwheyẹwhe, etẹwutu wẹ hiẹ ka hẹn omẹ he lẹ wá Jọdani godo, nado yí mí do alọ Amọlínu lẹ tọn mẹ nado hẹn mí nado dọ̀n? mí do ko yín pupékọnọ bo nọnò Jọdani gododọ̃n

⁸ A OKLUNỌ, etẹ wẹ yẹn na dọ, godo ehe Islaeli ko lè nẹgbé yetọn lẹ to kẹ̀ntọ yetọn lẹ nukọn

⁹ Na Kananinu lẹ po tòmenu aigba lọ tọn lẹpo po na sè gbọn etọn dali, bo na lédo mípé, bo na sán oyín mìtọn sè sọn aihọn mẹ: etẹ wẹ híẹ na wà na oyín daho towe?

¹⁰ OKLUNỌ sọ dọ hlan Jọṣua dọ, Fọ́n ṣite; etẹwutu wẹ hiẹ họ̀ jẹ nukunmẹ towe jí dole?

¹¹ Islaeli ko wàylando; nugbo, yèdọ yé ko dasa alènu ṣie he yẹn degbèna yé: nugbo, yèdọ yé ko yí sọn onú dodèpa lọ mẹ; bo ko sọ fìn ga, bo sọ wàblu ga, yèdọ yé ko yi i do agbàn yetọn titi ṣẹnṣẹn.

¹² Enẹwutu ovi Islaeli tọn lẹ ma sọgan nọte to kẹ̀ntọ yetọn lẹ nukọn, yé lé nẹgbé yetọn lẹ to kẹ̀ntọ yetọn lẹ nukọn, na yé tin lẹzùn dèhodonọ wutu: Yẹn ma to na tin po mì po ba gba, adavo mì hù onú dodèpa lọ súdo sọn mì ṣẹnṣẹn.

¹³ Fọ́n, klan gbẹtọ lẹ do wiwe, bo dọmọ, Mì klan mìde do wiwe hlan osè: na le wẹ OKLUNỌ dọ, Jiwheyẹwhe Islaeli tọn, Onú dodèpa de tin to ogbla towe mẹ, Hiẹ Islaeli: hiẹ ma sọgan nọte to kẹ̀ntọ towe lẹ nukọn gba, kaka mì do zé onú dodépa lọ sè sọn mì ṣẹnṣẹn,

¹⁴ Enẹwutu to afọnnu yè na hẹn mì sẹwá gbọn whendo mìtọn lẹ dali: é na sọ yín, dọ whẹndo he OKLUNỌ na yí na sẹwá gbọn hẹnnu lẹ dali; hẹnnu he OKLUNỌ na sọ yí na sẹwá gbọn whédo lẹ dali: whédo he OKLUNỌ na sọ yí na sẹwá gbọn omẹ dopodopo dali.

¹⁵ E na sọ yín, dọ ewọ he yè yi po onú dodèpa lọ po yè na yí miyọn do mẹ̀ ẹn, ewọ po ehe é tindo lẹpo po: na ewọ dasa alẹ̀nu OKLUNỌ tọn wutu, podọ ewọ ko wà nudakan to Islaeli mẹ wutu.

¹⁶ Mọwe Jọsua yawu fọ́n to afọnnu, bo hẹn Islaeli sẹwá gbọn whẹndo yetọn lẹ dali; yè sọ yí whẹndo Juda tọn:

¹⁷ e sọ hẹn hẹnnu Juda tọn sẹwá; é sọ yí hẹnnu Zelanu lẹ tọn: é sọ hẹn hẹnnu Zelanu lẹ tọn sẹwá gbon omẹ dopodopo dali; yè sọ yí Zabdi

¹⁸ e sọ hẹn whédo etọn sẹwá gbọn ome dopodopo dali; yè sọ yí Akani, visunnu Kaími tọn, visunnu Zabdi tọn, visunnu Zela tọn, sọn whendo Juda tọn mẹ.

¹⁹ Jọṣua sọ dọ hlan Akani dọ, Visunnu ṣie, yẹn vẹ̀ we, na gigo hlan OKLUNỌ, jiwheyẹwhe Islaeli tọn, bo basi ogbèyí hlan ẹn; bo dọ núhe hiẹ wà na mi dinvie; a sọ ẹ whla do mi blo.

²⁰ Akani sọ gblọnna Jọṣua, bo dọmọ, Sọn nugbo de mẹ yẹn ko wàylan do OKLUNỌ, Jiwheyẹwhe Islaeli tọn, podọ le po le po wẹ yẹn ko wà:

²¹ whenuena yẹn mọ tó gblannú lẹ ṣẹnṣẹn awugbó Babiloni tọn dagbedagbe de, po ṣẹkle fataka tọn fọde po, po opatin ṣẹkle kandeao jijlẹ sika tọn tọn de po, whenẹnu yẹn donukunkẹnna yé, bo yí yé; bo, dayi e go, yè whla yé do okọ́ mẹ to gohọ ṣie ṣẹnṣẹn, po fataka lọ po to e glọ.

²² Mọwẹ Jọsua do mẹdagun lẹ hlan, yé sọ họnwèzun yì gohọ̀ lọ mẹ; bo, dayi e go, yè whla ẹ do gohọ̀ etọn mẹ, po fataka lọ po to e glọ.

²³ Yé sọ zé yé sọn ṣẹnṣẹn gohò tọn, bo hẹn yé wá Jọṣua de, po ovi Islaeli tọn lẹpo po de; yé sọ bé yé dai do OKLUNỌ nukọn.

²⁴ Jọsua, po Islaeli lẹpo po po e po, yí Akani visunnu Zela tọn, po fataka lọ po, po awugbó lọ po, po opatin sika tọn lọ po, po visúnnu etọn lẹ po, po viyónnu etọn lẹ po, po oyínsú etọn lẹ po, po kẹtẹkẹtẹ etọn lẹ po, po lẹngbọ etọn lẹ po, po gohọ̀ etọn po, po ehe é tindo lẹpo po: yé sọ hẹn yé hẹji yì agbàdo Akọ tọn mẹ.

²⁵ Jọsua sọ dọmọ, Etẹwutu wẹ hiẹ dotukla mí? OKLUNỌ na dotukla we to egbé. Islaeli lẹpo sọ dlanzannu do e hù; yé sọ yí miyọn do mẹ̀ yé, bo dlanzannu do yé hù.

²⁶ Yé sọ dọ̀n okiti daho zannu lẹ tọn de pli do e ji, kakajẹ egbé; OKLUNỌ sọ lé sọn zohùnhùn adi etọn tọn mẹ. Enẹwutu wẹ yè do nọ ylọ oyín otẹn lọ mẹ tọn dọ, Agbàdo Akọ tọn, kakajẹ egbé.