JỌṢUA 6 - BIBLU WIWE LỌ 1923

¹ (DINVIE yè glọn Jẹliko do e mẹ pẹ̀npèn na ovi Islaeli tọn lẹ tọn wutu: mẹde ma yì gbonu, mẹde ma sọ biọ whegbe.)

² OKLUNỌ sọ dọ hlan Jọṣua dọ, Pọ̀n, yẹn ko na Jẹliko do alọ towe mẹ, po ahọlu etọn po, po Sunnu huhlọnnọ tudido tọn lẹ po.

³ Míwlẹ na lèdo tòdaho lọ, sunnu awhàn tọn lẹpo, yìyì lédo tòdaho lọ whladopo. Le wẹ hiẹ na wà do hè azán ṣidopo.

⁴ Yẹwhenọ ṣinawe na hẹn opèn ṣinawe agbòzo tọn lẹ to alki nukọn: to azán sinawetọ gbè mì na lédo tòdaho lọ whla ṣinawe, yẹwhenọ lẹ na sọ kún opèn lẹ lọ.

⁵ E na sọ yín, dọ whenuena yé yí agbòzo lọ do basi zínhiho, podọ whenuena míwlẹ sọ sè ogbè opèn lọ tọn, gbẹtọ lẹpo na sọ zìn abóbó daho dogbè; adó Jẹliko tọn lẹpo na sọ họ́ jai mlẹnmlẹn, gbẹtọ lẹ dopodopo na sọ hẹji titegbe to nukọn etọn

⁶ Jọṣua visunnu Nuni tọn sọ ylọ yẹwhenọ lẹ, bo dọ hlan yé dọ, Mì ze alki alènu tọn lọ, bo sọ gbọ yẹwhenọ ṣinawe ni hẹn opẹ̀n ṣinawe agbozo tọn lẹ to alki OKLUNỌ tọn lọ nukọn.

⁷ Yé sọ dọ hlan gbẹtọ lẹ dọ, Mì jù zọ̀nmí, bo lẹ́do tòdaho lọ, bo sọ gbọ sunnu awhànfuntọ lẹ ni jù zọ̀nmí to alki OKLUNỌ tọn nukọn.

⁸ E sọ yín mọ, dọ whenuena Jọsua ko dọhó hlan gbẹtọ lẹ, yẹwhenọ ṣinawe he hẹn opèn ṣinawe agbòzo tọn to OKLUNỌ nukọn lẹ, juyì, bo zìn opèn lẹ dogbè: alki alènu OKLUNỌ tọn tọn sọ bòdo yé go.

⁹ Sunnu awhànfuntọ lẹ to yìyì to yẹwhenọ he to opèn kún lẹ nukọn, godo-whàn sọ to yìyì to alkì godo, yẹwhenọ lẹ to opèn lẹ kún le yé to yìyì.

¹⁰ Jọsua sọ degbèna gbẹtọ lẹ, dọmọ, Mì dabóbó blo, mọ mì sọ dike yè sè ogbè mìtọn blo, mọ ohó depope ma na sọ tọ́n sọn onù mìtọn mẹ gba, kakajẹ azán he gbè yẹn na degbèna mi ni dabóbó; whenẹnu wẹ mì na dabóbó.

¹¹ Mowẹ é hẹn alki OKLUNỌ tọn lọ nado lẹ̀do tòdaho lọ, bo nọ yì lẹ̀do whladopo: yé sọ gọ̀ wá osla mẹ, bo nọ̀ osla mẹ.

¹² Jọṣua yawu fọ́n to afọnnu, yẹwhenọ lẹ sọ zé alki OKLUNỌ tọn lọ.

¹³ Yẹwhenọ ṣinawe he hẹn opẹ̀n ṣinawe agbòzo tọn lẹ to alki OKLUNỌ tọn nukọn to yìyì manọte, bo to opẹ̀n lẹ kún: sunnu awhànfuntọ lẹ sọ to yé nukọn; godo-whán wá godo alki OKLUNỌ tọn, yẹwhenọ lẹ to opẹ̀n lẹ kún le yé to yìyì.

¹⁴ To azán awetọ gbè yé lẹ́do tòdaho lọ whladopo, bo sọ légè do osla mẹ: mọwẹ yé wà họ̀ azán ṣidopo.

¹⁵ E sọ wá jọ to azán ṣinawetọ gbè, wẹ yé yawu fọ́n to afọnnu fu, bo lẹ̀do tòdano lọ kẹdẹdi owalọ dopolọ whlaṣinawe: gbẹdoponẹ kẹdẹ wẹ yé lẹ́do tòdaho lọ whlaṣinawe.

¹⁶ E sọ wá jọ to whlasinawetọ ji, whenuena yẹwhenọ lẹ kún opẹ̀n, Jọṣua dọ hlan gbẹtọ lẹ dọ, Dabóbó; na OKLUNỌ ko na tòdaho lọ mì.

¹⁷ Yè na sọ yí tòdaho lọ do dèpa, yèdọ ewọ po ehe tin to e mẹ lẹpo po, hlan OKLUNỌ: Lahabi galọtọ kẹdẹ wẹ na nọgbẹ̀, ewọ po ehe tin to e de to owhé gbè lẹpo po, na ewọ whla mẹdagun he mí dohlan lẹ wutu.

¹⁸ Podọ mìwlẹ, to nudepope mẹ mì ni whla mìde sọn onú dodèpa mẹ, na whenuena mì ko yí i do dèpa, mì nika yí sọn onú dodèpa lọ mẹ; mọwẹ mì na sọ hẹn osla Islaeli tọn zùn dẹ̀hodo, bo dotukla ẹ.

¹⁹ Adavo fataka lẹpo, po sika po, nuzinzán gànvẹ po gànyù po tọn, wẹ wiwe hlan OKLUNỌ: yé na wá agbànhọ OKLUNỌ tọn mẹ.

²⁰ Mọwẹ gbẹtọ lẹ dabóbó, bọ yẹwhenọ lẹ kún opẹ̀n lẹ̀: é sọ wá jọ, whenuena gbẹtọ lẹ sè ogbè opẹ̀n lọ tọn wẹ gbẹtọ lẹ zìn abóbó daho dogbè, bọ adó hò jai mlẹnmlẹn, mọwẹ gbẹtọ lẹ hẹji yì tòdaho lọ mẹ, omẹ dopodopo titegbe to nukọn etọn, yé sọ yi tòdaho lọ.

²¹ Yé sọ yí onù ohi tọn do hù omẹ he tin to tòdaho lọ mẹ lẹpo sudo, sunnu po yọnnu po, yọ̀pọ po mẹho po, oyìn po lẹngbọ lẹ po, po kẹtẹkẹtẹ po.

²² Jọṣua sọ dọ hlan omẹ awe he yín amé aigba lọ tọn dọ, Mì yì owhé galọtọ lọ tọn gbè, bo hẹn nawe lọ sọn finẹwá, po ehe e tindo lẹpo po, dile mì whle hlan ẹn do.

²³ Yọpọ sunnu amẹ́ lọ yì owhé gbè, bo hẹn Lahabi jẹgbonu, po otè etọn po, po onọ etọn po, po mẹmẹsunnu etọn lẹ po, po ehe é tindo lẹpo po, hẹnnumẹ etọn lẹpo ga yé hẹn jẹgbonu; yé sọ do yé gbonu osla Islaeli tọn tọn.

²⁴ Yé sọ yi miyọn do mè tòdaho lọ, po ehe tin to e mẹ lẹpo po: fataka kẹdẹ, po sika po, po nuzinzán gànvẹ̃ po gànyu po tọn lẹ, yé bẹ́ do adọkunnu ohò OKLUNỌ tọn tọn mẹ.

²⁵ Ṣigba Lahabi galọtọ, po whédo otè etọn tọn po, po ehe é tindo lẹpo po, wẹ Jọṣua whlẹn dogbè? é sọ nọnọ̀ ṣẹnṣẹn Islaeli tọn, kakajẹ egbé; na ewọ whla mẹdagun he Jọṣua dohlan lẹ nado bẹ̀pọ̀n Jẹliko wutu.

²⁶ Jọṣua sọ yi whiwhle de do naṣẹ yé to ojlẹ nẹ mẹ, dọmọ, Dẹ̀hodonọ wẹ omẹ lọ yín to OKLUNỌ nukọn, he fọ́n tite bo gbá Jẹliko tòdaho he: okú plọnji etọn tọn wẹ é na yí do do dòdo etọn ai, po okú visunnu jivọ etọn tọn po wẹ é na yí do zé hòngbo etọn do ote.

²⁷ Mowẹ OKLUNỌ tin po Jọṣua po; linlin etọn sọ tin to aigba lẹpo ji.