JỌṢUA 5 - BIBLU WIWE LỌ 1923

¹ E sọ wá jọ, whenuena ahọlu Amọlinu lẹ tọn lẹpo, he tin to Jọdani godo hlan whèyìhọ dali, po ahọlu Kananinu lẹ tọn lẹpo po, he tin to ohù dali, sè le dọ OKLUNỌ ko hú osìn Jọdani tọn lẹ sọn ovi Islaeli tọn lẹ nukọn, kaka mí do juwayì godo, wẹ ayiha yetọn yè, mọ gbigbọ ma sọ tin to yé homẹ ba, na ovi Islaeli tọn lẹ tọn wutu.

² To ojlẹnẹ mẹ OKLUNỌ dọ hlan Jọsua, dọmọ, Basi ohi okén tọn lẹ na we, bo sọ gbòwhẹna ovi Islaeli tọn lẹ whlawetọ.

³ Jọṣua sọ basi ohi okẹ́n tọn lẹ nè, bo gbòwhẹna ovi Islaeli tọn lẹ to okọta kọ̀n sọn ayútintan lẹ mẹ.

⁴ Ehe wẹ onú he wutu Jọṣua gbòwhẹ: gbẹtọ he tọ́n sọn Egipti lẹpo, he yín asú lẹ, yèdọ sunnu awhàn tọn lẹ, ko kú to zùngbo mẹ to aliho ji, to godo yé ko tọ́n sọn Egipti.

⁵ Na gbẹtọ he tọ́n lẹpo wẹ yè gbòwhẹna: ṣigba omẹ he yè ji lẹpo to zùngbo mẹ to aliho le yé tọ́n ja sọn Egipti, yé ma ko gbòwhẹ gba.

⁶ Na owhè kande wẹ ovi Islaeli tọn lẹ do zinzọnlin to zùngbo mẹ, kaka akọta lẹpo, yèdọ sunnu awhàn tọn lẹ he tọ́n sọn Egipti wẹ yè súdo, na yé ma tuntóai hlan ogbè OKLUNỌ tọn wutu: mẹhe OKLUNỌ whle hlan dọ é ma na dike yé ni mọ aigba lọ ehe OKLUNỌ whle hlan otọ̀ yetọn lẹ dọ é na na yé, aigba he yí oyìnnọ́ po owín po do to sisa

⁷ Ovi yetọn lẹ he é zetite to otẹn yetọn mẹ lẹ, yé wẹ Jọṣua gbòwhẹna: na yé yín magbòwhẹnọ, na yé ma ko gbòwhẹna yé to aliho wutu.

⁸ E sọ wá jọ, whenuena yé ko basi whẹgbigbòna akọta lẹpo vò, wẹ yé nò otẹn yetọn lẹ mẹ to osla mẹ, kaka yé do jẹgángán.

⁹ OKLUNỌ sọ dọ hlan Jọṣua dọ, Egbé wẹ yẹn bli ovlẹ Egipti tọn sè sọn mì ji. Enẹwutu wẹ yè ylọ oyín otẹn lọ tọn dọ Gilgali, jẹ egbé.

¹⁰ Ovi Islaeli tọn lẹ sọ dosla do Gilgali mẹ; yé sọ payi juwayi go to azán wiẹnẹtọ osùn tọn ji to whèjai to danfafa Jẹliko tọn lẹ ji.

¹¹ Yé sọ dù sọn gbàdo hóhó aigba lọ tón mẹ to aihọngbe to juwayi lọ godo, aklahihi madotónnọ lẹ po gbàdo sisọ po to gbèdoponẹ.

¹² Mana sọ gbòdo to aihọngbe, to godo yé ko dù sọn gbàdo hóhó aigba lọ tọn mẹ; mọ ovi Islaeli tọn lẹ ma sọ tindo mana gbede ba; ṣigba yé to dùdù sọn sinsẹ́n aigba Kanani tọn tọn mẹ to owhè nẹ mẹ.

¹³ E sọ wá jọ, whenuena Jọsua tin to Jẹliko dali, wẹ é zé nukun etọn lẹ daga bo pọ́n, bo, dayi e go, dawe de nọte to aga jlọ do e ji po ohi etọn po to súnsún to alọ etọn mẹ: Jọṣua sọ yì e de, bo dọ hlan ẹn dọ, Mí hiẹ tin na, kavi na mẹglatọ mìtọn lẹ?

¹⁴ Ewọ sọ dọmọ, Lala; ṣigba di awhàngan awhànpa OKLUNỌ tọn tọn wẹ yẹn wá na dinvie. Jọṣua sọ họ́ṣinyọn nukunmẹ eton ji hlan aigba, bo sèn, bo dọ hlan ẹn dọ, Etẹ wẹ klunọ ṣie dọ hlan mẹmẹsi etọn?

¹⁵ Awhàngan awhànpa OKLUNỌ tọn tọn lọ sọ dọ hlan Jọṣua dọ, Dè afọpa towe sẹ̀ sọn afọ towe; na otẹn fieji hiẹ ṣite te wiwe wẹ. Jọṣua sọ wà mọ.