JỌṢUA 4 - BIBLU WIWE LỌ 1923

¹ E sọ wá jọ, whenuena akọta lẹpo ko juwayì Jọdani godo patapata, wẹ OKLUNỌ dọhó hlan Jọṣua, dọmọ

² Dè sunnu wiawe sọn gbẹtọ lẹ mẹ, sunnu dopo sọn whendo dopodopo mẹ.

³ Mì bo degbèna ye dọmọ, Mi zé sọnfìnẹ sọn ṣẹnṣẹn Jọdani tọn, sọn otẹn fie afọ yẹwhenọ lẹ tọn lẹ nọte glì te, zannu wiawe, bo hẹn yé juyì po mì po, bo sọ yé dai do otẹn fininò me, fie mì na nọ̀ to ozán he mẹ.

⁴ Whenenu wẹ Jọṣua ylọ sunnusi wiawe lẹ he é ko wleawuna sọn ovi Islaeli tọn lẹ mẹ, sunnu dopo sọn whẹndo dopodopo mẹ:

⁵ Jọṣua sọ dọ hlan yé dọ, Mì juyì alki OKLUNỌ Jiwheyẹwhe mìtọn tọn nukọn yì ṣẹnṣẹn Jọdani tọn, omẹ dopodopo mì tọn ni ze zannu dopo do abọ́ etọn ji, kẹdẹdi osọha whẹndo ovi Islaeli tọn lẹ tọn:

⁶ na ehe nido yín ohia de to mì ṣẹnṣẹn, dọ whenuena ovi mìtọn lẹ to ojlẹ he ja mẹ na kanbiọ mì, dọmọ, Etẹ wẹ mì lẹn gbọn zannu helẹ tọn dali?

⁷ Whenẹnu mì na dọ hlan yé dọ, Na yè sán osìn Jọdani tọn lẹ sẹ̀ to alki alẹ̀nu OKLUNỌ tọn tọn nukọn wutu wẹ; whenuena é juwayì Jọdani godo, osìn Jọdani tọn lẹ yín sinsán sẹ̀: zannu helẹ na sọ tin na oflin de hlan ovi Islaeli tọn lẹ kakadoi.

⁸ Ovi Islaeli tọn lẹ sọ wà mọ dile Jọṣua degbè do, bo zé zannu wiawe sọn ṣẹnṣẹn Jọdani tọn, dile OKLUNỌ dọhó hlan Jọṣua do, kẹdẹdi osọha whẹndo ovi Islaeli tọn lẹ tọn; yé sọ hẹn yé juyì po yé po jẹ otẹn fie yé nọ̀, bo sọ yé bèdai to finẹ.

⁹ Jọsua sọ zé zannu wiawe dote do ṣẹnṣẹn Jọdani tọn, do otẹn fie afọ yẹwhenọ he hẹn alki alènu lọ tọn lẹ tọn site te: yé sọ tin to finẹ, jẹ egbé he.

¹⁰ Na yẹwhenọ he hẹn alki lọ lẹ ṣite to ṣẹnṣẹn Jọdani tọn, kaka yè do dotana onú dopodopo he OKLUNỌ degbèna Jọṣua nado dọ hlan gbẹtọ lẹ, kẹdẹdi ehe Moṣe degbèna Jọṣua lẹpo: gbẹtọ lẹ sọ yawu bo juyì.

¹¹ E sọ wá jọ, whenuena gbẹtọ lẹ ko juyì patapata, bọ alki OKLUNỌ tọn ko sọ juyì, po yẹwhenọ lẹ po, to nukun gbẹtọ lẹ tọn mẹ.

¹² Bọ ovi Luebẹni tọn lẹ, po ovi Gadi tọn lẹ po, po odá whẹndo Manassẹ tọn tọn po, juyì to gbajamẹ to ovi Islaeli tọn lẹ nukọn, dile Moṣe dọhó hlan yé do:

¹³ nayì fọtọ́n kande blagbaja gli na awhàn juyì awhànfuntẹn to OKLUNỌ nukọn, yì odànfafa Jẹliko tọn.

¹⁴ To azán nẹ gbè OKLUNỌ hẹn Jọṣua klo to nukun Islaeli lẹpo tọn mẹ; yé sọ dibusi i, dile yé nọ dibusi Moṣe do, to azán ogbè etọn lẹpo tọn mẹ.

¹⁵ OKLUNỌ sọ dọhó hlan Jọṣua, dọmọ,

¹⁶ Degbèna yẹwhenọ he hẹn alki kunnuhó lọ tọn lẹ, dọ yé ni hẹ́ aga wá sọn Jọdani mẹ

¹⁷ Enẹwutu Jọṣua degbèna yẹwhenọ lẹ, dọmọ, Mì hẹ̀ aga wá sọn Jọdani mẹ.

¹⁸ E sọ wá jọ, whenuena yẹwhenọ he hẹn alki alẹ̀nu OKLUNỌ tọn lẹ tọ́n sọn ṣẹnṣẹn Jọdani tọn wá aga, bọ afọpahomẹ afọ yẹwhenọ lẹ tọn tọn yín zedaga do aigba húhú ji, wẹ osìn Jọdani tọn lẹ lẹ́gọ̀ do otẹn yetọn mẹ, bo sọ gbàpé agbègbe etọn lẹpo ji, di hóhótọn.

¹⁹ Gbẹtọ lẹ sọ hé aga sọn Jọdani mẹ to azán aotọ osùn tintan tọn ji, bo dosla to Gilgali, to agbó whèzètẹn Jẹliko tọn ji.

²⁰ Zannu wiawe nẹlẹ he yé zé sọn Jọdani mẹ lẹ, wẹ Jọsua zé dote to Gilgali mẹ.

²¹ E sọ dọhó hlan ovi Islaeli tọn lẹ, dọmọ, Whenuena ovi mìtọn lẹ na kanbiọ otọ́ yetọn lẹ to ojlẹ he ja mẹ, dọmọ, Etẹ wẹ zannu helẹ lọ̀?

²² Whenẹnu mì na gbọ ovi mìtọn lẹ ni yọnẹn, dọmọ. Islaeli wá Jọdani he godo gbọn aigba húhú ji.

²³ Na OKLUNỌ Jiwheyẹwhe mìtọn hú osìn Jọdani tọn lẹ sọn mì nukọn, kaka mì do juwàyì godo, dile OKLUNỌ Jiwheyẹwhe mìtọn wà hlan Ohù Vẹ̃ do, he é hú sọn mí nukọn, kaka mí do juwayì godo:

²⁴ na gbẹtọ aihọn tọn lẹpo nido yọ́n alọ OKLUNỌ tọn, dọ é yín huhlọnnọ; na yé nido nọ dibusi OKLUNỌ Jiwheyẹwhe mìtọn kakadoi.