JỌṢUA 3 - BIBLU WIWE LỌ 1923

¹ JỌṢUA sọ tite to afọnnufũ, yé sọ diọtẹn sọn Sitimi, bo wá Jọdani, ewọ po ovi Islaeli tọn lẹpo po; yé sọ ṣi finẹ whẹpo yé do juwáyi.

² E sọ wá jọ to azán atọ̀n godo, wẹ ogán lẹ dagbọn ṣẹnṣẹn osla tọn;

³ yé sọ degbèna gbẹtọ lẹ, dọmọ, Whenuena mì mọ alki alẹ̀nu OKLUNỌ Jiwheyẹwhe mìtọn tọn, bọ yẹwhenọ Levinu lẹ zé e hẹn, whenẹnu mì na diọtẹn sọn otẹn mìtọn mẹ, bo hodo e.

⁴ Gãnṣo tẹnvọ de na tin to mì po e po ṣẹnṣẹn, nayì awàgba fọtọ́n awe nkọ jijlẹ: mì sẹpọ́ e dali blo, na mì nido yón aliho he mì na gbọn yì; na mì ma ko gbọn aliho he daigbede

⁵ Jọṣua sọ dọ hlan gbẹtọ lẹ dọ, Mì le mìde wé: na OKLUNỌ na wà nujawu lẹ to mì ṣẹnṣẹn to osọ̀.

⁶ Jọṣua sọ dọhó hlan yẹwhenọ lẹ, dọmọ, Mì zé alki alẹnu tọn lọ, bo juyì to gbẹtọ lẹ nukọn. Yé sọ zé alki alènu tọn lọ, bo to yìyì to gbẹtọ lẹ nukọn.

⁷ OKLUNỌ sọ dọ hlan Jọṣua dọ, Egbé wẹ yẹn na ṣẹ nado hẹn we klo to nukun Islaeli lẹpo tọn mẹ, na yé nido yọnẹn dọ, le yẹn tin po Moṣe po do, mọwẹ yẹn na tin po hiẹ po do.

⁸ Hiẹ na sọ degbèna yẹwhenọ he hẹn alki alẹ̀nu lọ tọn lẹ, dọmọ, Whenuena míwlẹ jẹ otópa osìn Jọdani tọn lẹ tọn, mìwlẹ na ṣite ṣúdudu to Jọdani mẹ.

⁹ Jọṣua sọ dọ hlan ovi Islaeli tọn lẹ dọ, Mì sẹpófi, bo sè ohó OKLUNỌ Jiwheyẹwhe mìtọn tọn lẹ.

¹⁰ Jọṣua sọ dọmọ, Fidali mì na yọnẹn te dọ Jiwheyẹwhe ogbẹnọ tin to mì ṣẹnṣẹn, podọ ewọ matin winyandomẹ na yàn Kananinu lẹ, po Hitinu lẹ po, po Hivinu lẹpo, po Pelizinu lẹ po, po Gilgaṣinu lẹ po, po Amọlinu lẹ po, po Jẹbusinu lẹ po sọn mì nukọn.

¹¹ Dayi e go, alki alẹnu OKLUNỌ aihọn lẹpo tọn dagbọn nukọn mì tọn jei Jọdani mẹ.

¹² Enẹwutu dinvie, mì dè sunnu wiawe sọn whẹndo Islaeli tọn lẹ mẹ, sunnu dopo na whẹndo dòpodopo.

¹³ E na sọ wá jọ, whenuena afọpàhomẹ afọ yẹwhenọ he hẹn alki OKLUNỌ tọn tọn lẹ, OKLUNỌ aihọn lẹpo tọn, na gbọjẹ to osìn Jọdani tọn lẹ mẹ, bọ osìn Jọdani tọn lẹ na yín sinsán sẹ, yèdọ osìn he jẹte sọn aga wá lẹ: yé na nọte to ogònu dopo mẹ.

¹⁴ E sọ wá jọ, whenuena gbẹtọ lẹ diọtẹn sọn ogohò yetọn lẹ mẹ, nado juyì Jọdani godo, bọ yẹwhenọ he hẹn alki alẹ̀nu tọn lẹ tin to gbẹtọ lẹ nukọn;

¹⁵ whenuena yé he hẹn alki lọ wá jẹ Jọdani, bọ afọ yẹwhenọ he hẹn alki lọ tọn lẹ tọn yín dido otòpa osìn tọn mẹ (na Jọdani nọ gọ́ṣinyọn agbègbè etọn lẹ ji to ojlẹ ojijẹ tọn lẹpo mẹ,)

¹⁶ bọ osìn he sọn aga wá lẹ nọte, bo fọnṣite to ogónu dopo mẹ, to aganu boboe dọ̃n, to Adami, tòdaho he tin to Zaletani wàji: podọ enẹlẹ he yì odò hlan ohù Alaba dali, yèdọ Ohù Ojẹ̀ tọn, yè sán ẹn sè pete; gbẹtọ lẹ sọ juwayì Jẹliko titegbe.

¹⁷ Yẹwhenọ he hẹn alki alẹ̀nu OKLUNỌ tọn tọn lọ nọte gli to aigba húhú ji to ṣẹnṣẹn Jọdani tọn, Islaeli lẹpo sọ juwayì to aigba húhú ji, kaka akọta lẹpo do juwayì Jọdani godo patapata.